పాలమూరు గడ్డ కేంద్రంగా సీఎం సొంత నియోజకవర్గం, ఉమ్మడి మహబూబ్‌నగర్ జిల్లాల్లోని రైతాంగాన్ని ఏకం చేస్తూ ప్రభుత్వాన్ని ఇరుకున పెట్టడమే గులాబీ దళం ప్రధాన వ్యూహంగా కనిపిస్తోంది. ముఖ్యంగా జూరాల ప్రాజెక్టు నుంచి సాగునీటిని తక్షణమే విడుదల చేయాలంటూ ఆందోళనలు తీవ్రతరం చేయడం ద్వారా, సీఎం సొంత జిల్లాలోనే రైతాంగం అసంతృప్తితో ఉందనే సంకేతాన్ని రాష్ట్రవ్యాప్తంగా పంపాలని బీఆర్ఎస్ వ్యూహాత్మకంగా అడుగులు వేస్తోంది.

వ్యూహాత్మకంగా కుప్పం పోలిక

ఈ క్రమంలో బీఆర్ఎస్ నేతలు తెరపైకి తెచ్చిన కుప్పం పోలిక వ్యూహం రాజకీయంగా చర్చనీయాంశమవుతోంది. ఆంధ్రప్రదేశ్‌లో ముఖ్యమంత్రి చంద్రబాబు నాయుడు తన సొంత నియోజకవర్గమైన కుప్పానికి హంద్రీ-నీవా ప్రాజెక్టు ద్వారా నీటిని తరలించుకుంటుంటే, ఇక్కడ ముఖ్యమంత్రిగా ఉన్న రేవంత్ రెడ్డి మాత్రం తన సొంత జిల్లా పాలమూరు రైతులకు సాగునీరు అందించడంలో పూర్తిగా విఫలమయ్యారంటూ బీఆర్ఎస్ ముమ్మర ప్రచారం చేస్తోంది. ఇప్పటికే ఈ అంశంపై జూరాల ప్రాజెక్ట్ వద్ద ఉద్రిక్త పరిస్థితులు తలెత్తగా, రానున్న రోజుల్లో రైతులను పెద్ద ఎత్తున సమీకరించి రేవంత్ సర్కారుపై తీవ్ర ప్రజావ్యతిరేకతను మూటగట్టేలా మరో విడత ఉద్యమానికి బీఆర్ఎస్ రంగం సిద్ధం చేస్తోంది.

తిప్పికొట్టేందుకు కాంగ్రెస్ ప్రయత్నం

మరోవైపు, ప్రతిపక్షం విసురుతున్న ఈ జలబాణాన్ని తిప్పికొట్టేందుకు కాంగ్రెస్ నాయకత్వం కూడా అంతే వేగంగా ప్రత్యామ్నాయ ప్రణాళికలు రచిస్తోంది. కర్ణాటకలో తమ పార్టీ ప్రభుత్వమే అధికారంలో ఉండటాన్ని తనకు అనుకూలంగా మార్చుకోవాలని సీఎం రేవంత్ రెడ్డి భావిస్తున్నారు. ఎగువన ఉన్న కర్ణాటక ప్రాజెక్టుల నుంచి కృష్ణా జలాలను విడుదల చేయించి, జూరాలకు తగినంత ఇన్‌ఫ్లో పెంచడం ద్వారా పాలమూరు గొంతు తడపాలని చూస్తున్నారు. ఇందుకోసం ఉమ్మడి మహబూబ్‌నగర్ జిల్లాకు చెందిన మంత్రులు, ఎమ్మెల్యేలతో కూడిన ప్రత్యేక ప్రజాప్రతినిధుల బృందాన్ని కర్ణాటకకు పంపి, నీటి విడుదలకు మార్గం సుగమం చేయాలని కాంగ్రెస్ ప్రయత్నాలు ముమ్మరం చేసింది.

వర్షాల్లేవని ప్రజలకు తెలియదా?

బీఆర్ఎస్ చేస్తున్న ఈ ప్రయత్నం రాజకీయంగా వారికి ఎంతవరకు మైలేజ్ ఇస్తుందనేది రాజకీయ విశ్లేషకుల్లో ఆసక్తికరంగా మారింది. తెలంగాణలో నీళ్ల సెంటిమెంట్ ఎప్పుడూ అత్యంత శక్తివంతమైనదే అయినప్పటికీ, ప్రస్తుతం ప్రాజెక్టుల్లో ఉన్న నీటి నిల్వలు, వర్షాభావ పరిస్థితుల సాంకేతిక వాస్తవాలను ప్రజలు కూడా నిశితంగా గమనిస్తున్నారు. గత పదేళ్ల బీఆర్ఎస్ పాలనలో పాలమూరు-రంగారెడ్డి ఎత్తిపోతల పథకం పూర్తి కాకపోవడమే నేటి ఈ దుస్థితికి కారణమని కాంగ్రెస్ బలంగా ఎదురుదాడి చేస్తున్న వేళ, కేవలం జూరాల ముట్టడులతో ప్రజలను పూర్తిగా తమవైపు తిప్పుకోవడం గులాబీ పార్టీకి అంత సులువైన విషయం కాదనే అభిప్రాయం వ్యక్తమవుతోంది. కర్ణాటక ప్రభుత్వం నుంచి తెలంగాణకు నీటిని రేవంత్ సర్కార్ విజయవంతంగా రాబట్టగలిగితే బీఆర్ఎస్ చేస్తున్న ఆందోళనల తీవ్రత ఒక్కసారిగా నీరుగారిపోవడం ఖాయం. పాలమూరు కేంద్రంగా సాగుతున్న ఈ నీళ్ల రాజకీయం అటు రేవంత్ రెడ్డి నాయకత్వ పటిమకు, ఇటు బీఆర్ఎస్ పునరుజ్జీవన వ్యూహానికి ఒక అగ్నిపరీక్షగా మారనుంది.