జనసేన పార్టీ ఎమ్మెల్యేల తీరుపై రోజుకో హైలెట్ మీడియాలో వస్తోంది. గత ఎన్నికల్లో ఘన విజయాన్ని నమోదు చేసిన ఆ పార్టీకి, ఇప్పుడు అదే గెలుపు కొత్త తలనొప్పులను తెచ్చిపెడుతోంది.
ముఖ్యంగా మొదటిసారి చట్టసభకు ఎన్నికైన కొందరు ఎమ్మెల్యేల దూకుడు, వారి చుట్టూ ముసురుతున్న వివాదాలు పార్టీ అధినేత పవన్ కల్యాణ్కు సవాల్గా మారాయి.
అనుభవం లేమి.. అనవసర వివాదాలు:
జనసేన పార్టీ నుంచి గెలిచిన వారిలో అత్యధికులు తొలిసారి ఎమ్మెల్యేలుగా ఎన్నికైన వారే. మండలి బుద్ధప్రసాద్ వంటి అనుభవజ్ఞులు తమ పరిధిలో హుందాగా వ్యవహరిస్తూ పాలనపై దృష్టి పెడుతుంటే, కొందరు కొత్త ఎమ్మెల్యేలు మాత్రం క్షేత్రస్థాయిలో వివాదాలకు కేంద్రబిందువుగా మారుతున్నారు. నియోజకవర్గాల్లో పట్టు సాధించే క్రమంలో కొందరు వ్యక్తిగత ప్రతిష్టకు పోతుండగా, మరికొందరు అధికారులపై ఒత్తిడి తీసుకురావడం, స్థానిక సెటిల్మెంట్లలో తలదూర్చడం వంటి ఫిర్యాదులు వెల్లువెత్తుతున్నాయి. ఇక అరవ శ్రీధర్ వంటి వారి వ్యక్తిగత వ్యవహారాలు పార్టీకి అంటుతున్నాయి. ఈ తరహా ప్రవర్తన పార్టీ పట్ల ప్రజల్లో ఉన్న సానుకూలతను దెబ్బతీసే ప్రమాదం కనిపిస్తోంది.
వ్యాపారాలు.. దందాల ఆరోపణలు
కొందరు ఎమ్మెల్యేలు తమ వ్యాపార ప్రయోజనాల కోసం అధికార బలంతో రంగంలోకి దిగుతున్నారనే విమర్శలు వినిపిస్తున్నాయి. రియల్ ఎస్టేట్ వ్యవహారాలు, స్థానిక కాంట్రాక్టులు, ఇసుక తదితర అంశాల్లో జోక్యం పెరిగిందని సొంత పార్టీ శ్రేణులే అంతర్గతంగా చర్చించుకుంటున్నాయి. టీడీపీలో గతంలో కొందరు నేతలు ఎలాగైతే అతిగా వ్యవహరించి పార్టీకి చెడ్డపేరు తెచ్చారో, ఇప్పుడు జనసేనలోనూ అదే ధోరణి కనిపిస్తుండటం కార్యకర్తలను ఆందోళనకు గురిచేస్తోంది. పార్టీ క్రమశిక్షణ విషయంలో పవన్ కల్యాణ్ కచ్చితంగా ఉంటారని భావించినప్పటికీ, క్షేత్రస్థాయిలో పరిస్థితులు భిన్నంగా ఉండటం గమనార్హం.
పవన్ మౌనం.. వ్యూహాత్మకమా?
తమ పార్టీ నేతల తీరుపై పవన్ కల్యాణ్ ఇప్పటి వరకు బహిరంగంగా హెచ్చరికలు జారీ చేయలేదు. కూటమి ప్రభుత్వంలో భాగస్వామిగా ఉన్నందున, పాలనపై దృష్టి పెట్టిన పవన్.. సొంత పార్టీ ఎమ్మెల్యేల వ్యవహారశైలిని గమనిస్తూనే ఉన్నారని సన్నిహిత వర్గాలు చెబుతున్నాయి. అయితే, ఆయన గట్టిగా మందలించకపోవడం వల్లే కొందరు నేతలు రెచ్చిపోతున్నారనే వాదన ఉంది. ముఖ్యమంత్రి చంద్రబాబు నాయుడు తన పార్టీ ఎమ్మెల్యేలకు తరచూ క్లాస్లు తీసుకుంటూ హెచ్చరిస్తున్న తరహాలోనే, పవన్ కల్యాణ్ కూడా ఒక స్పష్టమైన గీత గీయాల్సిన సమయం ఆసన్నమైంది. వివాదాస్పద నేతలను పిలిచి వ్యక్తిగతంగా మాట్లాడటంతో పాటు, పార్టీ ఇమేజ్ను దెబ్బతీస్తే సహించేది లేదని కఠిన సందేశం పంపాలి. లేనిపక్షంలో, ఈ వివాదాలు ముదిరి పాకాన పడితే రాబోయే రోజుల్లో ప్రతిపక్షాలకు బలమైన ఆయుధాలుగా మారతాయన్న ఆందోళన జనసేన పెద్దల్లో ఉంది.