తెలంగాణ రాజకీయాల్లో సంచలనం సృష్టించిన ఫార్ములా ఈ రేసు వివాదం ఇప్పుడు కీలక మలుపు తిరిగింది. మాజీ మంత్రి, బీఆర్ఎస్ వర్కింగ్ ప్రెసిడెంట్ కేటీఆర్పై ఏసీబీ దాఖలు చేసిన ఛార్జ్షీట్ను కోర్టు విచారణకు స్వీకరించడం పెను ప్రకంపనలు సృష్టిస్తోంది.
ఏసీబీ చార్జ్షీట్ పక్కా
ఫార్ములా ఈ రేసు నిర్వహణలో జరిగిన ఆర్థిక అక్రమాలపై ఏసీబీ అధికారులు లోతైన దర్యాప్తు జరిపి సమర్పించిన అభియోగపత్రాన్ని ఏసీబీ ప్రత్యేక కోర్టు తాజాగా పరిగణనలోకి తీసుకుంది. ఈ కేసులో కేటీఆర్ను ఏ1 గా పేర్కొంటూ, ఆయనతో పాటు మాజీ ఐఏఎస్ అధికారి అరవింద్ కుమార్, బీఎల్ఎన్ రెడ్డిలకు కోర్టు సమన్లు జారీ చేసింది. జూలై 31న విచారణకు వ్యక్తిగతంగా హాజరు కావాలని న్యాయస్థానం ఆదేశించడంతో, ఈ వివాదం కేవలం రాజకీయ ఆరోపణల స్థాయి నుంచి న్యాయపరమైన విచారణ దశకు చేరుకుంది.
హడావుడి వద్దు.. నేరుగా శిక్షే టార్గెట్!
సాధారణంగా ఇలాంటి కీలక కేసుల్లో అరెస్టుల కోసం హడావుడి చేయడం, ఆ తర్వాత బెయిల్పై బయటకు రావడం వంటి పరిణామాలు చూస్తుంటాం. కానీ, రేవంత్ రెడ్డి ప్రభుత్వం ఈ విషయంలో భిన్నమైన వ్యూహాన్ని అమలు చేస్తున్నట్లు కనిపిస్తోంది. కేవలం కక్ష సాధింపు కోసం అరెస్టులు చేశారనే ముద్ర పడకుండా, పక్కా సాక్ష్యాధారాలతో నేరాన్ని నిరూపించి, న్యాయపరంగా దోషులను జైలుకు పంపాలన్నది ప్రభుత్వ లక్ష్యంగా కనిపిస్తోంది. అందుకే ఏసీబీ అధికారుల ద్వారా పకడ్బందీగా ఆధారాలు సేకరించి, కోర్టు ద్వారానే నిందితులపై ఉచ్చు బిగిస్తున్నారు.
రూ. 55 కోట్ల నిధుల మళ్లింపు.. తేలాల్సిందే!
హైదరాబాద్లో నిర్వహించిన ఫార్ములా ఈ రేసు కోసం కేబినెట్ ఆమోదం లేకుండానే, నిబంధనలకు విరుద్ధంగా సుమారు రూ.55 కోట్ల రూపాయలను విదేశీ సంస్థకు మళ్లించారనేది ప్రధాన ఆరోపణ. ముఖ్యంగా ఎన్నికల కోడ్ అమల్లో ఉన్న సమయంలో, అధికారులపై ఒత్తిడి తెచ్చి మరీ ఈ నిధులను బదిలీ చేయించడంలో కేటీఆర్ కీలక పాత్ర పోషించారని ఏసీబీ తన ఛార్జ్షీట్లో ఆధారాలతో సహా పేర్కొన్నట్లు తెలుస్తోంది. ఈ నిధుల మళ్లింపు వల్ల ప్రభుత్వ ఖజానాకు గండి పడటమే కాకుండా, అదనంగా ట్యాక్సుల భారం కూడా పడిందని అధికారులు నిర్ధారించారు.
రాజకీయంగా కేటీఆర్కు బిగ్ షాక్
కోర్టు ఛార్జ్షీట్ను స్వీకరించడం అంటే ప్రాథమికంగా నేరం జరిగినట్లు ఆధారాలు ఉన్నాయని భావించడమే. జూలై 31న కేటీఆర్ కోర్టుకు హాజరు కావాల్సి ఉండటం ఆయన రాజకీయ భవిష్యత్తుపై ప్రభావం చూపే అవకాశం ఉంది. ఇప్పటివరకు దీనిని రాజకీయ కక్ష సాధింపు గా కొట్టిపారేసిన బీఆర్ఎస్ నేతలు, ఇప్పుడు న్యాయస్థానం జారీ చేసిన సమన్లకు ఏం సమాధానం చెబుతారనేది ఆసక్తికరంగా మారింది. ఒకవైపు ఫోన్ ట్యాపింగ్ కేసు, మరోవైపు ఈ రేసు వివాదం.. ఇలా వరుస కేసులు కేటీఆర్ను ఉక్కిరిబిక్కిరి చేస్తున్నాయి.