ఆంధ్రప్రదేశ్‌లో పారిశ్రామికాభివృద్ధి కేవలం శంకుస్థాపనలకే పరిమితం కాకుండా, రికార్డు వేగంతో ప్రాజెక్టులను పూర్తి చేయడంలో సరికొత్త రికార్డులు సృష్టిస్తోంది.

ప్రముఖ పునరుత్పాదక ఇంధన సంస్థ ఎస్ఏఈఎల్ రాయలసీమలో నిర్మించిన మెగా సోలార్ ప్రాజెక్టు దీనికి ఒక అద్భుతమైన ఉదాహరణగా నిలిచింది. ఈ ప్రతిష్టాత్మక ప్రాజెక్టును మే 22న ప్రారంభించనున్నారు. ఈ విషయాన్ని రాష్ట్ర ఐటీ, పారిశ్రామిక శాఖ మంత్రి నారా లోకేష్ ట్విట్టర్ వేదికగా గర్వంగా పంచుకున్నారు.

ఈ మెగా ప్రాజెక్టుకు సంబంధించి ఆంధ్రప్రదేశ్ ప్రభుత్వం , ఎస్ఏఈఎల్ సంస్థల మధ్య గతంలో **రూ. 22,000 కోట్ల పెట్టుబడుల కోసం అవగాహన ఒప్పందం కుదిరింది. ఇందులో భాగంగా కడప-కర్నూలు బెల్ట్‌లో భారీ ఎత్తున సోలార్, బయోమాస్, బ్యాటరీ స్టోరేజ్ సిస్టమ్స్‌ను నిర్మించాలని ప్రణాళికలు సిద్ధం చేశారు. ఈ భారీ ఒప్పందంలో మొదటి మైలురాయిగా, కడప , కర్నూలు సరిహద్దు ప్రాంతాల్లో 2,400 ఎకరాలకు పైగా విస్తీర్ణంలో ఈ సోలార్ ప్లాంట్ నిర్మాణాన్ని చేపట్టారు.

కేవలం 11 నెలల రికార్డు కాలంలోనే సుమారు 3,000 కోట్ల పెట్టుబడితో 600 మెగావాట్ల సామర్థ్యం గల ఈ సోలార్ ప్రాజెక్టును పూర్తి చేశారు. ఈ ప్లాంట్‌లో అత్యాధునిక సాంకేతికత కలిగిన 12 లక్షలకు పైగా టాప్‌కాన్ బైఫేషియల్ సోలార్ మాడ్యూల్స్‌ను ఉపయోగించారు. ఇవి రెండు వైపులా సూర్యరశ్మిని గ్రహించి ఎక్కువ విద్యుత్‌ను ఉత్పత్తి చేస్తాయి. ఈ ప్రాజెక్టు ద్వారా ఉత్పత్తి అయ్యే గ్రీన్ ఎనర్జీని నేరుగా నేషనల్ గ్రిడ్‌కు అనుసంధానించనున్నారు, దీనికోసం సోలార్ ఎనర్జీ కార్పొరేషన్ ఆఫ్ ఇండియా తో 25 ఏళ్ల పాటు ఒప్పందం కూడా కుదిరింది.