జూన్లో ఏపీ నుంచి నాలుగు రాజ్యసభ స్థానాలు ఖాళీ అవుతున్నాయి. అందులో టీడీపీకి రెండే దక్కుతాయన్న ప్రచారం జరుగుతోంది. ఎంతో మంది సీనియర్లు , యువనేతలు ఆశలు పెట్టుకున్న ఎంపీ సీట్లను మిత్రపక్షాల కోసం త్యాగం చేయాల్సి రావడంపై తెలుగుదేశం పార్టీ శ్రేణుల్లో ఒక రకమైన అసంతృప్తి వ్యక్తమవుతోంది.
రాజ్యసభ సీట్ల కోసం బీజేపీ పెద్దల ఒత్తిడి
ఆంధ్రప్రదేశ్లో అధికారికంగా ఉన్న బలాన్ని బట్టి చూస్తే రాజ్యసభ స్థానాలన్నీ టీడీపీ ఖాతాలోకే వెళ్లాలి. కానీ, కూటమి ధర్మాన్ని పాటించడం, జాతీయ స్థాయిలో నెలకొన్న రాజకీయ సమీకరణాల వల్ల చంద్రబాబు నాయుడు వరుసగా త్యాగాలు చేయాల్సి వస్తోంది. ఇప్పటికే ఎమ్మెల్సీ సీట్లను జనసేన, బీజేపీలకు కేటాయించిన చంద్రబాబు.. ఇప్పుడు ఖాళీ అవుతున్న రాజ్యసభ స్థానాల్లో కూడా మిత్రపక్షాలకు పెద్దపీట వేయక తప్పని పరిస్థితి ఏర్పడింది. బీజేపీకి ఇప్పటికే ఒక సీటు ఖరారు కాగా, మరో సీటు కోసం జనసేన నుంచి ఒత్తిడి పెరుగుతోంది.
టీడీపీ సీనియర్ నేతల్లో నిరాశ
ఈ పరిణామాలు టీడీపీలోని సీనియర్ నాయకులను తీవ్ర నిరాశకు గురిచేస్తున్నాయి. పార్టీ కష్టకాలంలో ఉన్నప్పుడు, ఐదేళ్లూ క్షేత్రస్థాయిలో పోరాడిన ఎందరో సీనియర్లు ఇప్పుడు పార్లమెంట్లో అడుగుపెట్టాలని ఆశపడుతున్నారు. అయితే, దక్కే నాలుగు సీట్లలో రెండు మిత్రపక్షాలకే పోతే, పార్టీ కోసం పనిచేసిన వారికి కేవలం రెండు స్థానాలు మాత్రమే మిగులుతాయి. రాష్ట్రానికి ప్యాకేజీలు, నిధులు తేవాలనే సాకుతో బీజేపీ రాజకీయం చేస్తోందని వారికి క్లారిటీ ఉంది.
పదవులు కాదు రాష్ట్ర ప్రయోజనాలే చంద్రబాబు ఫార్ములా
చంద్రబాబు నాయుడు ఆలోచనా విధానం మరోలా ఉంది. ఆయనకు రాజకీయ పదవుల పెంపకం కంటే ప్రస్తుతం కేంద్రం నుంచి రాష్ట్రానికి రావాల్సిన నిధులు, అమరావతి నిర్మాణానికి సహకారం, పోలవరం ప్రాజెక్టు పూర్తి వంటి అంశాలే అత్యంత ప్రధానంగా కనిపిస్తున్నాయి. కేంద్రంలోని మోదీ ప్రభుత్వంతో సత్సంబంధాలు ఉంటేనే ఏపీ ఆర్థిక సంక్షోభం నుంచి గట్టెక్కుతుందని ఆయన నమ్ముతున్నారు. అందుకే, పార్టీ నేతలకు అన్యాయం జరుగుతుందని తెలిసినా, భవిష్యత్తు ప్రయోజనాలను దృష్టిలో పెట్టుకుని జాతీయ పార్టీల డిమాండ్లకు ఆయన తలొగ్గుతున్నట్లు భావిస్తున్నారు.
టీడీపీ క్యాడర్కు సర్ది చెప్పడం కష్టమే
ఈ త్యాగాల రాజకీయం కూటమి ఐక్యతకు తాత్కాలికంగా మేలు చేయవచ్చు కానీ, లాంగ్ రన్లో టీడీపీ కేడర్ మనోధైర్యాన్ని దెబ్బతీసే ప్రమాదం ఉంది. తాము కష్టపడి గెలిపిస్తే పదవులు మాత్రం ఇతరుల పాలవుతున్నాయనే భావన క్షేత్రస్థాయి నాయకుల్లో పెరిగితే అది పార్టీ ఉనికికే నష్టం చేస్తుంది. చంద్రబాబు నాయుడు ఈ అసంతృప్తిని ఎలా చల్లారుస్తారు, పదవులు కోల్పోయిన సీనియర్లకు నామినేటెడ్ పదవుల ద్వారా ఎలా న్యాయం చేస్తారనేదే కీలకం.