బిర్యానీ అనగానే మనందరికీ ముందుగా గుర్తొచ్చేది ఆ ఘుమఘుమలాడే వాసన, నోరూరించే రుచి. ప్రపంచవ్యాప్తంగా కోట్లాది మందికి ఇష్టమైన ఈ వంటకం కేవలం ఆహారం మాత్రమే కాదు, అదొక ఎమోషన్.

అయితే బిర్యానీ తినడం వల్ల మన శరీరానికి కలిగే లాభనష్టాల గురించి ఎప్పుడైనా ఆలోచించారా? బిర్యానీని మితంగా, సరైన పద్ధతిలో తింటే అది ఆరోగ్యానికి మేలు చేస్తుంది.

బిర్యానీలో ఉపయోగించే అల్లం, వెల్లుల్లి, దాల్చినచెక్క, లవంగాలు, యాలకులు వంటి మసాలా దినుసులు సహజమైన యాంటీ ఆక్సిడెంట్లను కలిగి ఉండి, జీర్ణక్రియను మెరుగుపరచడమే కాకుండా శరీరంలో వాపులను తగ్గిస్తాయి. ముఖ్యంగా కుంకుమపువ్వు, పసుపు వంటివి రోగనిరోధక శక్తిని పెంచడానికి దోహదపడతాయి. మాంసాహార బిర్యానీ ద్వారా శరీరానికి అవసరమైన ప్రోటీన్లు, విటమిన్ B12 సమృద్ధిగా అందుతాయి. ఇవన్నీ ఆరోగ్యానికి సానుకూల అంశాలుగా చెప్పుకోవచ్చు.

అయితే, బిర్యానీని అమితంగా తీసుకోవడం వల్ల కొన్ని ఇబ్బందులు తప్పవు. సాధారణంగా బిర్యానీలో కేలరీలు, కొవ్వు పదార్థాలు చాలా ఎక్కువగా ఉంటాయి. దీనివల్ల బరువు పెరిగే అవకాశం ఎక్కువగా ఉంటుంది. ముఖ్యంగా హోటళ్లలో దొరికే బిర్యానీలలో నూనె, నెయ్యి, ఉప్పు అధికంగా వాడటం వల్ల రక్తపోటు పెరగడం, గుండె సంబంధిత సమస్యలు తలెత్తే ప్రమాదం ఉంది. తరచుగా బిర్యానీ తినడం వల్ల గ్యాస్ట్రిక్ సమస్యలు, ఎసిడిటీ, మలబద్ధకం వంటివి ఇబ్బంది పెడతాయి.

బిర్యానీలో వాడే పాలిష్ చేసిన బాస్మతీ బియ్యం రక్తంలో చక్కెర స్థాయిలను త్వరగా పెంచుతుంది కాబట్టి మధుమేహం ఉన్నవారు చాలా జాగ్రత్తగా ఉండాలి. చివరగా, బిర్యానీ అనేది ఒక అద్భుతమైన రుచికరమైన భోజనం అనడంలో సందేహం లేదు, కానీ అది ఆరోగ్యానికి వరమా లేదా శాపమా అనేది మనం తీసుకునే పరిమాణం మీద, వాడే నాణ్యమైన పదార్థాల మీద ఆధారపడి ఉంటుంది. వారానికి ఒకసారి ఇంట్లో వండుకున్న బిర్యానీని మితంగా ఆస్వాదించడం వల్ల పెద్దగా నష్టం ఉండదు కానీ, అతిగా తింటే మాత్రం అనారోగ్యానికి ఆహ్వానం పలికినట్లే అవుతుంది.

సోర్స్: ఇండియాహెరాల్డ్.కామ్ - Reddy P Rajasekhar