తెలంగాణలో త్వరలో జరగనున్న రెండు పట్టభద్రుల ఎమ్మెల్సీ ఎన్నికలను సవాల్ గా తీసుకుంది ప్రతిపక్ష కాంగ్రెస్ పార్టీ. ఇటీవల వరుసగా ఎదురవుతున్న పరాజయాల నుంచి బయటపడి .. పార్టీలో మళ్లీ జోష్ నింపేందుకు మండలి ఎన్నికలను అస్త్రంగా మలుచుకోవాలని ప్లాన్ చేస్తోంది. కేసీఆర్ సర్కార్ పై నిరుద్యోగులు, ఉద్యోగులు తీవ్ర వ్యతిరేకంగా ఉండటం.. మండలి ఎన్నికల్లో మెజార్టీ ఓటర్లు వారే కావటంతో గెలుపుపై ఆశలు పెట్టుకుంది తెలంగాణ కాంగ్రెస్. కరీంనగర్- ఆదిలాబాద్-నిజామాబాద్- మెదక్ పట్టభద్రుల సీటుకు గత ఏడాది జరిగిన ఎన్నికలో కాంగ్రెస్ అభ్యర్థిగా పోటీ చేసిన జీవన్ రెడ్డి ఘన విజయం సాధించారు. దీంతో ఈ రెండు సీట్లలోనూ తమకు గెలుపు అవకాశాలు ఎక్కువగా ఉన్నాయని తెలంగాణ కాంగ్రెస్ నేతలు అంచనా వేస్తున్నారు.

అందుకే అన్ని రకాలుగా సమీక్షించిన తర్వాతే అభ్యర్థులను ఎంపిక చేసినట్లు తెలుస్తోంది.

శాసనమండలి ఎన్నికల్లో అభ్యర్థుల ఎంపికకు సంబంధించి ఎమ్మెల్సీ జీవన్ రెడ్డి నాయకత్వంలో కమిటిని నియమించారు. జీవన్ రెడ్డి కమిటి... ఎన్నికలు జరగనున్న ప్రాంతాల్లోని పార్టీ నేతల అభిప్రాయాలు సేకరించిన తర్వాత.. అభ్యర్థుల ఎంపికపై క్లారిటీకి వచ్చినట్లు తెలుస్తోంది. ఎమ్మెల్సీ ఎన్నికలకు అభ్యర్థులను ఎంపిక చేయడంలో పార్టీ రాష్ట్ర వ్యవహారాల ఇంచార్జ్ మాణిక్కం ఠాగూర్ కూడా పరిశీలన చేస్తున్నట్లు సమాచారం.

హైదరాబాద్, రంగారెడ్డి, మహబూబ్నగర్ స్థానానికి మాజీ మంత్రి చిన్నారెడ్డికి అవకాశం ఇస్తున్నారని చెప్పుకుంటున్నారు. ఇక్కడి నుంచి పోటీ చేసేందుకు మాజీ ఎమ్మెల్యే వంశీచంద్రెడ్డితో పాటు పలువురు నేతలున్నారు.

అయితే వంశి, చిన్నారెడ్డి పేర్లను పరిశీలించిన హైకమాండ్... చిన్నారెడ్డి పేరును ఖరారు చేసినట్లు చెబుతున్నారు. వంశీ యువకుడు అయినందున.. ఆయనకు భవిష్యత్ లో మంచి అవకాశాలు ఇస్తామని హామీ ఇచ్చినట్లు తెలుస్తోంది. ఇక వరంగల్, ఖమ్మం, నల్గొండ పట్టబద్రుల స్థానం నుంచి మాజీ ఎమ్మెల్సీ రాములు నాయక్ను పోటీకి దింపుతారని భావిస్తున్నారు. ఈ స్థానం నుంచి ఏఐసీసీ జాతీయ అధికార ప్రతినిధి దాసోజు శ్రవణ్, విద్యార్థి నాయకుడు మానవతారాయ్ పలువురు పోటీ పడుతున్నారు. అయితే తనకు మరో రెండు పదవి కాలం ఉన్నా... టీఆర్ఎస్ రాజీనామా చేసి కాంగ్రెస్ లో చేరారు రాములు నాయక్.దీంతో అతనికే అవకాశం ఇవ్వాలని దాదాపుగా నిర్ణయించారని గాంధీభవన్ వర్గాల సమాచారం.