తమిళనాడు అసెంబ్లీ ఎన్నికలు 2026లో దళపతి విజయ్ స్థాపించిన తమిళగ వెట్రి కళగం పార్టీ చారిత్రాత్మక విజయాన్ని నమోదు చేసింది. తొలిసారి ఎన్నికల బరిలోకి దిగిన విజయ్, ఏకంగా అతిపెద్ద పార్టీగా అవతరించి కొత్త చరిత్రను లిఖించారు.

ఈ ఎన్నికల్లో ఆయన పెరంబూర్ మరియు తిరుచ్చి ఈస్ట్ రెండు నియోజకవర్గాల నుండి పోటీ చేసి భారీ మెజారిటీతో ఘన విజయం సాధించి తన రాజకీయ సత్తా చాటారు.

​ఈ అద్భుత విజయంపై టాలీవుడ్ సూపర్ స్టార్ మహేష్ బాబు తన మిత్రుడు విజయ్‌కు ‘X’ వేదికగా ప్రత్యేక శుభాకాంక్షలు తెలిపారు. “కొత్త బెంచ్‌మార్క్‌లను సెట్ చేస్తూ అద్భుత విజయాన్ని అందుకున్నందుకు అభినందనలు. ప్రజలు నీపై ఉంచిన నమ్మకానికి ఈ గెలుపు నిదర్శనం. ఈ విజయం తమిళనాడులో అర్థవంతమైన అభివృద్ధికి దారితీస్తుందని నమ్ముతున్నాను” అంటూ మహేష్ బాబు ఆకాంక్షించారు.

​మహేష్ బాబు మరియు విజయ్ మధ్య గత దశాబ్దాలుగా మంచి స్నేహబంధం కొనసాగుతోంది. వీరిద్దరి సినిమాలు పరస్పరం రీమేక్ అయ్యి రెండు భాషల్లోనూ ఘనవిజయాలు సాధించిన సందర్భాలు ఉన్నాయి. ఇప్పుడు రాజకీయాల్లో విజయ్ సాధించిన ఈ సంచలన విజయంపై మహేష్ బాబు స్పందించడం పట్ల ఇద్దరు స్టార్ హీరోల అభిమానులు సామాజిక మాధ్యమాల్లో సంతోషం వ్యక్తం చేస్తున్నారు.