ఢిల్లీ వేదికగా జనసేన పార్టీ నిర్వహించిన 'సేన ప్రస్థానం.. జాతీయ సమైక్యత కోసం' కార్యక్రమంలో పార్టీ అధ్యక్షుడు, ఆంధ్రప్రదేశ్ ఉపముఖ్యమంత్రి శ్రీ పవన్ కళ్యాణ్ కీలక ప్రసంగం చేశారు.

పార్టీ ఆవిర్భావం నుంచి జనసేన ప్రయాణం అధికారం లేదా పదవుల కోసం కాదని, దేశానికి సేవ చేయాలనే లక్ష్యంతోనే ప్రారంభమైందని ఆయన స్పష్టం చేశారు.

2014లో జనసేన పార్టీని స్థాపించినప్పుడు రాజకీయ లాభాలు లేదా అధికారాన్ని దృష్టిలో పెట్టుకోలేదని, దేశ సమైక్యత, సమగ్రతను కాపాడాలనే ఆలోచనే పార్టీకి పునాది అని పవన్ కళ్యాణ్ తెలిపారు. ప్రస్తుతం పార్టీ సిద్ధాంతాలు, భావజాలం బలపడుతున్నాయని, ఇతర రాష్ట్రాల నుంచి కూడా జనసేన కోసం పని చేయడానికి ప్రజలు ముందుకు రావడం ఆ దిశగా సానుకూల సంకేతమని పేర్కొన్నారు.

దేశ ప్రయోజనాలే జనసేనకు అత్యంత ప్రాధాన్యమని ఆయన అన్నారు. తెలంగాణ రాష్ట్ర ఏర్పాటును జనసేన ఎప్పుడూ వ్యతిరేకించలేదని, అయితే కాంగ్రెస్ పార్టీ విభజనను అమలు చేసిన విధానాన్ని మాత్రమే ప్రశ్నించామని చెప్పారు. విభజన ప్రక్రియలో జరిగిన లోపాల కారణంగానే ఇప్పటికీ రెండు తెలుగు రాష్ట్రాల మధ్య కొన్ని సమస్యలు, విభేదాలు కొనసాగుతున్నాయని అభిప్రాయపడ్డారు.

ఢిల్లీలో కార్యక్రమాన్ని నిర్వహించడానికి ప్రత్యేక కారణం ఉందని పవన్ కళ్యాణ్ వివరించారు. దేశ రాజధాని చరిత్ర, త్యాగాలు, పాలనా విలువలు, రాజ్యాంగ స్ఫూర్తికి ప్రతీకగా నిలిచిందని చెప్పారు. అలాంటి ప్రాముఖ్యత కలిగిన నేలపై దేశ సమగ్రత కోసం సమావేశం నిర్వహించడం ద్వారా జనసేన దేశభక్తికి ఎంత ప్రాధాన్యం ఇస్తుందో తెలియజేయాలనుకున్నామని పేర్కొన్నారు.

దేశం, జాతి సమగ్రతకు వ్యతిరేకంగా పనిచేసే శక్తులను జనసేన ఎప్పటికీ ఉపేక్షించదని ఆయన హెచ్చరించారు. విభజనవాదాన్ని ప్రోత్సహించే వారిపై పార్టీ గళం ఎప్పుడూ బలంగానే ఉంటుందని అన్నారు. ఢిల్లీని జనసేన పార్టీ ఎప్పుడూ అధికారం లేదా పదవుల కోసం ఉపయోగించుకోదని, దేశభక్తి, జాతీయ సమైక్యత, సమగ్రత వంటి విలువల కోసమే దేశ రాజధాని బాట పడుతుందని స్పష్టం చేశారు.