ఆంధ్రప్రదేశ్ రాష్ట్ర ఖజానాకు ఆదాయ ప్రవాహం మరింత బలపడుతోంది. రాష్ట్రంలో ఆర్థిక కార్యకలాపాలు వేగం పుంజుకోవడంతో పాటు పన్నుల వసూళ్లలో పారదర్శకత పెరగడం వల్ల 2026 మే నెలలో రికార్డు స్థాయిలో ఆదాయం నమోదైంది.

గత ఏడాదితో పోలిస్తే మొత్తం పన్నుల వసూళ్లు 19 శాతం పెరిగి రూ.4,950 కోట్లకు చేరుకున్నాయి. 2025 మే నెలలో రాష్ట్రానికి రూ.4,165 కోట్ల ఆదాయం రాగా, ఈసారి అదనంగా రూ.737 కోట్ల మేర ఆదాయం సమకూరింది.

వాణిజ్య పన్నుల శాఖ చీఫ్ కమిషనర్ బాబు ఏ. విడుదల చేసిన వివరాల ప్రకారం, జీఎస్టీ వసూళ్లు 16 శాతం వృద్ధితో రూ.3,037 కోట్లకు చేరుకున్నాయి. గత ఏడాది ఇదే నెలలో ఇవి రూ.2,629 కోట్లుగా నమోదయ్యాయి. అలాగే ఐజీఎస్టీ సెటిల్మెంట్ ద్వారా రాష్ట్రానికి రూ.1,758.58 కోట్లు లభించాయి. ఇది గత ఏడాదితో పోలిస్తే 15.36 శాతం అధికం.

పెట్రోలియం ఉత్పత్తులపై వ్యాట్ వసూళ్లు కూడా భారీగా పెరిగాయి. ఏకంగా 31.79 శాతం వృద్ధితో రూ.1,768.82 కోట్లకు చేరుకున్నాయి. ప్రొఫెషనల్ ట్యాక్స్ రూపంలో రూ.48.92 కోట్లు, మద్యం వ్యాట్ ద్వారా రూ.89 కోట్లు రాష్ట్ర ఖజానాకు చేరాయి.

జీఎస్టీ వసూళ్ల పరంగా ఆంధ్రప్రదేశ్ జాతీయ సగటును అధిగమించడం విశేషంగా నిలిచింది. దక్షిణాది రాష్ట్రాల్లో 17 శాతం వృద్ధితో కర్ణాటక తొలి స్థానంలో ఉండగా, 16 శాతం వృద్ధితో ఆంధ్రప్రదేశ్ రెండో స్థానాన్ని దక్కించుకుంది. కేరళ 15 శాతం, తెలంగాణ 14 శాతం, తమిళనాడు 12 శాతం వృద్ధితో తర్వాతి స్థానాల్లో నిలిచాయి.