Payyavula Keshav వైసీపీ అధినేత Y. S. Jagan Mohan Reddy వ్యాఖ్యలపై తీవ్రస్థాయిలో విరుచుకుపడ్డారు. అమరావతిలో బీజేపీ ఎంపీ C. M. Ramesh తో కలిసి నిర్వహించిన సంయుక్త మీడియా సమావేశంలో మాట్లాడిన ఆర్థిక మంత్రి పయ్యావుల కేశవ్..

ఫ్యాక్షన్ రాజకీయాలకు వైఎస్ కుటుంబమే బీజం వేసిందని, జగన్ ఆ రాజకీయాలను కొనసాగిస్తున్నారని ఆరోపించారు. జగన్ బాధితుడు కాదని, నిందితుడని తీవ్ర వ్యాఖ్యలు చేశారు.

పులివెందుల రాజకీయాల చరిత్రను ప్రస్తావించిన పయ్యావుల.. 1989 తర్వాత రాయలసీమలో ఫ్యాక్షన్ రాజకీయాలు మరింత పెరిగాయని అన్నారు. అప్పట్లో టీడీపీకి మద్దతిచ్చిన గ్రామాలపై దాడులు జరిగాయని, డైనమేట్లతో ఇళ్లను పేల్చిన ఘటనలు చోటుచేసుకున్నాయని ఆరోపించారు. ప్రత్యర్థులపై దాడులు చేయించి, అదే సమయంలో వేరే చోట ఉన్నట్టు అలిబీలు సృష్టించుకోవడం వైఎస్ కుటుంబ రాజకీయాల్లో భాగమైందని విమర్శించారు.

వివేకానంద రెడ్డి హత్య కేసు విషయంలో కూడా జగన్ అసత్యాలు చెబుతున్నారని పయ్యావుల అన్నారు. "వివేకా హత్య కేసులో ఏమైందో నిక్కరు వేసుకున్న కుర్రాడు కూడా చెబుతాడు" అంటూ ఘాటు వ్యాఖ్యలు చేశారు. గొడ్డలిపోటును గుండెపోటుగా చూపించే ప్రయత్నాలు జరిగాయని ఆరోపించారు. "ఇవాళ గొడ్డలి అంటే జగన్ ఉలిక్కిపడుతున్నారు" అంటూ విమర్శలు గుప్పించారు.

రాష్ట్రంలో భయానక రాజకీయ వాతావరణం సృష్టించే ప్రయత్నం గతంలో జరిగిందని, అచ్చెన్నాయుడు అరెస్ట్ నుంచి చంద్రబాబు అరెస్ట్ వరకు అదే ధోరణి కనిపించిందని పయ్యావుల పేర్కొన్నారు. వ్యవస్థలపై, పోలవరంపై, పరిశ్రమలపై "గొడ్డలి వేటు" వేసిందని వైసీపీ ప్రభుత్వాన్ని విమర్శిస్తూ.. అందుకే దాన్ని "గొడ్డలి పార్టీ"గా ప్రజలు చూస్తున్నారని వ్యాఖ్యానించారు.

యువత భవిష్యత్తుపై కూడా పయ్యావుల ఆందోళన వ్యక్తం చేశారు. యువకులు రాజకీయ నాయకుల చరిత్రను తెలుసుకోవాల్సిన అవసరం ఉందన్నారు. చంద్రబాబు పరిశ్రమలు తీసుకువచ్చి ఉద్యోగాలు కల్పించే ప్రయత్నం చేస్తుంటే, జగన్ పాలనలో పెట్టుబడులు వెనక్కి వెళ్లాయని ఆరోపించారు. ప్రస్తుతం 800 కంపెనీలను గ్రౌండ్ చేయబోతున్నామని, రాష్ట్రంలో ఉపాధి అవకాశాలను పెంచే దిశగా ప్రభుత్వం చర్యలు తీసుకుంటోందని తెలిపారు.