N. Chandrababu Naidu మరోసారి దేశవ్యాప్తంగా చర్చకు దారితీసే కీలక ప్రకటన చేశారు. ఒకప్పుడు జనాభా నియంత్రణకు ప్రాధాన్యం ఇచ్చిన నాయకుడిగా గుర్తింపు పొందిన చంద్రబాబు… ఇప్పుడు మారిన సామాజిక, ఆర్థిక పరిస్థితులను దృష్టిలో పెట్టుకుని "పిల్లలు భారం కాదు… భవిష్యత్తు సంపద" అనే కొత్త ఆలోచనతో ముందుకు వస్తున్నారు.

శ్రీకాకుళం జిల్లా నరసన్నపేటలో నిర్వహించిన స్వర్ణాంధ్ర - స్వచ్ఛ ఆంధ్ర కార్యక్రమంలో ఆయన చేసిన వ్యాఖ్యలు ఇప్పుడు రాజకీయంగానే కాదు… ఆర్థిక, సామాజిక వర్గాల్లో కూడా చర్చనీయాంశంగా మారాయి.

ప్రస్తుతం ఆంధ్రప్రదేశ్ ఎదుర్కొంటున్న అతిపెద్ద సవాల్ వృద్ధాప్య జనాభా వేగంగా పెరగడమేనని ప్రభుత్వం భావిస్తోంది. సాధారణంగా 15 నుంచి 64 ఏళ్ల మధ్య పనిచేసే వయసు గల జనాభా ఎక్కువగా ఉంటే దానిని "డెమోగ్రాఫిక్ డివిడెండ్"గా పరిగణిస్తారు. ఇదే ఒక రాష్ట్ర ఆర్థిక వ్యవస్థను వేగంగా ముందుకు నడిపించే ప్రధాన బలం. కానీ గత 30 ఏళ్లలో ఏపీలో సంతానోత్పత్తి రేటు 3.0 నుంచి 1.5కి పడిపోవడం ఆందోళన కలిగిస్తోంది. జనాభా స్థిరంగా కొనసాగాలంటే కనీసం 2.1 టోటల్ ఫెర్టిలిటీ రేటు అవసరమని నిపుణులు చెబుతున్నారు. ప్రస్తుతం ఏపీ సగటు వయస్సు 32.5 ఏళ్లకు చేరుకోగా… ఇది దేశ సగటు 28.4 ఏళ్ల కంటే గణనీయంగా ఎక్కువ. అంటే ఇతర రాష్ట్రాల కంటే ఆంధ్రప్రదేశ్ వేగంగా వృద్ధాప్యం వైపు వెళ్తోందని అర్థం.

ఈ పరిస్థితి ఇలాగే కొనసాగితే 2040 నాటికి పనిచేసే యువ జనాభా తగ్గిపోవడంతో పాటు… వృద్ధుల భారం రాష్ట్ర ఆర్థిక వ్యవస్థపై తీవ్ర ప్రభావం చూపే ప్రమాదం ఉందని ఆరోగ్య శాఖ గణాంకాలు సూచిస్తున్నాయి. ముఖ్యంగా భవిష్యత్తులో పారిశ్రామికాభివృద్ధి, టెక్నాలజీ రంగం, తయారీ పరిశ్రమలకు భారీగా నైపుణ్యంతో కూడిన మానవ వనరులు అవసరం అవుతాయని ప్రభుత్వం అంచనా వేస్తోంది. ఈ నేపథ్యంలోనే జనాభాను సమస్యగా కాకుండా… ఆర్థిక శక్తిగా మార్చే దిశగా చంద్రబాబు కొత్త వ్యూహాన్ని సిద్ధం చేస్తున్నారు.

ఇందులో భాగంగా ఇప్పటికే కీలక నిర్ణయాలకు శ్రీకారం చుట్టారు. గతంలో మూడో సంతానం ఉంటే స్థానిక ఎన్నికల్లో పోటీకి అనర్హులనే నిబంధనను కూటమి ప్రభుత్వం రద్దు చేసింది. ఇప్పుడు జనాభా పెంపునకు ప్రత్యక్ష ప్రోత్సాహకాలు ప్రకటిస్తోంది. కుటుంబంలో మూడో బిడ్డ జన్మిస్తే ₹30,000, నాలుగో బిడ్డ జన్మిస్తే ₹40,000 తక్షణ నగదు ప్రోత్సాహకం అందిస్తామని సీఎం ప్రకటించారు. అంతేకాదు… గతంలో రెండో బిడ్డకు కూడా ₹25,000 ప్రోత్సాహకం ఇవ్వాలనే ప్రతిపాదన వచ్చిన విషయాన్ని గుర్తు చేస్తూ… త్వరలో పూర్తి స్థాయి "పాపులేషన్ మేనేజ్‌మెంట్ పాలసీ" తీసుకురానున్నట్లు స్పష్టం చేశారు.

కేవలం నగదు సహాయం వరకే ఈ ప్రణాళిక పరిమితం కావడం లేదు. పిల్లల పెంపకం, పోషణ, విద్య, ఆరోగ్య బాధ్యతల్లో కూడా ప్రభుత్వం భాగస్వామ్యం కానుంది. మూడో బిడ్డకు ఐదేళ్ల పాటు ప్రతి నెల ₹1,000 పోషకాహార భత్యం ఇవ్వాలని ప్రతిపాదిస్తున్నారు. అలాగే 18 ఏళ్ల వరకు ఉచిత విద్య అందించే అంశాన్ని కూడా పరిశీలిస్తున్నారు. ఉద్యోగుల కోసం 12 నెలల ప్రసూతి సెలవులతో పాటు… 2 నెలల పితృత్వ సెలవులు ఇవ్వాలనే ఆలోచన కూడా ప్రభుత్వ స్థాయిలో చర్చలో ఉంది. సంతానలేమితో బాధపడే దంపతుల కోసం ప్రభుత్వ ఆసుపత్రుల్లో PPP విధానంలో ఉచిత IVF సేవలు అందించేందుకు "మెటర్నిటీ సెంటర్ ఆఫ్ ఎక్సలెన్స్" ఏర్పాటు చేయాలని ప్రభుత్వం ప్రణాళికలు సిద్ధం చేస్తోంది.

ఈ నిర్ణయాల వెనుక కేవలం జనాభా పెంపు మాత్రమే కాదు… బలమైన రాజకీయ లెక్కలు కూడా ఉన్నాయని విశ్లేషకులు చెబుతున్నారు. 2026 తర్వాత దేశంలో జరగబోయే నియోజకవర్గాల పునర్విభజన జనాభా ఆధారంగా జరిగితే… గతంలో జనాభా నియంత్రణను కఠినంగా అమలు చేసిన ఆంధ్రప్రదేశ్, తెలంగాణ సహా దక్షిణాది రాష్ట్రాలు పార్లమెంట్‌లో తమ ప్రాతినిధ్యాన్ని కోల్పోయే ప్రమాదం ఉంది. మరోవైపు ఉత్తరాది రాష్ట్రాల్లో ఇప్పటికీ జనాభా వృద్ధి రేటు ఎక్కువగానే ఉండటంతో అక్కడ సీట్లు పెరిగే అవకాశం ఉంది. దీంతో దక్షిణాది రాష్ట్రాల రాజకీయ బలం తగ్గే ప్రమాదాన్ని చంద్రబాబు ముందుగానే గుర్తించారని రాజకీయ వర్గాలు భావిస్తున్నాయి.