మాజీ మంత్రి, వైసీపీ నేత జోగి రమేష్ కుటుంబ వివాదం రోజురోజుకూ కొత్త మలుపులు తిరుగుతోంది. అత్తింటి వేధింపుల ఆరోపణలతో ప్రారంభమైన ఈ వ్యవహారం ఇప్పుడు రాజకీయ చర్చగా మారింది.
తాజాగా జోగి రమేష్ కోడలు మేఘనతో పాటు ఆమె కుటుంబ సభ్యులు మీడియా ముందుకు వచ్చి మరోసారి తీవ్ర ఆరోపణలు చేశారు.
మీడియాతో మాట్లాడిన మేఘన.. తనపై జోగి రమేష్ చేసిన ఆరోపణలను పూర్తిగా ఖండించారు. తన వ్యక్తిగత సమస్యకు రాజకీయ రంగు పులమడం సరికాదని అన్నారు. ముఖ్యమంత్రి చంద్రబాబు నాయుడు, మంత్రి నారా లోకేశ్ను తాను ఎప్పుడూ కలవలేదని స్పష్టం చేశారు. న్యాయం కోసం మాత్రమే ఎమ్మెల్యే వసంత కృష్ణప్రసాద్ను కలిశానని తెలిపారు.
గతంలో కూడా సమస్య పరిష్కారం కోసం వైసీపీ ప్రభుత్వ హయాంలో సజ్జల రామకృష్ణారెడ్డిని, అనంతరం ముఖ్యమంత్రి కార్యాలయాన్ని ఆశ్రయించినా తమకు న్యాయం జరగలేదని మేఘన ఆరోపించారు. ఇప్పుడు కూడా రాజకీయ కారణాలతో కాకుండా బాధితురాలిగా న్యాయం కోసం మాత్రమే ప్రజాప్రతినిధులను కలుస్తున్నానని చెప్పారు.
తన వివాహ జీవితంలో ఎదురైన ఇబ్బందులపై కూడా మేఘన పలు ఆరోపణలు చేశారు. పెళ్లి తర్వాత మత మార్పిడి కోసం ఒత్తిడి తీసుకొచ్చారని, అదనపు కట్నం కోసం వేధింపులకు గురిచేశారని ఆరోపించారు. తన భద్రత కోసం సేకరించిన వీడియోలను ఫేక్ ఏఐ వీడియోలుగా చిత్రీకరించడం బాధాకరమని అన్నారు. తనను కూతురిలా చూసుకున్నామని జోగి రమేష్ చేస్తున్న వ్యాఖ్యలను కూడా ఆమె ఖండించారు.
ఈ కేసులో తనకు చట్టపరంగా న్యాయం జరిగే వరకు వెనక్కి తగ్గేది లేదని మేఘన స్పష్టం చేశారు. తనకు విడాకులు మంజూరు చేసి ఈ సమస్య నుంచి విముక్తి కల్పించాలని కోరారు.
మరోవైపు మేఘన తండ్రి కృష్ణగౌడ్ కూడా జోగి కుటుంబంపై తీవ్ర ఆరోపణలు చేశారు. అదనపు కట్నం కోసం తమ కుమార్తెను వేధించారని ఆరోపిస్తూ, ఈ వ్యవహారంలో పూర్తిస్థాయి విచారణ జరిపించాలని డిమాండ్ చేశారు. తమ కుటుంబానికి రక్షణ కల్పించాలని ముఖ్యమంత్రి చంద్రబాబు నాయుడు, మంత్రి నారా లోకేశ్ను కోరారు.
తమకు న్యాయం జరగకపోతే జోగి రమేష్ నివాసం ఎదుట కుటుంబ సభ్యులతో కలిసి నిరసన చేపడతామని కూడా కృష్ణగౌడ్ హెచ్చరించారు. ఈ వ్యవహారంపై ప్రభుత్వం స్పందించి తగిన చర్యలు తీసుకోవాలని విజ్ఞప్తి చేశారు.
మేఘన, ఆమె కుటుంబ సభ్యుల తాజా వ్యాఖ్యలతో జోగి రమేష్ కుటుంబ వివాదం రాజకీయంగానూ ప్రాధాన్యం సంతరించుకుంది. అయితే ఈ ఆరోపణలపై జోగి రమేష్ కుటుంబం నుంచి పూర్తి స్థాయి స్పందన రావాల్సి ఉంది. కేసుకు సంబంధించిన వాస్తవాలు దర్యాప్తు అనంతరం మాత్రమే స్పష్టమయ్యే అవకాశం ఉంది.