మెగాస్టార్ చిరంజీవి తన తమ్ముడు, ఆంధ్రప్రదేశ్ ఉప ముఖ్యమంత్రి పవన్ కళ్యాణ్ జన్మదినం సందర్భంగా హృదయాన్ని హత్తుకునే సందేశాన్ని సోషల్ మీడియాలో పంచుకున్నారు.
కుటుంబ సభ్యుడిగా మాత్రమే కాకుండా ప్రజా నాయకుడిగా పవన్ కళ్యాణ్లో కనిపించే నిబద్ధత, సేవాభావాన్ని ప్రశంసిస్తూ ఆయన చేసిన పోస్ట్ అభిమానులను ఆకట్టుకుంటోంది.
చిన్నప్పటి నుంచే పవన్ కళ్యాణ్లో బాధ్యత, చిత్తశుద్ధి, ప్రజలకు మంచి చేయాలనే తపనను తాను గమనించానని చిరంజీవి పేర్కొన్నారు. ఏ పని చేపట్టినా పూర్తిస్థాయి అంకితభావంతో చేస్తాడని, కుటుంబంపై ఎంత ప్రేమ చూపిస్తాడో తనను నమ్మిన ప్రజల పట్ల కూడా అదే ఆప్యాయత, బాధ్యతతో వ్యవహరిస్తాడని అన్నారు.
ఉప ముఖ్యమంత్రిగా బాధ్యతలు చేపట్టిన తర్వాత గ్రామాల అభివృద్ధి, గిరిజన ప్రాంతాల సంక్షేమం, పర్యావరణ పరిరక్షణ, ప్రజలకు మౌలిక సదుపాయాల కల్పన వంటి అంశాల్లో పవన్ కళ్యాణ్ ప్రత్యేక దృష్టితో పనిచేస్తున్నారని చిరంజీవి కొనియాడారు. ఎన్నో ఏళ్లుగా పరిష్కారం కాని సమస్యలకు శాశ్వత పరిష్కారాల దిశగా అడుగులు వేస్తూ, అభివృద్ధిని మారుమూల ప్రాంతాల వరకు తీసుకెళ్తున్న తీరు తనకు ఆనందాన్ని, గర్వాన్ని కలిగిస్తోందని తెలిపారు.
పిఠాపురం ప్రజలకు ఒక ప్రజాప్రతినిధిగానే కాకుండా కుటుంబ సభ్యుడిలా అండగా నిలుస్తున్నాడని చిరంజీవి పేర్కొన్నారు. ప్రజల కష్టాలను తనవిగా భావించే నాయకుడిగా పవన్ కళ్యాణ్ మరిన్ని విజయాలు సాధించాలని ఆకాంక్షించారు.
చివరిగా, తమ ఇలవేల్పు శ్రీ ఆంజనేయస్వామి ఆశీస్సులతో పవన్ కళ్యాణ్ నిండు నూరేళ్లు ఆయురారోగ్యాలతో జీవిస్తూ, మరింత శక్తితో ప్రజాసేవలో ముందుకు సాగాలని ప్రార్థిస్తూ హృదయపూర్వక జన్మదిన శుభాకాంక్షలు తెలియజేశారు.