జనసేన పార్టీ సభ్యత్వం అనేది కేవలం సంఖ్య కాదని, పార్టీ ఆశయాలు, సిద్ధాంతాలను ప్రజల్లోకి తీసుకెళ్లే చైతన్యవంతమైన సైన్యమని జనసేన పార్టీ పీఏసీ ఛైర్మన్, రాష్ట్ర పౌర సరఫరాల శాఖ మంత్రి నాదెండ్ల మనోహర్ అన్నారు.

మంగళగిరిలో నిర్వహించిన జనసేన ఉద్యమి ఆత్మీయ సమావేశంలో ఆయన మాట్లాడారు. కేవలం 150 మందితో ప్రారంభమైన జనసేన పార్టీ నేడు 22 లక్షల మంది సభ్యులతో బలమైన రాజకీయ శక్తిగా ఎదిగిందని పేర్కొన్నారు.

రాజకీయాల్లో సమూల మార్పు తీసుకురావాలని, ప్రజల జీవన ప్రమాణాలు మెరుగుపడాలని ఆశయంతోనే పవన్ కళ్యాణ్ జనసేన పార్టీని స్థాపించారని చెప్పారు. పార్టీ ప్రారంభం నుంచి సాధక్‌లు, జనసైనికులు క్షేత్రస్థాయిలో కష్టపడి పార్టీ సిద్ధాంతాలను ప్రజల్లోకి తీసుకెళ్లారని కొనియాడారు. ప్రతి కార్యకర్త కష్టానికి జనసేనలో గౌరవం, గుర్తింపు ఉంటుందని స్పష్టం చేశారు.

2020లో 94 వేల సభ్యత్వాలతో ప్రారంభమైన సభ్యత్వ నమోదు కార్యక్రమం ప్రస్తుతం 21.50 లక్షలకు చేరుకుందని వివరించారు. కోవిడ్ సమయంలో సేవా కార్యక్రమాలు చేస్తూనే సభ్యత్వాలను పెంచామని, 2023లో 5.5 లక్షలు, 2024లో 12 లక్షల సభ్యత్వాలు నమోదు చేశామని తెలిపారు. పదేళ్ల నిరంతర పోరాటం, గత ఎన్నికల్లో సాధించిన విజయంతో జనసేన పార్టీ ఒక రిజిస్టర్డ్ పార్టీ స్థాయి నుంచి గుర్తింపు పొందిన ప్రాంతీయ పార్టీగా ఎదిగిందన్నారు.

పార్టీ కోసం పనిచేస్తూ ఇప్పటివరకు 1,034 మంది జనసైనికులు, వీర మహిళలు ప్రాణాలు కోల్పోవడం బాధాకరమని నాదెండ్ల మనోహర్ అన్నారు. వారి కుటుంబాలకు జనసేన పార్టీ అండగా నిలిచిందని, రూ.46.35 కోట్ల ఆర్థిక సహాయం అందించామని చెప్పారు. మృతుల పిల్లల విద్య బాధ్యతను కూడా పార్టీ భుజాలపై వేసుకుందని తెలిపారు.

స్వార్థ రాజకీయాలకు జనసేన ఎప్పుడూ దూరమని ఆయన స్పష్టం చేశారు. ప్రజా సమస్యల ఆధారంగానే పార్టీ పోరాటాలు సాగించిందని చెప్పారు. కౌలు రైతుల ఆర్థిక సాయం నుంచి రోడ్ల సమస్యల వరకు ప్రజల కోసం మాత్రమే ఉద్యమాలు చేశామని పేర్కొన్నారు. సోషల్ మీడియాలో జరుగుతున్న ప్రచారాలను చూసి ఆవేశపూరితంగా స్పందించి పార్టీకి నష్టం చేయవద్దని కార్యకర్తలకు సూచించారు.

జనసేనలో వర్గాలు, భిన్న నాయకత్వాలు లేవని, పార్టీకి ఒకే నాయకుడు పవన్ కళ్యాణ్ అని అన్నారు. ఆయన రాష్ట్ర భవిష్యత్తు కోసం మాత్రమే ఆలోచిస్తారని చెప్పారు. క్షేత్రస్థాయిలో నిజాయితీగా పనిచేసిన ప్రతి ఒక్కరికీ పవన్ కళ్యాణ్ గుర్తింపు ఇచ్చారని, ఆ గౌరవాన్ని కాపాడుకుంటూ పార్టీని మరింత బలోపేతం చేయాలని పిలుపునిచ్చారు.