మధ్యప్రాచ్యంలో ఉద్రిక్తతలు మళ్లీ పెరుగుతున్నాయి. కీలక సముద్ర మార్గమైన హార్ముజ్ జలసంధిపై ఇరాన్ తాజాగా కఠిన నియంత్రణ చర్యలు చేపట్టింది. తన తీరప్రాంత భద్రతను బలోపేతం చేయడమే లక్ష్యంగా కొత్త సముద్ర నిబంధనలను అమల్లోకి తెచ్చినట్లు ప్రకటించింది.

ఈ నిర్ణయం అమలులో భాగంగా, ఇరాన్‌కు చెందిన ఇస్లామిక్ రివల్యూషనరీ గార్డ్ కార్ప్స్ (IRGC) తీరప్రాంత పర్యవేక్షణను మరింత కట్టుదిట్టం చేసింది. సుమారు 2,000 కిలోమీటర్ల తీరరేఖపై ప్రత్యక్ష నిఘా పెంచుతూ, ఆ ప్రాంతంలో సంచరించే నౌకలపై కఠిన తనిఖీలు చేపట్టనున్నట్లు అధికారులు తెలిపారు. ఈ మార్గం గుండా వెళ్లే ప్రతి నౌకపై అదనపు నియంత్రణ ఉండనుందని సంకేతాలు ఇచ్చారు.

ప్రపంచ వ్యాప్తంగా సరఫరా అయ్యే ముడి చమురులో గణనీయమైన భాగం ఈ జలసంధి ద్వారా రవాణా అవుతుండటంతో, ఇరాన్ తీసుకున్న ఈ నిర్ణయం అంతర్జాతీయంగా ప్రాధాన్యత సంతరించుకుంది. ఈ వ్యూహాత్మక మార్గంపై పట్టు పెంచడం ద్వారా గ్లోబల్ ట్రేడ్‌పై తన ప్రభావాన్ని పెంచుకోవాలని ఇరాన్ చూస్తున్నట్లు విశ్లేషకులు భావిస్తున్నారు.

ఇటీవల అమెరికా విధించిన ఆర్థిక ఆంక్షలు, సముద్ర మార్గాల్లో పెరిగిన ఒత్తిడికి ప్రతిస్పందనగానే ఈ చర్యలు తీసుకున్నట్లు తెలుస్తోంది. విదేశీ శక్తుల జోక్యాన్ని అంగీకరించబోమని ఇరాన్ స్పష్టం చేస్తూ, ఈ ప్రాంతంలో తమ ఆధిపత్యాన్ని కొనసాగించాలనే సంకల్పాన్ని వెల్లడించింది.

ఇరాన్ నిర్ణయం ప్రపంచ మార్కెట్లపై ప్రభావం చూపే అవకాశం ఉంది. ముఖ్యంగా చమురు రవాణా అంతరాయం కలిగితే ధరలు పెరిగే ప్రమాదం ఉందని నిపుణులు హెచ్చరిస్తున్నారు. అలాగే సముద్ర మార్గాల్లో ఉద్రిక్తతలు పెరిగితే, అంతర్జాతీయ నౌకాయానంపై కూడా ప్రభావం పడే అవకాశం ఉంది.