ఇటీవల కాలంలో థైరాయిడ్ సమస్యలు మహిళల్లోనే కాకుండా యువతలో కూడా ఎక్కువగా కనిపిస్తున్నాయి. అలసట, బరువు పెరగడం, జుట్టు రాలడం, మూడ్ మార్పులు, చర్మం పొడిబారడం వంటి లక్షణాలు కనిపించినప్పుడు చాలామంది వాటిని సాధారణ సమస్యలుగా తీసుకుంటున్నారు.
కానీ వైద్యుల ప్రకారం ఇవి థైరాయిడ్ గ్రంథి పనితీరు సరిగా లేకపోవడానికి సంకేతాలు కావచ్చని చెబుతున్నారు.
థైరాయిడ్ అనేది గొంతు దిగువ భాగంలో ఉండే చిన్న గ్రంథి. ఇది శరీరంలోని జీవక్రియలు, గుండె వేగం, శక్తి స్థాయిలు, శరీర ఉష్ణోగ్రత వంటి ముఖ్యమైన వ్యవస్థలను నియంత్రిస్తుంది. అందుకే థైరాయిడ్ ఆరోగ్యం కోసం మందులతో పాటు సరైన ఆహారపు అలవాట్లు కూడా ఎంతో అవసరమని నిపుణులు సూచిస్తున్నారు.
అయితే సోషల్ మీడియాలో బ్రోకోలీ, క్యాబేజీ, కాలీఫ్లవర్ వంటి కూరగాయలు తింటే థైరాయిడ్ పెరుగుతుందనే ప్రచారం బాగా జరుగుతోంది. దీనిపై వైద్యులు స్పష్టత ఇస్తున్నారు. ఈ కూరగాయల్లో "గోయిట్రోజెన్స్" అనే పదార్థాలు ఉన్నప్పటికీ, సాధారణంగా ఉడికించి మితంగా తీసుకుంటే థైరాయిడ్కు పెద్దగా హాని ఉండదని చెబుతున్నారు. ముఖ్యంగా శరీరంలో అయోడిన్ సరిపడా ఉంటే భయపడాల్సిన అవసరం లేదని అంటున్నారు.
వీటిని పచ్చిగా ఎక్కువ మోతాదులో జ్యూస్ల రూపంలో తీసుకోవడం వల్ల మాత్రమే కొంత ప్రభావం ఉండే అవకాశం ఉందని వైద్యులు వివరిస్తున్నారు. ఉడికించిన తర్వాత ఈ పదార్థాల ప్రభావం గణనీయంగా తగ్గిపోతుందని చెబుతున్నారు. కాబట్టి పూర్తిగా ఈ కూరగాయలను మానేయాల్సిన అవసరం లేదని నిపుణులు సూచిస్తున్నారు.
థైరాయిడ్ ఆరోగ్యానికి అయోడిన్, సెలీనియం, జింక్ వంటి పోషకాలు చాలా ముఖ్యమని వైద్యులు చెబుతున్నారు. అయోడిన్ కోసం ఐయోడైజ్డ్ ఉప్పు, గుడ్లు, పాల పదార్థాలు, సముద్ర ఆహారం ఉపయోగపడతాయి. సెలీనియం కోసం గింజలు, చేపలు, గుడ్లు తీసుకోవచ్చు. అలాగే జింక్ కోసం శనగలు, పప్పులు, గుమ్మడి గింజలు, టోఫు వంటి ఆహారాలు ఉపయోగపడతాయని సూచిస్తున్నారు.
ఇక థైరాయిడ్ సమస్య ఉన్నవారు ఎక్కువగా దూరంగా ఉండాల్సింది అల్ట్రా ప్రాసెస్డ్ ఫుడ్స్ అని వైద్యులు హెచ్చరిస్తున్నారు. ప్యాకెట్ స్నాక్స్, ఫాస్ట్ ఫుడ్స్, చక్కెర పానీయాలు, మైదా పదార్థాలు శరీరంలో ఊబకాయం, అలసట వంటి సమస్యలను పెంచి థైరాయిడ్ లక్షణాలను మరింత తీవ్రం చేసే అవకాశం ఉందని చెబుతున్నారు.
థైరాయిడ్ మందులు తీసుకునే విషయంలో కూడా కొన్ని జాగ్రత్తలు అవసరమని నిపుణులు సూచిస్తున్నారు. ఈ మందులను ఉదయం ఖాళీ కడుపుతో తీసుకోవడం మంచిదని చెబుతున్నారు. టాబ్లెట్ వేసుకున్న తర్వాత కనీసం అరగంట నుంచి గంట వరకు టీ, కాఫీ లేదా ఆహారం తీసుకోకపోవడం వల్ల మందులు సరిగా పనిచేస్తాయని వైద్యులు వివరిస్తున్నారు.
ఇంటర్నెట్లో కనిపించే "థైరాయిడ్ డైట్"లు లేదా "డిటాక్స్"లపై అంధ విశ్వాసం పెట్టొద్దని వైద్యులు హెచ్చరిస్తున్నారు. సమతుల్య ఆహారం, క్రమం తప్పకుండా వైద్య పరీక్షలు, సరైన మందులు తీసుకోవడం ద్వారా థైరాయిడ్ సమస్యలను నియంత్రణలో ఉంచుకోవచ్చని సూచిస్తున్నారు.