శర్వానంద్, సంపత్ నంది కాంబినేషన్లో తెరకెక్కుతున్న ప్రతిష్టాత్మక చిత్రం 'భోగి'. పీరియాడిక్ బ్యాక్డ్రాప్లో ఎంతో ప్రతిష్టాత్మకంగా రూపొందుతున్న ఈ ప్రాజెక్ట్పై పరిశ్రమలోనూ, ప్రేక్షకుల్లోనూ ఇప్పటికే భారీ అంచనాలు నెలకొన్నాయి.
కాగా, రక్షాబంధన్ పండుగను పురస్కరించుకుని చిత్ర బృందం అభిమానుల కోసం ఒక ఎమోషనల్ అండ్ క్రేజీ అప్డేట్ను బయటకు వదిలింది. ఈ సినిమాలో శర్వానంద్ 'గంగ' అనే శక్తివంతమైన పాత్రలో కనిపిస్తున్నారు. రాఖీ పండుగ సందర్భంగా దర్శకుడు సంపత్ నంది సోషల్ మీడియా వేదికగా ఒక ప్రత్యేక పోస్టర్ను పంచుకున్నారు. ఈ సినిమాలో గంగ పాత్రకు ఐదుగురు అక్కాచెల్లెళ్లు ఉంటారని ఆయన వెల్లడించారు.
"ఫైవ్ సిస్టర్స్.. వన్ వరల్డ్.. వన్ హార్ట్బీట్" అంటూ రాఖీ శుభాకాంక్షలు తెలిపిన దర్శకుడు, ఈ ఐదుగురు సోదరీమణుల పాత్రలే 'భోగి' చిత్రానికి అసలైన ఆత్మ అని పేర్కొనడం విశేషం. కేవలం ఈ పోస్టర్ మాత్రమే కాకుండా చిత్ర సంగీతానికి సంబంధించి కూడా ఒక తీపి కబురు అందించారు.
ఆస్కార్ అవార్డు గ్రహీత చంద్రబోస్ అందించిన అద్భుతమైన సాహిత్యానికి, సంగీత దర్శకుడు భీమ్స్ సిసిరోలియో ప్రాణం పోస్తూ ఒక మెలోడీ గీతాన్ని బాణీ కట్టారని తెలిపారు. ఈ పాట సినిమాకే ఒక మైలురాయిగా నిలిచిపోతుందని, ఒక టైమ్లెస్ జెమ్లా అలరిస్తుందని చిత్రబృందం పూర్తి ధీమా వ్యక్తం చేస్తోంది. 1960ల కాలం నాటి తెలంగాణ-మహారాష్ట్ర సరిహద్దు గ్రామ వాతావరణంలో ఈ కథ సాగుతుంది. ఈ చిత్రం కోసం ఇటీవలే హైదరాబాద్లో దాదాపు 800 మందికి పైగా జూనియర్ ఆర్టిస్టులతో 22 రోజుల పాటు నాన్-స్టాప్గా భారీ క్లైమాక్స్ యాక్షన్ షెడ్యూల్ను పూర్తి చేశారు.
దిలీప్ సుబ్బరాయన్ పర్యవేక్షణలో రూపొందిన ఈ యాక్షన్ సీక్వెన్స్ వెండితెరపై మైండ్ బ్లాక్ చేయడం ఖాయంగా కనిపిస్తోంది. ఈ సినిమాలో గంగగా కనిపించడానికి శర్వానంద్ చాలా ప్రత్యేకమైన మేకప్ను ఉపయోగిస్తున్నారు. ప్రతిరోజూ షూటింగ్కి ముందు రెండున్నర గంటల పాటు మేకప్ వేసుకోవడం, షూట్ పూర్తయ్యాక దాన్ని తొలగించడానికి గంట సమయం కేటాయించడం ఆయన అంకితభావానికి అద్దం పడుతోంది. అలాగే ఈ చిత్రంలో కథానాయికలుగా అనుపమ పరమేశ్వరన్ 'కందుల సులోచన రాణి'గా, డింపుల్ హయాతి 'మందారం' పాత్రల్లో అలరించనున్నారు.
గతంలో వైవిధ్యమైన సినిమాలతో ప్రేక్షకులను మెప్పించిన శర్వానంద్, ఈసారి సంపత్ నంది టేకింగ్లో పూర్తి మాస్ అండ్ ఎమోషనల్ లుక్లో కనిపించబోతున్నారు. విజువల్స్ పరంగాను, కథాంశం పరంగాను ఈ సినిమా టాలీవుడ్లో సరికొత్త ట్రెండ్ సెట్ చేస్తుందని ఫ్యాన్స్ సోషల్ మీడియాలో చర్చించుకుంటున్నారు. తెలుగుతో పాటు తమిళం, కన్నడ, మలయాళం, హిందీ భాషల్లో పాన్ ఇండియా స్థాయిలో విడుదల కానున్న ఈ మూవీకి సంబంధించిన తదుపరి టీజర్, సాంగ్ రిలీజ్ డేట్స్పై త్వరలోనే అధికారిక ప్రకటన రానుంది. [Sharwanand Bhogi Movie, Director Sampath Nandi, Bhogi Rakhi Festival Update, Anupama Parameswaran, Bhims Ceciroleo Music]