ఓపెన్ చేసి ఉన్న ముఖ్యమైన ట్యాబ్‌లు ఎక్కడ పోతాయో అని భయపడి చాలామంది ఆ అప్‌డేట్‌ను రోజుల తరబడి వాయిదా వేస్తుంటారు. అయితే, వినియోగదారులకు ఈ తిప్పలు తప్పించడానికి గూగుల్ ఒక విప్లవాత్మకమైన మార్పుకు శ్రీకారం చుట్టింది. ఇకపై క్రోమ్ బ్రౌజర్‌ను అప్‌డేట్ చేయడానికి రీస్టార్ట్ చేయాల్సిన అవసరమే లేకుండా చేసే దిశగా గూగుల్ వేగంగా అడుగులు వేస్తోంది. 'డైనమిక్ ప్యాచింగ్' (Dynamic Patching) అనే నూతన సాంకేతికత ద్వారా బ్రౌజర్ రన్ అవుతున్నప్పుడే, బ్యాక్‌గ్రౌండ్‌లో ఉన్న ప్రాసెస్‌లను తాజా వెర్షన్‌తో రీప్లేస్ చేసేలా ఈ పరిశోధన సాగుతోంది.

దీనివల్ల యూజర్లు తమ పనిని ఆపకుండానే సులభంగా లేటెస్ట్ సెక్యూరిటీ అప్‌డేట్‌ను పొందవచ్చు. ఈ విప్లవాత్మక మార్పు వెనుక గూగుల్ యొక్క ఆర్టిఫిషియల్ ఇంటెలిజెన్స్ (AI) సాంకేతికత ప్రధాన పాత్ర పోషిస్తోంది. గూగుల్ అభివృద్ధి చేసిన జెమిని ఆధారిత ఏఐ టూల్స్, బిగ్ స్లీప్ (Big Sleep), కోడ్‌మెండర్ (CodeMender) వంటి ఆధునిక వ్యవస్థలు క్రోమ్ కోడ్‌బేస్‌లోని భద్రతా లోపాలను (Bugs) అత్యంత వేగంగా గుర్తిస్తున్నాయి. ఏఐ దాడితో బగ్స్ వెలికితీత వేగం విపరీతంగా పెరిగింది.

ఈ ఏఐ సామర్థ్యానికి నిదర్శనం ఏమిటంటే, కేవలం క్రోమ్ 149 మరియు క్రోమ్ 150 అనే రెండు వెర్షన్లలోనే ఏకంగా 1,072 సెక్యూరిటీ బగ్స్‌ను గూగుల్ ఫిక్స్ చేసింది. నమ్మశక్యం కాని విషయమేమిటంటే, ఈ రెండు రిలీజ్‌లలో ఏఐ సహాయంతో పరిష్కరించిన బగ్స్ సంఖ్య, గత 23 మైల్‌స్టోన్ రిలీజ్‌లలో కలిపి సరిచేసిన బగ్స్ కంటే చాలా ఎక్కువ కావడం విశేషం. గూగుల్ ఏఐ టూల్స్ సాధించిన మరొక సంచలనాత్మక విజయం ఏమిటంటే, క్రోమ్ కోడ్‌లో ఏకంగా 13 ఏళ్లుగా ఎవరికీ కనిపించకుండా దాగి ఉన్న ఒక తీవ్రమైన శాండ్‌బాక్స్ ఎస్కేప్ (Sandbox Escape) సెక్యూరిటీ లోపాన్ని ఏఐ పట్టుకోగలిగింది. సుదీర్ఘకాలంగా సిస్టమ్‌లో దాగి ఉన్న ఈ ప్రమాదకర లోపాన్ని ఏఐ అత్యంత సులువుగా గుర్తించి గూగుల్ ఇంజనీర్లను ఆశ్చర్యపరిచింది.

అంతేకాకుండా, కేవలం మే నెలలోనే ప్రొడక్షన్‌లోకి వెళ్లక ముందే 20కి పైగా తీవ్రమైన లోపాలను ఈ ఏఐ వ్యవస్థలు విజయవంతంగా అడ్డుకున్నాయి. ప్రస్తుతం గూగుల్‌లో ఉత్పన్నమవుతున్న బగ్ ఫిక్స్‌లలో మెజారిటీ కోడ్‌ను మానవ డెవలపర్లు కాకుండా ఏఐ సిస్టమ్‌లే స్వయంగా రూపొందిస్తున్నాయి. అంతర్గతంగా ఏఐ ద్వారా ప్రతిరోజూ కొత్త బగ్స్ బయటపడుతుండటంతో, సైబర్ నేరగాళ్ళు ఆ లోపాలను దుర్వినియోగం చేయకముందే వినియోగదారులకు రక్షణ కల్పించడం గూగుల్‌కు పెద్ద సవాలుగా మారింది. దీనికోసం గూగుల్ ఇప్పటివరకు వారానికి ఒకసారి ఇచ్చే సెక్యూరిటీ అప్‌డేట్ల స్థానంలో, వారానికి రెండుసార్లు (Twice-a-week) సెక్యూరిటీ ప్యాచ్‌లను విడుదల చేసే నూతన పైలట్ ప్రాజెక్ట్‌ను ప్రారంభించింది. ప్యాచ్ కోడ్ పబ్లిక్‌గా విడుదలయ్యాక, హ్యాకర్లు దాన్ని రివర్స్ ఇంజనీరింగ్ చేసి దాడి చేసే ప్రమాదాన్ని (Patch Gap) తగ్గించడమే ఈ నిర్ణయం వెనుక ఉన్న ముఖ్య ఉద్దేశం. google chrome dynamic patching feature,chrome ai fixes over thousand bugs.