ఆదర్శనగర్‌లోని న్యూ ఎమ్మెల్యే క్వార్టర్స్‌లో నిర్వహించిన లక్కీ డ్రా కార్యక్రమంలో ప్రోటోకాల్ పాటించలేదంటూ హౌసింగ్ డిపార్ట్‌మెంట్ అధికారులపై ఖైరతాబాద్ శాసనసభ్యుడు దానం నాగేందర్ తీవ్రస్థాయిలో ధ్వజమెత్తారు. స్థానిక ప్రజాప్రతినిధిగా తనకు కనీస సమాచారం ఇవ్వకుండానే అధికారులు ఏకపక్షంగా నిర్ణయాలు తీసుకుంటున్నారని ఎమ్మెల్యే అసహనం వ్యక్తం చేశారు. ప్రజాస్వామ్యంలో నియోజకవర్గ ప్రతినిధులను పక్కనపెట్టి కార్యక్రమాలు నిర్వహించడం తీవ్రమైన నిబంధనల ఉల్లంఘనేనని ఆరోపించారు. హౌసింగ్ బోర్డు ఉన్నతాధికారుల తీరు వల్ల ప్రభుత్వ ప్రతిష్ట దిగజారుతోందని దానం నాగేందర్ విమర్శించారు.

నియోజకవర్గానికి తొలి విడత కింద 480 ఇళ్లు అందాల్సి ఉండగా, కేవలం 120 ఇళ్లకు మాత్రమే లక్కీ డ్రా నిర్వహించడమేంటని ప్రశ్నించారు. మిగిలిన 360 ఇళ్ల కేటాయింపుల్లో గోల్‌మాల్ జరుగుతోందని అనుమానం వ్యక్తం చేశారు. తాను ఘటనా స్థలానికి చేరుకోకముందే డ్రా ప్రక్రియను పూర్తి చేసి, నియోజకవర్గంతో ఏమాత్రం సంబంధం లేని వ్యక్తులకు ఇళ్లను కట్టబెట్టారని ఆరోపించారు. ఇలాంటి అక్రమాలకు పాల్పడటం వల్ల అర్హులైన స్థానిక పేదలకు తీవ్ర అన్యాయం జరుగుతోందని ఆవేదన వ్యక్తం చేశారు.

అధికారుల పనితీరుపై తీవ్రంగా స్పందించిన ఆయన, "అధికారులు వస్తుంటారు.. పోతుంటారు.. కానీ నేను ఇక్కడే ఉండే స్థానికుడిని" అంటూ హెచ్చరించారు. గతంలో బాధ్యతారాహిత్యంగా ప్రవర్తించిన ఒక అధికారి వల్ల తాను జైలుకు వెళ్లాల్సి వచ్చిందని, మళ్లీ అలాంటి పరిస్థితుల్లోకి నెట్టవద్దని ఘాటుగా హెచ్చరించారు.

ఈ మొత్తం వ్యవహారాన్ని తెలంగాణ ముఖ్యమంత్రి రేవంత్ రెడ్డి దృష్టికి తీసుకెళ్తానని ఎమ్మెల్యే స్పష్టం చేశారు. రాబోయే శాసనసభ సమావేశాల్లోనూ హౌసింగ్ అధికారుల తీరును, ఇళ్ల కేటాయింపుల్లో జరిగిన అక్రమాలను నిలదీస్తానని చెప్పారు. ఇప్పటికైనా అధికారులు తమ వైఖరిని మార్చుకుని, ప్రభుత్వ ఉద్దేశాలకు అనుగుణంగా పారదర్శకంగా వ్యవహరించాలని దానం నాగేందర్ సూచించారు. అర్హులైన నిరుపేదలందరికీ న్యాయం జరిగే వరకు తమ పోరాటం ఆగేది లేదని స్పష్టం చేయడంతో ఈ అంశం స్థానికంగా హాట్ టాపిక్‌గా మారింది. MLA Danam Nagender, Indiramma Houses Draw, Khairatabad MLA, Housing Department Officials, Telangana News, Housing MD V.P. Gautam, CM Revanth reddy, Ponguleti Srinivasa Reddy