కొమరక్కగా మంచి పేరు, అభిమానుల ఆదరణ దక్కినప్పటికీ, తనలోని నటుడికి అసలైన సంతృప్తి దక్కలేదనే ఆవేదన ఆయనలో చాలా కాలంగా ఉండిపోయింది. ఇటీవల విడుదలైన 'ఇరుముడి' సినిమాతో తనలోని అసలైన నటుడిని ప్రేక్షకుల ముందుకు తీసుకువచ్చి సరికొత్త విజయాన్ని అందుకున్నారు కొమరం. ఈ సందర్భంగా తెలుగువన్ ప్రత్యేక ఇంటర్వ్యూలో తన 18 సంవత్సరాల సినీ ప్రయాణంలోని చేదు జ్ఞాపకాలను, భార్య చేసిన త్యాగాలను పంచుకుంటూ తీవ్ర భావోద్వేగానికి లోనయ్యారు. సినిమా రంగంలో నిలదొక్కుకోవడానికి కొమరం చేసిన పోరాటం సామాన్యమైనది కాదు.

ఆరంభంలో అవకాశాలు లేక తీవ్ర ఆర్థిక ఇబ్బందులు ఎదుర్కొన్న సమయంలో, ఆయనకు ఆకలి తీర్చింది 'సుధా టిఫిన్ సెంటర్'. అక్కడ రోజుకు కేవలం 15 రూపాయల జీతానికి ప్లేట్లు కడిగే పనులు చేశారు. నాటి రోజుల్లో పడిన అవమానాలు, ఎదురైన మాటలు ఆయన మనసును తీవ్రంగా గాయపరిచాయి. బయట ఎదురయ్యే ఆ కోపాన్ని, ఆవేదనను ఇంట్లో భార్యపై చూపించినా, ఆమె ఏనాడూ ఎదురు మాట్లాడకుండా మౌనంగా భరించారని కొమరం గుర్తుచేసుకున్నారు.

కనీసం తినడానికి తిండి లేని పరిస్థితులలో ఆయన భార్య రాత్రింబవళ్లు మిషన్ పై జాకెట్లు కుడుతూ నెలకు 3000 రూపాయలు ఖర్చులకు ఇచ్చేది. అలా ఐదేళ్ల పాటు ఆమె కుట్టిన బ్లౌజుల ఆదాయమే వారి కుటుంబాన్ని నిలబెట్టింది. తనకు నటన తప్ప వేరే ఏ వ్యాపారం, నైపుణ్యం తెలియదని, కుటుంబ బాధ్యతలన్నీ తన భార్యే భుజాన వేసుకుని నడిపించిందని ఎమోషనల్ అయ్యారు. కొమరక్కగా లేడీ గెటప్‌లో లభించిన గుర్తింపుతో పాపులారిటీ వచ్చినా, తన భార్యకు మాత్రం కొమరం సాధారణ పురుషుడి పాత్రలో, మంచి నటుడిగా తెరపై కనిపించాలనే కోరిక ఉండేది.

ఆ నిరీక్షణకు 'ఇరుముడి' రూపంలో సమాధానం లభించింది. దర్శకుడు కొమరక్కగా చేసిన రీల్స్ చూసి, ఆయనలోని విలనిజాన్ని గుర్తించి ఈ అవకాశాన్ని ఇచ్చారు. మాస్ మహారాజా రవితేజ ముందు నటించిన క్షణాలను కొమరం ఎప్పటికీ మరచిపోలేరు. ముఖ్యంగా అండర్వేర్ మీద ఒక సీన్ షూట్ చేసిన తర్వాత, అక్కడ ఉన్న దాదాపు 2000 మంది ముందర రవితేజ గారు చప్పట్లు కొట్టి అభినందించడం తన జీవితంలో మరుపురాని ఘట్టమని తెలిపారు. ఇరుముడి విజయం తర్వాత తన భార్య ముఖంలో చూస్తున్న ఆనందం, కొమరక్కగా వచ్చిన సక్సెస్ కంటే ఎంతో మిన్న అని ఆయన సంతోషం వ్యక్తం చేశారు. 18 ఏళ్ల సుదీర్ఘ పోరాటం తర్వాత లభించిన ఈ విజయం కొమరం జీవితంలో కొత్త అధ్యాయానికి నాంది పలికింది. [Ravi Teja, Irumudi Movie, Komaram Interview, TeluguOne]