చైనాకు డ్యూరియన్ ఎగుమతుల్లో ఆధిపత్యం చెలాయిస్తున్న థాయ్‌లాండ్, వియత్నాంలతో పోటీ పడాల్సిన పరిస్థితి మరో ఒత్తిడిగా మారింది.మలేసియా రాజధాని కౌలాలంపూర్‌కు గంట ప్రయాణ దూరంలో ఉన్న కరక్ ప్రాంతంలో స్టీఫెన్ చౌ డ్యూరియన్ తోట సాగు చేస్తున్నారు. రాత్రి వేళల్లోనే చెట్ల నుంచి సహజంగా రాలిన పండ్లను సేకరించేందుకు ఆయన కార్మికులు హెడ్‌ల్యాంప్‌లు ధరించి గంటల తరబడి పని చేస్తుంటారు. అయినా ఈ ఏడాది నష్టాలు తప్పకపోవచ్చని చౌ ఆందోళన వ్యక్తం చేస్తున్నారు.

వాతావరణం వరుస దెబ్బలు...

2021లో భారీ వర్షాలు, వరదల వల్ల చౌ తోటలో దాదాపు 100 డ్యూరియన్ చెట్లు, వ్యవసాయ యంత్రాలు దెబ్బతిన్నాయి. ఆ తర్వాత మూడేళ్ల పాటు పుష్పించే కాలంలో కురిసిన ఎడతెరిపి వర్షాల వల్ల పరాగసంపర్కం సరిగా జరగలేదు. దీంతో దిగుబడి తగ్గింది.ఈ ఏడాది ఫిబ్రవరి నుంచి ఏప్రిల్ వరకు మధ్యాహ్నం ఉష్ణోగ్రతలు 33 నుంచి 35 డిగ్రీల సెల్సియస్‌కు చేరగా, ఎక్కువ వర్షం రాత్రి వేళల్లోనే కురిసిందని చౌ చెప్పారు. ఈ వాతావరణం పుష్పాల ఏర్పాటుకు అనుకూలించినా, చిన్నవి లేదా వికృతమైన పండ్లు రాకుండా చెట్లను కత్తిరించాల్సి వచ్చిందన్నారు. ఎండ తీవ్రత వల్ల ఎక్కువ నీరు, ఎరువులు వాడాల్సి వచ్చిందని చెప్పారు.అయితే ఇరాన్ యుద్ధం ప్రభావంతో ఇంధనం, ఎరువుల ధరలు పెరగడంతో సాగు వ్యయం భారీగా పెరిగిందని వివరించారు."ఖర్చులు తిరిగి వస్తే అదే పెద్ద విషయం. ఈ ఏడాది ఎక్కువగా నష్టమే వచ్చే అవకాశం ఉంది" అని చౌ చెప్పారు.

ధరలు సగానికి పడిపోయి...

వేడి, పొడి వాతావరణం కారణంగా ఎక్కువ దిగుబడి రావడం, కొత్త తోటలు దిగుబడి దశకు చేరడంతో మలేసియాలో డ్యూరియన్ ఉత్పత్తి పెరిగింది. దీంతో మార్కెట్లో అధిక సరఫరా ఏర్పడి ధరలు పడిపోయాయి.జూలై ప్రారంభంలో చౌ తోటలో గ్రేడ్-ఏ ముసాంగ్ కింగ్ డ్యూరియన్ ధర కిలోకు స్థానిక కరెన్సీలో 8.6 డాలర్ల సమానంగా నమోదైంది. ఇది గత ఏడాది ఇదే కాలంతో పోలిస్తే సగానికి పడిపోయింది. 2024లో నమోదైన గరిష్ఠ ధరతో పోలిస్తే మూడో వంతుకు తగ్గింది.

చైనాలో డ్యూరియన్‌కు భారీ ఆదరణ...

బలమైన వాసనతో ప్రసిద్ధి చెందిన డ్యూరియన్‌ను ఇష్టపడేవారికి అది పరిమళంలా అనిపిస్తే, ఇష్టపడని వారికి అసహ్యంగా అనిపిస్తుంది. ముళ్లతో కూడిన తొక్కలో ఉండే గుజ్జు మృదువుగా, క్రీమ్‌లా ఉంటుంది. కొన్ని రకాల రుచి తీపి కస్టర్డ్‌ను తలపిస్తే, మరికొన్నింటిలో స్వల్ప చేదు, ఆల్కహాల్ లేదా పీనట్ బటర్ రుచులు కనిపిస్తాయి.2024లో మలేసియాలో డ్యూరియన్ సాగు విస్తీర్ణం 92,100 హెక్టార్లకు చేరింది. ఇది 2016తో పోలిస్తే దాదాపు 40 శాతం ఎక్కువ. అదే కాలంలో ఉత్పత్తి కూడా దాదాపు 90 శాతం పెరిగి 5,68,800 టన్నులకు చేరింది.2019లో చైనా మలేసియా నుంచి పూర్తిగా గడ్డకట్టించిన డ్యూరియన్ దిగుమతులకు అనుమతి ఇచ్చింది. 2024లో తాజా డ్యూరియన్ దిగుమతులకూ అనుమతించింది. దీంతో మలేసియా డ్యూరియన్ పరిశ్రమ వేగంగా విస్తరించింది.ఐక్యరాజ్యసమితి ఆహార, వ్యవసాయ సంస్థ గణాంకాల ప్రకారం 2020-2022 మధ్య ప్రపంచ డ్యూరియన్ ఎగుమతుల్లో దాదాపు 95 శాతం చైనానే కొనుగోలు చేసింది. చైనా కస్టమ్స్ వివరాల ప్రకారం 2025లో 1.87 మిలియన్ టన్నుల తాజా డ్యూరియన్‌ను 7.5 బిలియన్ డాలర్ల విలువతో దిగుమతి చేసుకుంది. గత పదేళ్లలో దిగుమతి పరిమాణం ఆరు రెట్లు పెరిగింది.షాంఘైకి చెందిన సాంగ్ షియాహువా వారానికి ఒకసారి డ్యూరియన్ తినాలని అనిపిస్తుందని, కానీ ఇందులో క్యాలరీలు ఎక్కువగా ఉండటంతో నెలకు ఒక్కసారి మాత్రమే తింటున్నానని చెప్పారు."డ్యూరియన్ తినే ప్రతిసారి చాంద్రమాన నూతన సంవత్సరం జరుపుకుంటున్నట్టే అనిపిస్తుంది" అని ఆమె అన్నారు.

నాణ్యతకు మలేసియా ప్రాధాన్యం...

చైనాకు డ్యూరియన్ ఎగుమతుల్లో మలేసియా థాయ్‌లాండ్, వియత్నాం కంటే వెనుకబడి ఉంది. అయితే నాణ్యత విషయంలో తమ పండ్లు మెరుగ్గా ఉంటాయని మలేసియా పరిశ్రమ చెబుతోంది. ఇతర దేశాల మాదిరిగా ముందుగానే కోయకుండా, చెట్ల నుంచి సహజంగా రాలిన తర్వాతే పండ్లను సేకరించడం అక్కడి ప్రత్యేకత.వాతావరణ మార్పులతో కొత్త సమస్యలు ప్రపంచ వ్యాప్తంగా ఉష్ణోగ్రతలు పెరగడంతో వేడి గాలులు, వరదలు, కరువులు ఎక్కువవుతున్నాయి. రైతులు కొత్త పరిస్థితులకు అనుగుణంగా సాగు పద్ధతులు మార్చుకోవాల్సి వస్తోంది.మలేసియా వాతావరణ శాఖ వివరాల ప్రకారం 1969 నుంచి 2025 వరకు దేశ సగటు ఉష్ణోగ్రత ప్రతి పదేళ్లకు 0.24 డిగ్రీల సెల్సియస్ చొప్పున పెరిగింది.థాయ్‌లాండ్ సరిహద్దుకు సమీపంలోని పెరాక్ రాష్ట్రంలో తోట సాగు చేస్తున్న ఊయ్ టీక్ హాక్ మాట్లాడుతూ, రెండు దశాబ్దాల క్రితం ఉష్ణోగ్రతలు తక్కువగా ఉన్నప్పుడు పండ్ల నాణ్యత సమస్యలు కూడా తక్కువగా ఉండేవని చెప్పారు. వేడి పెరగడంతో పదేళ్ల క్రితం మైదాన ప్రాంతం నుంచి చల్లని ఎత్తయిన ప్రాంతానికి తోటను మార్చినట్లు తెలిపారు.అయినా వేడి పెరుగుతుండటంతో కొత్త తెగుళ్లు ఎక్కువయ్యాయని, వాటిని అరికట్టేందుకు ఎక్కువసార్లు పురుగుమందులు పిచికారీ చేయాల్సి వస్తోందన్నారు. మూడేళ్లతో పోలిస్తే పురుగుమందుల ధరలు దాదాపు 30 శాతం పెరిగాయని చెప్పారు.ఈ ఏడాది పుష్పించే కాలంలో ప్రధాన పరాగసంపర్కకర్తలైన ఫ్రూట్ బ్యాట్లు ఒక్కటీ కనిపించలేదని ఊయ్ తెలిపారు. తీవ్రమైన వేడి లేదా అధికంగా పురుగుమందులు వాడటం దీనికి కారణం కావచ్చని అభిప్రాయపడ్డారు.డ్యూరియన్ అకాడమీ సలహాదారు లిమ్ చిన్ ఖీ మాట్లాడుతూ, ముఖ్యంగా ముసాంగ్ కింగ్ రకం వాతావరణ మార్పులకు చాలా సున్నితంగా స్పందిస్తుందని చెప్పారు. పండ్లు వేగంగా ఎదిగే దశలో ఎక్కువ వర్షం పడితే గుజ్జుపై తెలుపు, బూడిద రంగు మచ్చలు వస్తాయని, నీటి కొరత ఉంటే నల్ల మచ్చలు ఏర్పడతాయని వివరించారు.

సాంకేతికతతో ముందస్తు జాగ్రత్తలు...

ఎల్‌నినో ప్రభావంతో మార్చి నుంచి మే మధ్య మలేసియాలో రికార్డు స్థాయి ఉష్ణోగ్రతలు నమోదయ్యే అవకాశం ఉందని లిమ్ హెచ్చరించారు. చెరువులు ఎండిపోతే ప్రత్యామ్నాయంగా ట్యూబ్‌వెల్లు ఏర్పాటు చేసుకునేలా రైతులు ముందుగానే నీటి నిల్వలను పెంచుకోవాలని సూచించారు."మంచి పండ్లు రావాలంటే వాతావరణం ఎంత ముఖ్యమో, రైతు కృషి కూడా అంతే ముఖ్యం. ప్రకృతి విపత్తులు వచ్చినప్పుడు సిద్ధంగా ఉన్న రైతులకు అవే అవకాశాలుగా మారతాయి" అని ఆయన చెప్పారు.పెనాంగ్ ద్వీపానికి చెందిన రైతు కీ కిమ్ హ్వా తన తాత నుంచి డ్యూరియన్ సాగు నేర్చుకున్నారు. తోట బాధ్యతలు చేపట్టిన తర్వాత వర్షపాతం, గాలిలో తేమ, గాలి వేగం వంటి వివరాలు తెలుసుకునేందుకు సెన్సర్లు ఏర్పాటు చేశారు. చెట్లు, గడ్డిలో కొన్ని పరికరాలు, నేల లోతుల్లో మరికొన్ని అమర్చి వాటి సమాచారాన్ని క్లౌడ్‌లో భద్రపరుస్తున్నారు. నీటి బకెట్‌పై పడే పురుగులను గమనించి కూడా తెగుళ్ల తీవ్రతను అంచనా వేస్తున్నారు.ఈ సమాచారంతో సమస్యలు ముందుగానే గుర్తించి నాణ్యత, దిగుబడిని మార్కెట్ అవసరాలకు అనుగుణంగా నియంత్రిస్తున్నామని ఆయన చెప్పారు."మా జీవితం పూర్తిగా వాతావరణంపైనే ఆధారపడి ఉంటుంది. కానీ ముందుగానే సిద్ధం కావడం మాత్రం మా చేతుల్లోనే ఉంది" అని కీ కిమ్ హ్వా అన్నారు.