జలసంధిపై ఇరాన్‌కు నియంత్రణ కల్పించే ఒప్పందాన్ని అంగీకరించబోమని ట్రంప్‌ ప్రభుత్వం ఇప్పటికే స్పష్టం చేసింది.ఇదే సమయంలో గాజా నగరంలో ఇజ్రాయెల్‌ దాడిలో మరణించిన వంద మందికి పైగా పాలస్తీనీయులకు సామూహిక అంత్యక్రియలు నిర్వహించారు. లెబనాన్‌లోని బీరూట్‌ పోర్టు పేలుడు బాధితులకు స్మారక సభ జరిగింది. యెమెన్‌కు చెందిన హౌతీ తిరుగుబాటుదారులు సౌదీ అరేబియాలోని ఓ విమానాశ్రయాన్ని లక్ష్యంగా చేసుకుని డ్రోన్‌ దాడి చేసినట్లు ప్రకటించారు.

హోర్ముజ్‌ ఒప్పందంపై ఆశాభావం...హోర్ముజ్‌ జలసంధిని తిరిగి తెరవడంపై త్వరలోనే ఒప్పందం కుదిరే అవకాశం ఉందని అమెరికా ఉన్నతాధికారులు మంగళవారం ఆశాభావం వ్యక్తం చేశారు.ఇరాన్‌, ఒమన్‌ మధ్య చర్చల్లో పురోగతి సాధించినట్లు విదేశాంగ మంత్రి మార్కో రుబియో తెలిపారు. అయితే ఇంకా తుది నిర్ణయం కాలేదన్నారు."ఈరోజు లేదా రేపటిలోనే జలసంధిని తెరిచే ఒప్పందం కుదిరే అవకాశం ఉంది. ఈ ఘర్షణ సాధారణ పరిస్థితుల దిశగా వెళ్లొచ్చు" అని ఆర్థిక మంత్రి స్కాట్‌ బెసెంట్‌ సీఎన్‌బీసీకి చెప్పారు.పర్షియన్ గల్ఫ్‌ ముఖద్వారంలో ఉన్న హోర్ముజ్‌ జలసంధి ప్రపంచ చమురు, సహజ వాయువు రవాణాకు అత్యంత కీలకం. యుద్ధానికి ముందు ప్రపంచ వ్యాప్తంగా వ్యాపారానికి వెళ్లే చమురు, సహజ వాయువులో ఐదో వంతు ఈ మార్గం గుండా వెళ్లేది. ఫిబ్రవరిలో యుద్ధం ప్రారంభమైన తర్వాత ఇరాన్‌ నౌకలపై దాడులు చేయడంతో ఈ మార్గం దాదాపు మూతపడింది.ఖతర్‌ అమీర్‌ షేక్‌ తమీమ్‌ బిన్‌ హమద్‌ అల్‌ థానీ కూడా మంగళవారం అమెరికా అధ్యక్షుడు డొనాల్డ్‌ ట్రంప్‌తో మాట్లాడినట్లు తెలిపారు. యుద్ధానికి దౌత్యపరమైన పరిష్కారం కనుగొనే ప్రయత్నాలపై ఇద్దరూ చర్చించినట్లు ఆయన కార్యాలయం వెల్లడించింది.హోర్ముజ్‌, ఎర్ర సముద్రంలో నౌకలపై దాడులు...హోర్ముజ్‌ జలసంధి గుండా వెళ్తున్న ఓ సరకు నౌకపై గుర్తుతెలియని క్షిపణి తాకినట్లు యునైటెడ్‌ కింగ్‌డమ్‌ మారిటైమ్‌ ట్రేడ్‌ ఆపరేషన్స్‌ సెంటర్‌ తెలిపింది.స్థానిక కాలమానం ప్రకారం తెల్లవారుజామున 2 గంటల సమయంలో ఒమన్‌లోని అల్‌ ఖసబ్‌ పోర్టుకు ఈశాన్యంగా 37 కిలోమీటర్ల దూరంలో ఈ ఘటన జరిగినట్లు వెల్లడించింది. నౌక ఏ దేశ జెండాతో ప్రయాణిస్తోందో, అందులో సరకు ఉందో లేదో స్పష్టత లేదు. అయితే బ్రిటిష్‌ సముద్ర భద్రతా సంస్థ అంబ్రే నౌక దెబ్బతిన్నట్లు తెలిపింది.మరోవైపు ఎర్ర సముద్రంలో యెమెన్‌ తీరానికి సమీపంలో పేలుడు పదార్థాలతో నిండిన పడవ ఢీకొనడంతో భారత జెండాతో ప్రయాణిస్తున్న వాణిజ్య నౌక మునిగిపోయినట్లు యెమెన్‌, భారత అధికారులు తెలిపారు.ఆ నౌకలోని 13 మంది భారతీయులు, ఓ యెమెన్‌ పౌరుడిని తీర రక్షక దళం కాపాడింది.ఈ దాడిని భారత విదేశాంగ శాఖ ఖండించింది. అయితే బాధ్యత ఎవరూ స్వీకరించలేదు. యెమెన్‌ సమీపంలోని ఎర్ర సముద్రంలో ప్రయాణించే నౌకలపై ఇరాన్‌ మద్దతు ఉన్న హౌతీలు గతంలో పలుమార్లు దాడులు చేశారు.గాజాలో సామూహిక అంత్యక్రియలు...గాజా నగరంలో మంగళవారం వందలాది మంది పాలస్తీనీయులు సామూహిక అంత్యక్రియల్లో పాల్గొన్నారు. పాలస్తీనా జెండాలతో కప్పిన 112 మృతదేహాలను ధ్వంసమైన భవనాల సమీపంలో వరుసగా ఉంచి నివాళులు అర్పించారు. అనంతరం వాటిని స్ట్రెచర్లపై సమీపంలోని శ్మశానవాటికకు తీసుకెళ్లి ఖననం చేశారు.2023 నవంబర్‌ 22న గాజా నగరంలోని సబ్రా ప్రాంతంపై జరిగిన దాడిలో 300 మందికిపైగా మరణించారు. వారిలో ఈ 112 మంది కూడా ఉన్నారు.గాజాలో హమాస్‌ ఆధ్వర్యంలోని అంతర్గత వ్యవహారాల శాఖకు చెందిన సివిల్‌ డిఫెన్స్‌ సంస్థ తెలిపిన వివరాల ప్రకారం, వారాంతంలో శిథిలాల కింద నుంచి 40 మంది చిన్నారులు, 30 మంది మహిళలు సహా మృతదేహాలను వెలికితీశారు.2023 అక్టోబర్‌ 7న హమాస్‌ నేతృత్వంలోని మిలిటెంట్లు దక్షిణ ఇజ్రాయెల్‌పై దాడి చేసి సుమారు 1,200 మందిని చంపారు. మరో 251 మందిని బందీలుగా తీసుకెళ్లారు.ఆ తర్వాత గాజాలో ఇజ్రాయెల్‌ సైనిక చర్యల్లో పౌరులు, మిలిటెంట్లు కలిపి 73,375 మంది మరణించినట్లు గాజా ఆరోగ్య శాఖ తెలిపింది.యుద్ధ శిథిలాల కింద ఇంకా సుమారు 7,400 మంది చిక్కుకుని మరణించి ఉండొచ్చని గాజా ఆరోగ్య శాఖ రికార్డుల విభాగం అధిపతి జాహెర్‌ అల్‌ వాహైది తెలిపారు.లెబనాన్‌ నుంచి సైన్యం ఉపసంహరణపై చర్చలు...దక్షిణ లెబనాన్‌ నుంచి ఇజ్రాయెల్‌ సైన్యాన్ని దశలవారీగా వెనక్కి తీసుకెళ్లడం, ఇరాన్‌ మద్దతు ఉన్న హిజ్బుల్లా మిలిటెంట్‌ సంస్థను నిరాయుధీకరించడం లక్ష్యంగా అమెరికా మధ్యవర్తిత్వంలో కుదిరిన ఒప్పందం అమలుపై ఇజ్రాయెల్‌, లెబనాన్‌ అధికారులు రోమ్‌లో మంగళవారం మరోసారి సమావేశమయ్యారు.తదుపరి పైలట్‌ జోన్‌గా ఖియామ్‌ లేదా బింట్‌ జ్బెయిల్‌ను ఎంపిక చేయాలని లెబనాన్‌ కోరినట్లు చర్చలకు పరిచయమున్న ఓ దౌత్యవేత్త తెలిపారు. ఇటీవల ఇజ్రాయెల్‌-హిజ్బుల్లా యుద్ధంలో ఈ రెండు ప్రాంతాల్లో తీవ్ర పోరాటం జరిగింది. ప్రస్తుతం అవి ఇజ్రాయెల్‌ నియంత్రణలో ఉన్నాయి.అయితే చర్చలు ప్రారంభమయ్యే ముందు లెబనాన్‌లోని అమెరికా రాయబారి మిషెల్‌ ఇస్సా వెంటనే కొత్త పైలట్‌ జోన్లు అమలు చేసే అవకాశం లేదని చెప్పారు. "త్వరపాటు నిర్ణయాలు ఈ ప్రక్రియ రక్షించాలనుకుంటున్న పౌరులకే ముప్పుగా మారొచ్చు" అని వ్యాఖ్యానించారు.జూన్‌ 26 ఒప్పందం అమలు గత నెల ప్రారంభమైంది. తొలి పైలట్‌ జోన్‌గా ఇజ్రాయెల్‌ ఆక్రమణలో లేని, కానీ గతంలో కాల్పులు జరిగిన ప్రాంతాన్ని ఎంపిక చేశారు.సౌదీ విమానాశ్రయంపై హౌతీల డ్రోన్‌ దాడి...యెమెన్‌లో ఇరాన్‌ మద్దతు ఉన్న హౌతీ తిరుగుబాటుదారుల సైనిక ప్రతినిధి బ్రిగేడియర్‌ జనరల్‌ యాహ్యా సరీ, నజ్రాన్‌ నగరంలోని విమానాశ్రయంలోని కీలక లక్ష్యాన్ని డ్రోన్‌తో దాడి చేశామని ప్రకటించారు. అయితే దీనికి సంబంధించిన ఆధారాలు వెల్లడించలేదు.సాదా, హజ్జా ప్రావిన్సుల గగనతలంలో సౌదీ ఉల్లంఘనలకు ప్రతిస్పందనగానే ఈ దాడి చేశామని ఆయన చెప్పారు. దీనిపై సౌదీ అరేబియా వెంటనే స్పందించలేదు.బాబ్‌ ఎల్‌-మందెబ్‌ జలసంధి గుండా సౌదీతో సంబంధం ఉన్న నౌకల రాకపోకలను అడ్డుకుంటామని హౌతీలు ఇటీవల ప్రకటించారు.2014లో అంతర్యుద్ధం ప్రారంభమైన తర్వాత హౌతీలు రాజధాని సనా సహా ఉత్తర యెమెన్‌లోని విస్తార ప్రాంతాలను స్వాధీనం చేసుకున్నారు. అనంతరం సౌదీ అరేబియా అంతర్జాతీయ కూటమికి నాయకత్వం వహిస్తూ గగన, సముద్ర దిగ్బంధం అమలు చేసింది. 2022లో సంధి కుదిరిన తర్వాత పెద్దఎత్తున యుద్ధం ఆగింది.బీరూట్‌ పేలుడు బాధితులకు నివాళి...2020లో బీరూట్‌ పోర్టులో భారీ పేలుడులో మరణించిన 200 మందికిపైగా బాధితుల కుటుంబ సభ్యులు ఆ ఘటన జరిగి ఆరు సంవత్సరాలు పూర్తయిన సందర్భంగా పేలుడు స్థలం వద్ద నివాళులర్పించారు.సరైన భద్రత లేకుండా నిల్వ చేసిన అమోనియం నైట్రేట్‌ పేలడంతో లెబనాన్‌ రాజధానిలో పెద్దఎత్తున విధ్వంసం జరిగింది.ఈ ఘటనపై దర్యాప్తు ఇంకా పూర్తికాలేదు. ఇప్పటివరకు ఎవరినీ దోషులుగా తేల్చలేదు. అయితే ఈ ఏడాది చివరికి అభియోగాలు నమోదు చేస్తామని ప్రభుత్వం హామీ ఇవ్వడంతో బాధిత కుటుంబాలు మరోసారి ఆశాభావం వ్యక్తం చేశాయి.ఇటీవలి కాలంలో ఇజ్రాయెల్‌-హిజ్బుల్లా మధ్య జరిగిన రెండు యుద్ధాలు, దక్షిణ లెబనాన్‌లో ఇజ్రాయెల్‌ సైనిక ఉనికి వంటి పరిణామాల వల్ల ఈ విషాదం ప్రజల దృష్టిలో కొంత వెనుకబడింది.