ఐపీఎల్ 2026 తుది అంకానికి చేరుకుంది. ఆదివారం డిఫెండింగ్ ఛాంపియన్ రాయల్ ఛాలెంజర్స్ బెంగళూరు, గుజరాత్ టైటాన్స్ జట్ల మధ్య టైటిల్ పోరు జరగనుంది. ఇందుకోసం సర్వం సిద్ధమైంది.
క్వాలిఫయర్-1లో గుజరాత్ టైటాన్స్‌ను ఓడించి ఆర్సీబీ నేరుగా ఫైనల్ చేరింది. మరోవైపు క్వాలిఫయర్-2లో రాజస్థాన్ రాయల్స్‌ను చిత్తు చేసి గుజరాత్ టైటాన్స్ టైటిల్ ఫైట్‌ కోసం సగర్వంగా అడుగుపెట్టింది. ఆదివారం రాత్రి 7.30 గంటలకు అహ్మదాబాద్‌లోని నరేంద్రమోదీ క్రికెట్ స్టేడియంలో ఈ మ్యాచ్ జరగనుంది.
అయితే ఫైనల్ మ్యాచ్‌కు ముందు హార్దిక్ పాండ్యా సెంటిమెంట్ ఒకటి వెలుగులోకి వచ్చింది. ఈ విషయంపై సోషల్ మీడియాలో పెద్ద ఎత్తున చర్చ జరుగుతోంది. ఆ సెంటిమెంట్ ప్రకారం ఈసారి గుజరాత్ టైటాన్స్ విజేతగా నిలవాల్సి ఉంటుంది. ఇంతకీ ఆ సెంటిమెంట్ ఏంటి.. సడెన్‌గా ఎందుకు తెరమీదకు వచ్చింది.. అనే విషయాలు ఇప్పుడు తెలుసుకుందాం..
ఐపీఎల్‌లో ప్రతి సీజన్ ప్రారంభానికి ముందు కెప్టెన్ల ఫొటో షూట్ నిర్వహిస్తారు. ఇది గత 19 ఏళ్లుగా జరుగుతోంది. ట్రోఫీతో పాటు కెప్టెన్లంతా ఫొటోలకు ఫోజులు ఇస్తారు. అయితే ఈ ఫొటో షూట్‌లో 2023, 2024. 2025 సీజన్‌లలో హార్దిక్ పాండ్యా పక్కన నిల్చున్న కెప్టెనే టైటిల్ అందుకున్నాడు. ఈసారి సీజన్‌కు ముందు గుజరాత్ టైటాన్స్ కెప్టెన్ శుభ్‌మన్ గిల్.. హార్దిక్ పక్కన నిల్చున్నాడు. ఈ లెక్కన ఈసారి గుజరాత్ టైటాన్స్ టైటిల్ గెలుస్తుందనే ప్రచారం జోరందుకుంది.
ఐపీఎల్ 2023లో సీఎస్కే..
ఐపీఎల్ 2023లో చెన్నై సూపర్ కింగ్స్.. విజేతగా నిలిచింది. అప్పుడు కెప్టెన్ల ఫొటో షూట్‌లో సీఎస్కే కెప్టెన్ ఎంఎస్ ధోనీ.. హార్దిక్ పక్కన నిల్చున్నాడు.
ఐపీఎల్ 2024లో కేకేఆర్..
ఐపీఎల్ 2024లో హార్దిక్ ముంబై ఇండియన్స్‌కు మారాడు. అప్పుడు జరిగిన కెప్టెన్ల ఫొటో షూట్‌లో పాండ్యా పక్కన కేకేఆర్ సారథి శ్రేయస్ అయ్యర్ నిల్చున్నాడు. ఆ సీజన్‌లో కేకేఆర్ విజేతగా నిలిచింది.
ఐపీఎల్ 2025లో ఆర్సీబీ..
18 ఏళ్ల సుదీర్ఘ నిరీక్షణకు తెరదించుతూ ఆర్సీబీ గత సీజన్‌లో విజేతగా నిలిచింది. అప్పుడు ఆర్సీబీ కెప్టెన్ రజత్ పటీదార్ పక్కన కూడా పాండ్యా ఉన్నాడు. దీంతో ఈలెక్కన ఈసారి గుజరాత్ టైటాన్స్ టైటిల్ సాధిస్తుందని ఫ్యాన్స్ విశ్వాసం వ్యక్తం చేస్తున్నారు.