టాలీవుడ్ సెన్సేషనల్ హీరో, రౌడీ స్టార్ విజయ్ దేవరకొండ సినిమా అప్‌డేట్ వస్తే సోషల్ మీడియాలో ఎలాంటి హడావుడి ఉంటుందో ప్రత్యేకంగా చెప్పక్కర్లేదు. 'అర్జున్ రెడ్డి', 'గీతా గోవిందం' వంటి చిత్రాలతో బాక్సాఫీస్ వద్ద తన సత్తా చాటిన ఈ యంగ్ హీరో ఈ మధ్యకాలంలో సరైన హిట్టు అందుకోలేకపోయినా వరుస ప్రాజెక్టులతో ఫుల్ బిజీగా ఉన్నాడు.
ప్రస్తుతం ఆయన నటిస్తున్న 'రణబాలి', 'రౌడీ జనార్ధన' చిత్రాలతో ఎలాగైనా సరే బాక్సాఫీస్ వద్ద గట్టి కమ్‌బ్యాక్ ఇవ్వాలని పట్టుదలతో ఉన్నాడు. దీనికి తోడు ఇప్పటికే 'శౌర్యవ్' దర్శకత్వంలో ఒక కొత్త ప్రాజెక్ట్‌ను కూడా అధికారికంగా ప్రకటించారు. ఇలా బ్యాక్ టు బ్యాక్ చిత్రాలతో బిజీగా ఉన్న విజయ్ దేవరకొండకు సంబంధించిన ఓ లేటెస్ట్ న్యూస్ ఇప్పుడు ఫిలిం నగర్ సర్కిల్స్‌తో పాటు బాలీవుడ్‌లోనూ తెగ వైరల్ అవుతోంది.
* 'పెద్ది'కి ఏపీ ప్రభుత్వం బంపరాఫర్.. టికెట్ ధరల పెంపు, ప్రీమియర్ షోలకు గ్రీన్ సిగ్నల్!
తాజాగా విజయ్ దేవరకొండ ముంబైలోని బాలీవుడ్ అగ్ర నిర్మాణ సంస్థ 'మ్యాడ్ డాక్ ఫిల్మ్స్' (Maddock Films) కార్యాలయం వెలుపల ప్రత్యక్షమవడం తీవ్ర చర్చనీయాంశంగా మారింది. ప్రస్తుతం హిందీ చిత్రసీమలో హారర్-కామెడీ యూనివర్స్ (స్త్రీ సిరీస్, ముంజ్యా, థామా, ఛావా) చిత్రాలతో వరుస విజయాలందుకుంటూ టాప్ పొజిషన్‌లో దూసుకుపోతున్న నిర్మాణ సంస్థ ఇది. అయితే ఈ భేటీలో ట్విస్ట్ ఏంటంటే.. విజయ్ ఒక్కడే కాకుండా టాలీవుడ్ క్లాసిక్ స్క్రీన్ ప్లే దర్శకుడు విక్రమ్ కె కుమార్ కూడా ఆయనతో పాటు ఉండటం విశేషం. 'మనం', '24', 'గ్యాంగ్ లీడర్', 'హలో' వంటి విభిన్న చిత్రాలతో తన ప్రతిభను చాటుకున్న విక్రమ్ కె కుమార్ తాజాగా విజయ్ దేవరకొండకు ఒక అద్భుతమైన కథను వినిపించారని.. అది రౌడీ స్టార్‌కు బాగా నచ్చిందని సమాచారం.
* చరణ్‌తో సినిమాకి కొత్త మ్యూజిక్ డైరెక్టర్?.... డీఎస్పీని సుకుమార్ పక్కన పెట్టేశాడా!
నిజానికి ఈ క్రేజీ ప్రాజెక్ట్ తొలుత టాలీవుడ్ ప్రముఖ నిర్మాణ సంస్థ 'యూవీ క్రియేషన్స్' బ్యానర్‌లో తెరకెక్కాల్సి ఉందనే ప్రచారం గట్టిగా సాగింది. కానీ కొన్ని అనివార్య కారణాల వల్ల తాజాగా ఈ ప్రాజెక్ట్ నుండి యూవీ క్రియేషన్స్ తప్పుకున్నట్లు ఫిలిం నగర్ టాక్. సరిగ్గా ఇదే తరుణంలో విజయ్, విక్రమ్ ఇద్దరూ కలిసి ముంబైలో మ్యాడ్ డాక్ ఫిల్మ్స్ అధినేతలను కలవడంతో.. ఈ పాన్ ఇండియా ప్రాజెక్ట్‌ను సదరు బాలీవుడ్ సంస్థే భారీ బడ్జెట్‌తో నిర్మించబోతోందనే వార్తలకు బలం చేకూరింది. ప్రస్తుతం సౌత్ ఇండియా స్టార్స్ అందరూ బాలీవుడ్ మార్కెట్‌పై కన్నేసిన తరుణంలో, విజయ్ దేవరకొండ విక్రమ్ కుమార్ లాంటి వైవిధ్యమైన దర్శకుడితో, మ్యాడ్ డాక్ ఫిల్మ్స్ లాంటి బలమైన ప్రొడక్షన్ బ్యాకింగ్‌తో హిందీ మార్కెట్లోకి భారీగా అడుగుపెట్టేందుకు ప్రణాళికలు సిద్ధం చేస్తున్నట్లు స్పష్టమవుతోంది. మరి ఈ క్రేజీ కాంబినేషన్ ఏ బ్యానర్‌లో ఫైనల్ కానుంది? సినిమా ఎప్పుడు పట్టాలెక్కనుంది? అనే విషయాలపై పూర్తి క్లారిటీ రావాలంటే మరికొన్ని రోజులు వేచి చూడాల్సిందే!