అయితే ఇప్పుడు మళ్లీ కేంద్రం ఆ నిర్ణయాన్ని వెనక్కి తీసుకోబోతున్నట్లు తెలుస్తోంది. అవును.. గోల్డ్, సిల్వర్‌పై దిగుమతి సుంకాల్ని (ఇంపోర్ట్స్ డ్యూటీ) తగ్గించడం కోసం కేంద్ర ప్రభుత్వం ప్రస్తుతం అంతర్గతంగా విస్తృత స్థాయిలో చర్చలు జరుపుతున్నట్లు విశ్వసనీయ వర్గాల ద్వారా సమాచారం అందింది. ఈ మేరకు కొందరు అధికారుల్ని ఉటంకిస్తూ మనీ కంట్రోల్ నివేదించింది. అదే 15 శాతం నుంచి మళ్లీ 6 శాతానికి తీసుకురానున్నట్లు తెలుస్తోంది. అదే జరిగితే బంగారం ధరలు కాస్త అదుపులోకి వస్తాయి.

బంగారం, వెండి వంటి విలువైన లోహాలపై అధిక పన్నుల భారం నేపథ్యంలో, అధికారికంగా దిగుమతులు తగ్గినప్పటికీ ఇదే సమయంలో అక్రమంగా దేశంలోకి వచ్చే బంగారం పెరిగినట్లు ప్రభుత్వం దృష్టికి వచ్చింది. అంటే గోల్డ్ స్మగ్లింగ్ మళ్లీ పెరిగిందన్నమాట. పన్ను భారం తగ్గించుకోవడంలో భాగంగానే విదేశాల నుంచి ఇలా అక్రమంగా బంగారం తరలిస్తుంటారు. ఈ క్రమంలోనే దిగుమతి సుంకాల్ని తగ్గించడం ద్వారా పసిడి అక్రమ రవాణా కూడా తగ్గించాలని కేంద్రం చూస్తున్నట్లు తెలిసింది. అప్పుడు అధికారికంగానే దిగుమతులు మరిన్ని పెరుగుతాయని భావిస్తోంది.

ముఖ్యంగా భారత ఆభరణాల తయారీ పరిశ్రమల ప్రతినిధులు, బులియన్ వ్యాపారులు ఈ కస్టమ్స్ డ్యూటీని 15 నుంచి 6 శాతానికి తీసుకురావాలని కేంద్రాన్ని కోరుతున్నారు. దీంతో కేంద్రం దీన్ని పరిశీలిస్తున్నట్లు తెలిసింది. అయితే ఇప్పటివరకు మాత్రం ఎలాంటి అధికారిక ప్రకటన విడుదల చేయలేదు. సుంకాలు తగ్గించే అంశంపై చర్చలు ఇంకా జరుగుతున్నాయని, దీనిపై ఇంకా ఎలాంటి నిర్ణయం ఏదీ తీసుకోలేదని సంబంధిత వర్గాలు తెలిపాయి.

తగ్గిన దిగుమతులు కానీ స్మగ్లింగ్‌తో ఆందోళన!