బిగ్ బాస్ అగ్నిపరీక్ష రెండో సీజన్లోని టాప్ 15 కంటెస్టెంట్ల నుంచి ఒక కంటెస్టెంట్ను ఎలిమినేట్ చేశారు. ప్రస్తుతం అగ్ని పరీక్షలో 14 మంది కంటెస్టెంట్లే ఉన్నారు.
మున్ముందు మరిన్ని ఎవిక్షన్స్ జరిగేలా కనిపిస్తున్నాయి. ఆదివారం నాటి ఎపిసోడ్లో అయితే గాయత్రి ఎలిమినేషన్ జరిగింది. అగ్ని పరీక్షలోని ఇతర కంటెస్టెంట్ల మెజార్టీ ఓట్లతోనే గాయత్రిని బయటకు పంపించేశారు. అసలు నేటి ఎపిసోడ్ ఎలా సాగింది.. డేంజర్ జోన్లో ఉన్న మిగతా కంటెస్టెంట్లు ఎలా సేవ్ అయ్యారు.. చివరకు ఏ ఇద్దరు మిగిలారు.. అన్నది చూద్దాం.
డేంజర్ జోన్లో ఉన్న రోహిత్, రామకృష్ణ, అపూర్వ, గాయత్రిలకు జ్యూరీ ఓ ఛాన్స్ ఇచ్చింది. డేంజర్ జోన్ నుంచి బయటకు రావడానికి ఓ అవకాశం ఉందని, ఓ ఇద్దరు ఏకాభిప్రాయంతో ముందుకు వచ్చి టాస్క్ ఆడాలని జ్యూరీ చెబుతుంది. కానీ ఆ నలుగురు మాత్రం ఏకాభిప్రాయానికి రాలేకపోతారు. ఆల్రెడీ డేంజర్ జోన్ నుంచి బయటకు వచ్చిన ఇద్దరు కంటెస్టెంట్ల అభిప్రాయం మేరకు రోహిత్, రామకృష్ణలు టాస్క్ ఆడతారు.
బాక్సుల్ని విసిరితే.. అవతల ఉన్న గోడలకు అతుక్కోవాలి. ఆ ఆటలో రోహిత్ తన సత్తాను చాటుకుంటాడు. రామకృష్ణ వేసిన వాటిల్లో ఒక్కటి మాత్రమే గోడకు అతుక్కుంటుంది. కానీ రోహిత్ మాత్రం తన టెక్నిక్ను వాడి గెలుస్తాడు. అలా డేంజర్ జోన్ నుంచి బయటకు వస్తాడు. ఆపై యష్మీ వచ్చి సందడి చేస్తుంది. అక్కడ ఉన్న నలుగురు లేడీ కంటెస్టెంట్లకు ఓ అవకాశం ఇస్తానని చెబుతుంది. ఈ క్రమంలో అందరూ తమ తమ టాలెంట్లను చూపించి ఇంప్రెస్ చేయాలని అంటుంది.
ఈ క్రమంలో ప్రియాంక అద్భుతంగా డ్యాన్స్ వేస్తుంది. ఝాన్సీ పాట పాడుతుంది. శ్రష్టి, అపూర్వలు డ్యాన్స్, ర్యాంప్ వాక్ అని అదరగొడతారు. రాజ కుమారి ఏమో యాక్టింగ్ చేస్తుంది. ఇక యష్మీ వచ్చి రాజ కుమారిని సెలెక్ట్ చేసుకుంటుంది. ఇంకో కంటెస్టెంట్గా ప్రియాంకని జ్యూరీ సెలెక్ట్ చేస్తుంది. ఇక ఆ ఇద్దరికీ పెట్టిన టాస్కులో ప్రియాంక అదరగొడుతుంది. చివరకు ప్రియాంక మాత్రం డేంజర్ జోన్ నుంచి బయటకు వచ్చి ఫైర్ కార్డ్ని కూడా గెలుచుకుంటుంది. ఆ తర్వాత అమర్ దీప్ వస్తాడు. రామకృష్ణ, అమర్ దీప్లు కాస్త ఫన్ చేస్తారు.
ఇక ఆ తర్వాత అమర్ దీప్ ఓ స్పెషల్ కార్డ్ తీసుకు వస్తాడు. మామూలు ఫైర్ కార్డ్ కాదు.. వైల్డ్ ఫైర్ కార్డ్ అని అంటాడు. ఇక అమర్ దీప్ మిగిలిన గాయత్రి, అపూర్వలకు టాస్క్ పెడతాడు. వల వేసి స్కోర్ బోర్డ్ని పెంచుకునే టాస్క్ ఇస్తాడు. అందులో సరిగ్గా వల వేసి ఎక్కువ స్కోర్ సాధిస్తుంది అపూర్వ. చివరకు గాయత్రి ఆ ఆటలో ఓడిపోతుంది. గెలిచిన అపూర్వ డేంజర్ జోన్ నుంచి బయటకు వస్తుంది. ఇక అమర్ దీప్ తెచ్చిన వైల్డ్ ఫైర్ కార్డ్ని జ్యూరీకి ఇస్తాడు. ఇది స్పెషల్ కార్డ్, అన్నింట్లోకెల్లా పవర్ ఫుల్ కార్డ్ అని అంటాడు. అది ఏ టైంలో అయినా ఏ కంటెస్టెంట్కి అయినా వాడొచ్చు అని చెప్తాడు.
మిగిలిన రామకృష్ణ, గాయత్రిలను ఎలిమినేట్ చేసే బాధ్యతను కంటెస్టెంట్ల మీదే పెడుతుంది జ్యూరీ. ఎవరు ఉండాలి? ఎవరు బయటకు వెళ్లాలి? అనేది ఓట్లు వేయాలని చెప్తారు. రామకృష్ణ సరిగ్గా టాస్క్ అర్థం చేసుకోలేకపోయినా.. ఎఫెర్ట్ మాత్రం కనిపిస్తుంది.. బాగానే ఆడతాడు అని చెప్తారు. గాయత్రిలో మాత్రం ఆ ఫైర్, ఎనర్జీ, ఉత్సాహం ఏమీ కనిపించలేదు అని చాలా మంది చెప్తారు. దీంతో ఎక్కువ ఓట్లు రావడంతో గాయత్రిని బయటకు పంపించేస్తారు.
నేను ఎవ్వరితోనూ ఫేక్గా ఉండలేదు.. నాలా నేను ఉన్నా.. ఒంటరిగా ఉండటం నాకు అలవాటు.. ఎప్పటికైనా ఈ ప్రపంచంలో ఒంటరిగా ఉండాల్సిందే.. ఎవ్వరూ మనకు తోడుగా రారు.. అలా అని నేను ఇక్కడ ఎవ్వరితోనూ తప్పుగా ప్రవర్తించలేదు.. ఆటల కోసం ఫేక్గా ఉండలేదు అని గాయత్రి కన్నీరు పెట్టుకుంటంది. అందరూ నన్ను వీక్ అని అన్నా కూడా ఎప్పుడూ ఏడ్చి సింపతీ గెయిన్ చేసుకోవాలని చూడలేదు అని గాయత్రి అంటుంది. మీకు నచ్చిన కంటెస్టెంట్కి ఓట్ వేయండని, ఈ 14 మందిలో బిగ్ బాస్ ఇంట్లోకి వెళ్లే అర్హత ఎవరికి ఉంది? అనేది ఆలోచించుకుని మీకు ఇష్టమైన కంటెస్టెంట్కి ఓటు వేయమని నవదీప్ కోరుతాడు.