Cash Rules: ప్రస్తుతం అంతా డిజిటల్ అయినా ఇప్పటికీ నగదు రూపంలో చాలా ట్రాన్సాక్షన్లు జరుగుతున్నాయి. రోజు వారీ అవసరాల నుంచి వ్యాపారాల లావాదేవీలు సైతం చాలా మంది కరెన్సీ నోట్లతో నిర్వహిస్తుంటారు.
అయితే, నగదు రూపంలో చేసే ట్రాన్సాక్షన్లకు ఓ లిమిట్ ఉంటుంది. ఆ పరిమితి దాటి నగదు తీసుకున్నా, బ్యాంకులో జమ చేసినా భారీగా పెనాల్టీ పడడమే కాదు, ఆదాయపు పన్ను విభాగం నుంచి నోటీసులూ రావచ్చు. మరి ఆ 8 రకాల ట్రాన్సాక్షన్ల గురించిన వివరాలు తెలుసుకుందాం.
Cash Rules: ఆదాయపు పన్ను చట్టం 2025 ప్రకారం డిజిటల్ ఆర్థిక వ్యవస్థను ప్రోత్సహించేందుకు, నల్ల ధనాన్ని అరికట్టేందుకు నగదు లావాదేవీలపై (Cash Transaction) కఠినమైన పరిమితిలు విధించారు. ఒకే రోజులో ఒక వ్యక్తి నుంచి రూ.2 లక్షలు లేదా అంతకంటే ఎక్కువ నగదు స్వీకరించడం నిషేధం. వ్యాపార అవసరాల కోసం రోజుకు రూ.10 వేలకు మించి నగదు చెల్లించినా, బ్యాంక్ ఖాతాల నుంచి నిర్ణీత పరిమితికి మించి క్యాష్ విత్ డ్రా చేసినా ట్యాక్స్ పడుతుంది. అంతే కాదు కొన్నిసార్లు ఇన్కమ్ ట్యాక్స్ విభాగం నుంచి నోటీసులు సైతం వచ్చే ప్రమాదం ఉంటుంది. అలా నగదు లావాదేవీలపై పరిమితులు ఉన్న 8 రకాల ట్రాన్సాక్షన్ల గురించి ఈ కథనం ద్వారా తెలుసుకుందాం.1.నగదు స్వీకరణ పరిమితి
ఒక రోజులో ఒక వ్యక్తి నుంచి రూ.2 లక్షలకు మించి నగదు తీసుకోవడానికి లేదు. ఈ పరిమితి దాటి క్యాష్ తీసుకున్నట్లయితే భారీగా పెనాల్టీ పడవచ్చు. మీరు తీసుకున్న నగదుకు సమానంగా పెనాల్టీ కట్టాల్సి వస్తుంది.
2. క్యాష్ లోన్ లేదా క్యాష్ డిపాజిట్
మీరు నగదు రూపంలో అప్పు తీసుకోవడం, డిపాజిట్ చేయడం లేదా ఏదైనా ప్రాపర్టీ కొనేందుకు అడ్వాన్స్ రూపంలో ఇవ్వడానికి పరిమితి రూ.20 వేలు మాత్రమే. ఈ లిమిట్ దాటి నగదు ఇచ్చినట్లయితే భారీగా పెనాల్టీ పడుతుంది. 100 శాతం పెనాల్టీలు విధించే అవకాశం ఉంది. కొన్నిసార్లు లెక్క చూపించని ఆదాయంగా పరిగణించి ఐటీ నోటీసులు పంపించే అవకాశం సైతం ఉంటుంది.
3.క్యాష్ రీపేమెంట్ లిమిట్
మీకు ఏదైనా లోన్ తీసుకున్నప్పుడు దానిని తీర్చేందుకు రూ.20 వేలకు మించి నగదు ఇవ్వడానికి లేదు. బ్యాంక్ ట్రాన్స్ఫర్ లేదా చెక్ వంటి ఇతరమార్గాల ద్వారానే ఇవ్వాలి. ఆలా కాదని నగదు లావాదేవీలు నిర్వహిస్తే భారీగా పెనాల్టీలు, ఐటీ నోటీసుల వంటి ఇబ్బందులు ఎదురవుతాయి.
4. వ్యాపార ఖర్చుల పరిమితి
వ్యాపారాలు నిర్వహించే వారు ఒక రోజులో ఒక వ్యక్తి నుంచి రూ.10 వేలకు మించి క్యాష్ పేమెంట్లపై ట్యాక్స్ డిడక్షన్ క్లెయిమ్ చేసుకోలేరు. రవాణా వ్యాపారానికి అయితే ఈ పరిమితి రూ.35 వేలుగా ఉంటుంది.
5. నగదు విరాళాల పరిమితి
రూ.2000లకు మించి నగదు రూపంలో విరాళం ఇచ్చినట్లయితే ఆదాయపు పన్ను చట్టంలోని సెక్షన్ 80జీ కింద పన్ను మినహాయింపు క్లెయిమ్ చేసుకోలేరు. ట్యాక్స్ మినహాయింపు క్లెయిమ్ చేయాలంటే బ్యాంక్ ద్వారానే ట్రాన్సాక్షన్లు జరగాలి.
6.బ్యాంకు నుంచి నగదు విత్ డ్రా
బ్యాంక్ ఖాతా నుంచి ఎంత నగదు విత్ డ్రా చేయాలి అనేదానికి ఎలాంటి పరిమితి లేదు. అయితే, పెద్ద మొత్తంలో నగదు విత్ డ్రా చేసినప్పుడు ఆదాయపు పన్ను విభాగానికి బ్యాంకులు సమాచారం ఇస్తాయి. అలాగే సెక్షన్ 194ఎన్ కింద టీడీఎస్ కట్ చేసే అవకాశం ఉంటుంది.
7. నగదులో ప్రాపర్టీ ట్రాన్సాక్షన్లు
ప్రాపర్టీ క్రయవిక్రయాల్లో పెద్ద మొత్తంలో నగదు లావాదేవీలు నిర్వహించేందుకు లేదు. ప్రాపర్టీ కొన్నప్పుడు లేదా విక్రయించినప్పుడు పెద్ద మొత్తంలో నగదు ఇవ్వడం లేదా తీసుకోవడం వంటివి చేసినట్లయితే ట్యాక్స్ స్క్రూటీనీ, పెనాల్టీ వంటివి ఉంటాయి. ఏ విధంగానైనా క్యాష్ అడ్వాన్స్ లేదా పేమెంట్ రూ.20 వేల వరకే ఉంటుంది. ఈ లిమిట్ దాటినట్లయితే ఇబ్బందులు ఎదుర్కోవలసి వస్తుంది.
8.పెద్ద ట్రాన్సాక్షన్లను చిన్న చిన్నగా మార్చడం
ఒకేసారి పెద్ద మొత్తంలో నగదు లావాదేవీలు చేయకుండా తక్కువ మొత్తంలో నగదును విభజించి ట్రాన్సాక్షన్లు నిర్వహిస్తే పెనాల్టీ పడదని చాలా మంది అనుకుంటారు. కానీ, అలా ఉండదు ఒక విధమైన అవసరం కోసం చిన్న చిన్న మొత్తాల్లో పేమెంట్ చేసినా ఆ మొత్తాన్ని ఒకే ట్రాన్సాక్షన్గా భావిస్తారు. దీంతో భారీగా పెనాల్టీ ఎదుర్కోవలసి రావచ్చు.