ముఖ్యంగా షుగర్‌ కోటెడ్‌ ఫుడ్స్‌, ఫ్యాటీ ఫుడ్స్‌, ఫాస్ట్‌ ఫుడ్‌ వంటివి మొటిమల సమస్యను తీవ్రంతరం చేస్తాయని చెబుతున్నారు. ఈ నేపథ్యంలో ఈ సమస్యను ఎలా అధిగమించాలో ఈ స్టోరీలో వివరంగా తెలుసుకుందాం..

చక్కెర, స్వీట్స్‌ ఎక్కువగా తీసుకుంటే మీ బ్లడ్‌ షుగర్‌ లెవల్స్‌, ఇన్సులిన్‌ స్థాయిలపైనా ఎఫెక్ట్‌ చూపుతుంది. చక్కెర ఉన్న ఆహార పదార్థాలు తీసుకుంటే మీ రక్తంలో చక్కెర స్థాయిలు ఒక్కసారిగా పెరుగుతాయి. ఆ స్థాయిని తిరిగి తగ్గించడానికి మీ శరీరం అధిక మొత్తంలో ఇన్సులిన్‌ను విడుదల చేస్తుంది. ఇన్సులిన్‌ చర్మం ఎక్కువగా ఆయిల్స్‌ ఉత్పత్తి చేసేలా ప్రేరేపిస్తుంది. చర్మం రంధ్రాలు మూసుకుపోయి మొటిమలు వచ్చే అవకాశం ఉంది.

మొటిమలు అనేవి ఇన్‌ఫ్లమేషన్‌ కారణంగా వచ్చే చర్మ సమస్య. అంటే శరీరంలో ఇన్‌ఫ్లమేషన్‌ కలిగించే ఏ అంశమైనా మొటిమలు మళ్లీ రావడానికి కారణం కావచ్చు. రక్తంలో చక్కెర స్థాయిలు ఎక్కువ ఉండటాన్ని హైపర్‌గ్లైసీమియా అంటారు. హైపర్‌గ్లైసీమియా శరీరంలో ఇన్‌ఫ్లమేషన్‌ పెంచుతుంది. ఇన్‌ఫ్లమేషన్‌ వల్ల చర్మంపై వెంట్రుకల కుదుళ్ల మందంగా మారతాయి, చర్మంపై సెబమ్‌ పెరుగుతుంది. ఈ రెండు కారణాల వల్ల మొటిమల సమస్య వచ్చే అవకాశం ఉంది.

టీనేజ్‌లో మొటిమల సమస్య ఎక్కువగా ఉండటానికి ఒక కారణం ఉంటుంది. ఈ దశలో శరీరంలో ఆండ్రోజెన్‌ హార్మోన్‌ స్థాయిలు పెరుగుతాయి. దీనివల్ల చర్మం ఎక్కువ సెబమ్‌ను ఉత్పత్తి చేస్తుంది. ఈ అదనపు నూనె చర్మం రంధ్రాలను మూసివేసి, మొటిమలకు దారితీస్తుంది. మీరు టీనేజ్‌ దశ దాటినా మొటిమల సమస్య ఉంది. అంటే మీరు తినే ఆహారం ఆండ్రోజెన్ హార్మోన్లను ఎఫెక్ట్‌ చేసే అవకాశం ఉంది.

చక్కెర, అధిక గ్లైసెమిక్‌ పదార్థాలు ఎక్కువగా తినడం వల్ల ఇన్సులిన్‌ స్థాయిలు పెరుగుతాయి. అధిక ఇన్సులిన్‌ అడ్రినల్ గ్రంథులను ఎక్కువ ఆండ్రోజెన్ హార్మోన్లను ఉత్పత్తి చేసేలా ప్రేరేపిస్తాయి. ఈ హార్మోన్లు మొటిమలకు కారణమయ్యే సెబమ్‌ను ఎక్కువగా ఉత్పత్తి చేస్తాయి.

గట్ బ్యాక్టీరియా సమతుల్యతలో మార్పుల కారణంగా మొటిమల సమస్య వచ్చే అవకాశం ఉందని నిపుణులు చెబుతున్నారు. ముఖ్యంగా అలాంటి వారిలో గట్‌లో మంచి బ్యాక్టీరియా తక్కువ ఉండవచ్చని పరిశోధనలు సూచిస్తున్నాయి. పేగుల్లో ఉండే బ్యాక్టీరియాలో వచ్చే మార్పులు చర్మంపై కూడా ప్రభావం చూపగలవని కొన్ని అధ్యయనాలు చెబుతున్నాయి. కాబట్టి చక్కెర ఎక్కువగా ఉండే ఆహారాన్ని తీసుకోవడం వల్ల చెడు బ్యాక్టీరియా వృద్ధి చెంది అది మొటిమలకు దారితీయవచ్చు.

చక్కెర ఉన్న ఆహార పదార్థాలకు దూరంగా ఉంటే మొటిమల సమస్య పూర్తిగా నయం కాకపోవచ్చు. అయితే అది కచ్చితంగా మీ చర్మ ఆరోగ్యాన్ని మెరుగుపరుస్తుంది. తక్కువ గ్లైసెమిక్ ఇండెక్స్ ఉన్న ఆహారాన్ని తక్కువగా తీసుకుంటే, కార్బెహైడ్రేట్స్‌ను పరిమితం చేసి, ప్రాసెస్‌ చేసిన ఆహారాలకు దూరంగా ఉండే వారిలో మొటిమలు వచ్చే అవకాశం తక్కువని పరిశోధనలు చూపిస్తున్నాయి. అంతేకాదు మొటిమలు ఉన్నవారిలో వాటి తీవ్రత కూడా తగ్గుతుంది.

ముఖ్య గమనిక: ఈ కథనంలోని సమాచారం కేవలం అవగాహన కోసం మాత్రమే. కొన్ని అధ్యయనాలు, కొందరు నిపుణులు పేర్కొన్న అంశాల ఆధారంగా తెలియజేశాము. వీటిని ఎంత వరకు పాటించాలనేది పూర్తిగా మీ వ్యక్తిగత విషయం. సమయం తెలుగు వీటిని ధృవీకరించడం లేదు.