మహిళల ప్రీమియర్ లీగ్ (డబ్ల్యూపీఎల్) ఐదో సీజన్‌కు సంబంధించి బీసీసీఐ బిగ్ అప్‌డేట్ ఇచ్చింది. డబ్ల్యూపీఎల్ 2027 ఆటగాళ్ల వేలాన్ని అక్టోబర్ 28, 2026న కొచ్చిలోని గ్రాండ్ హయత్‌ హోటల్‌లో నిర్వహించనున్నట్లు బుధవారం ఐదు ఫ్రాంచైజీలకు అధికారికంగా సమాచారం అందించింది.
ఈ వేలం ద్వారా ఫ్రాంచైజీలు తమ జట్లను మరింత బలంగా తీర్చిదిద్దేందుకు సిద్ధమవుతున్నాయి.
రిటెన్షన్ డెడ్‌లైన్, బడ్జెట్ వివరాలు
ఆక్షన్ కంటే ముందే ఫ్రాంచైజీలు తమ వద్ద ఉన్న ఆటగాళ్లను రీటైన్ (నిలుపుకోవడం) లేదా రిలీజ్ చేయొచ్చు. ఇందుకోసం సెప్టెంబర్ 28, 2026ని తుది గడువుగా నిర్ణయించారు. ఈ సైకిల్‌లో ప్రతీ జట్టు బడ్జెట్ రూ. 15 కోట్లుగా ఉంది. ప్రతి జట్టులో గరిష్టంగా 18 మంది ఆటగాళ్లు ఉండవచ్చు, అందులో గరిష్టంగా ఆరుగురు విదేశీ ప్లేయర్లకు మాత్రమే అవకాశముంటుంది.టోర్నమెంట్ తేదీలు, ప్రధాన వేదికలు
మరోవైపు డబ్ల్యూపీఎల్ 2027 సీజన్ మ్యాచ్‌లు జనవరి 14న ప్రారంభమై ఫిబ్రవరి 7తో ముగియనున్నాయి. మ్యాచ్‌ల నిర్వహణ కోసం బీసీసీఐ ముంబైలోని క్రికెట్ క్లబ్ ఆఫ్ ఇండియా, వడోదరలోని కోటాంబి స్టేడియంలను ఖరారు చేసింది. సీజన్-4 కూడా ఈ రెండు వేదికల్లోనే జరగగా, వడోదరలో ఫైనల్ మ్యాచ్ సాగింది. ఇక వారణాసిలో కొత్తగా నిర్మిస్తున్న స్టేడియంలో కొన్ని మ్యాచ్‌లు నిర్వహిస్తారని ప్రచారం జరిగినప్పటికీ, డొమెస్టిక్ మ్యాచ్‌లతో పిచ్‌ను పరిశీలించిన తర్వాతే అక్కడ అవకాశం ఉంటుందని, ప్రస్తుతానికి అది అసంభవమని సమాచారం.గత సీజన్‌లో అద్భుత ప్రదర్శనతో ట్రోఫీని కైవసం చేసుకున్న రాయల్ ఛాలెంజర్స్ బెంగళూరు (ఆర్సీబీ) ఈసారి డిఫెండింగ్ ఛాంపియన్‌గా బరిలోకి దిగుతోంది. సెప్టెంబర్ 28న రిటెన్షన్ ప్రక్రియ పూర్తి కాగానే, అక్టోబర్ 28న కొచ్చిలో జరిగే ఆక్షన్‌తో ఏ జట్టు ఎంత బలంగా తయారవుతుందో తేలిపోనుంది. కాగా ఇప్పటివరకు మహిళల ప్రీమియర్ లీగ్ నాలుగు ఎడిషన్‌లో పూర్తి చేసుకుంది. తొలి ఎడిషన్‌లో ముంబై, రెండో ఎడిషన్‌లో ఆర్సీబీ విజేతలుగా నిలిచాయి. ఆ తర్వాత మూడో ఎడిషన్‌లో ముంబై, నాలుగో ఎడిషన్‌లో ఆర్సీబీ టైటిల్స్ అందుకున్నాయి.