డిఫెండింగ్ ఛాంపియన్ హోదాలో బరిలోకి దిగి.. ఎటాకింగ్ ఛాంపియన్‌లా ఆడి టైటిల్ సాధించింది. ఆదివారం అహ్మదాబాద్ వేదికగా గుజరాత్ టైటాన్స్‌తో జరిగిన మ్యాచులో గెలుపొంది ఈ ఫీట్ సాధించింది. 5 వికెట్ల తేడాతో విక్టరీ నమోదు చేసింది.

ఈ మ్యాచులో టాస్ గెలిచిన రాయల్ ఛాలెంజర్స్ బెంగళూరు కెప్టెన్ రజత్ పటీదార్ తొలుత బౌలింగ్ ఎంచుకున్నాడు. అయితే గుజరాత్ టైటాన్స్ ప్రధాన బలమైన టాప్-3 బ్యాటర్లు ఈ మ్యాచులో విఫలమయ్యారు. వీరంతా స్వల్ప స్కోరు చేసి పెవిలియన్ చేరిపోయారు. ఆ తర్వాత వాషింగ్టన్ సుందర్ హాఫ్ సెంచరీ చేయడంతో గుజరాత్ టైటాన్స్ నిర్ణీత 20 ఓవర్లలో 155/8 రన్స్ చేసింది.

అనంతరం ఛేజింగ్‌కు దిగిన ఆర్సీబీకి.. ఓపెనర్లు వెంకటేశ్ అయ్యర్ (16 బంతుల్లో 32 రన్స్), విరాట్ కోహ్లీ మెరుపు శుభారంభం ఇచ్చారు. తొలి వికెట్‌కు 27 బంతుల్లో 62 పరుగులు జోడించి.. జట్టుకు విజయాన్ని ఖరారు చేశారు. ఆ తర్వాత స్వల్ప వ్యవధిలోనే వెంకటేశ్ అయ్యర్, దేవ్‌ద్ పడిక్కల్ (1), రజత్ పటీదార్ (15), కృనాల్ పాండ్యా (1) ఔట్ అయ్యారు. అయితే ఓ పక్క వికెట్లు పడుతున్న ఛేజ్ మాస్టర్ విరాట్ కోహ్లీ మాత్రం నిలబడ్డాడు. చివరి వరకూ క్రీజులో ఉండి.. జట్టుకు రెండో ఐపీఎల్ టైటిల్ అందించాడు. చివరకు ఆర్సీబీ 18 ఓవర్లలో 5 వికెట్లు కోల్పోయి లక్ష్యాన్ని ఛేదించింది. 4 వికెట్ల తేడాతో విజయం సాధించింది. విరాట్ కోహ్లీ42 బంతుల్లో 75 రన్స్ స్కోరు చేసి, అజేయంగా నిలిచాడు.

ఈ ఫలితంతో రాయల్ ఛాలెంజర్స్ బెంగళూరు వరుసగా రెండో ఐపీఎల్ టైటిల్ సాధించింది. సుదీర్ఘ నిరీక్షణ తర్వాత గత సీజన్‌లో తొలి టైటిల్ అందుకున్న ఆ జట్టు.. ఈ సీజన్‌లోనూ అలాంటి ప్రదర్శనే రిపీట్ చేసింది. మరోవైపు ఐపీఎల్‌లో తమ అరంగేట్ర సీజన్ అయిన 2022లో విజేతగా నిలిచిన గుజరాత్.. రెండోసారి ఐపీఎల్ ఫైనల్‌లో ఓడిపోయింది. ఐపీఎల్ 2023 ఫైనల్‌లోనూ సీఎస్కే చేతిలో గుజరాత్ టైటాన్స్ పరాజయం పాలైంది.