ఆంధ్రప్రదేశ్ డిప్యూటీ సీఎం, జనసేన పార్టీ అధినేత వపన్ కళ్యాణ్ పుట్టినరోజు సందర్భంగా ప్రముఖులు శుభాకాంక్షలు తెలిపారు. తెలుగు రాష్ట్రాల్లో అభిమానులు సేవా కార్యక్రమాలు చేపట్టారు.
జనసేనానికి ప్రధాని నరేంద్ర మోదీ బర్త్ డే విషెస్ తెలిపారు. 'పవన్ కళ్యాణ్ గారికి జన్మదిన శుభాకాంక్షలు. ఆయనకు ప్రజల్లో ఎంతో గౌరవం ఉందని.. ఆంధ్రప్రదేశ్‌లో ఎన్డీఏ సుపరిపాలన ఎజెండాను ముందుడి నడిపిస్తున్నారు. సమాజ సేవలో ఆయన దీర్ఘాయుష్షుతో జీవించాలని ఆకాంక్షిస్తున్నాను' అంటూ ట్వీట్ చేశారు. ప్రధాని మోదీ ట్వీట్‌కు పవన్ కళ్యాణ్ రిప్లై ఇచ్చారు.
'నాకు పుట్టినరోజు శుభాకాంక్షలు, ఆశీర్వాదాలు అందించినందుకు నా హృదయపూర్వక కృతజ్ఞతలు. మీ ఆప్యాయత, ప్రోత్సాహంతో ఆంధ్రప్రదేశ్ ప్రజలకు మరింత నిబద్ధతతో సేవ చేయాలనే నా సంకల్పాన్ని బలపరిచింది. 140 కోట్ల మంది భారతీయుల కలలు, ఆకాంక్షలను మోస్తూ, సమైక్య భారత్ నిర్మాణం పట్ల మీకున్న నిబద్ధత దేశానికి స్ఫూర్తినిస్తోంది. మీ దార్శనిక నాయకత్వంలో, ఎన్డీఏ సమిష్టి బలంతో, సుపరిపాలన, అభివృద్ధి, ప్రజల సంక్షేమం కోసం మేము దృఢ నిశ్చయంతో ముందుకు సాగుతున్నాము. ఆంధ్రప్రదేశ్, దేశ సేవలో నా బాధ్యతలను ముందుకు తీసుకెళ్లేందుకు మీ ఆశీర్వాదం, మార్గదర్శకత్వాన్ని కోరుకుంటున్నాను' అంటూ పవన్ కళ్యాణ్ ట్వీట్ చేశారు.
కేంద్ర హోంమంత్రి అమిత్ షా పవన్ కళ్యాణ్‌కు పుట్టినరోజు శుభాకాంక్షలు తెలిపారు. 'ఆంధ్రప్రదేశ్ ఉప ముఖ్యమంత్రి శ్రీ పవన్ కళ్యాణ్ గారికి హృదయపూర్వక జన్మదిన శుభాకాంక్షలు. రాష్ట్ర అభివృద్ధి, ప్రజా సంక్షేమం కోసం ఎన్డీఏ నిర్దేశించిన లక్ష్యాలను సాకారం చేసే దిశగా మీరు అంకితభావంతో చేస్తున్న కృషి అభినందనీయం. ప్రజలకు నిరంతరం సేవలందించేందుకు మీకు ఆయురారోగ్యాలు ప్రసాదించాలని భగవంతుడిని ప్రార్థిస్తున్నాను' అంటూ ట్వీట్ చేశారు.
ఏపీ ముఖ్యమంత్రి చంద్రబాబు కూడా పవన్ కళ్యాణ్‌కు విషెస్ తెలిపారు. 'మిత్రులు, జనసేన పార్టీ అధ్యక్షులు, ఆంధ్రప్రదేశ్ రాష్ట్ర ఉప ముఖ్యమంత్రి పవన్ కల్యాణ్ గారికి హృదయపూర్వక జన్మదిన శుభాకాంక్షలు. పవర్ స్టార్‌గా అభిమానుల గుండెల్లో చిరస్థాయిగా ఉండే శ్రీ పవన్ కల్యాణ్ ఆయురారోగ్యాలతో నిండు నూరేళ్లూ వర్ధిల్లాలని మనస్ఫూర్తిగా ఆకాంక్షిస్తున్నాను. పంచాయతీ రాజ్ శాఖలో అనేక సంస్కరణలతో, అభివృద్ది కార్యక్రమాలతో పెనుమార్పులు తెస్తున్నారు. గిరిజన ప్రజల కష్టాలు తీర్చేలా రోడ్ల నిర్మాణం నుంచి పచ్చదనం పెంపు వరకు ఆయన తీసుకుంటున్న చర్యలు ఉత్తమ ఫలితాలను ఇస్తున్నాయి. మార్పును ఆవిష్కరిస్తున్నాయి. రాష్ట్ర పునర్నిర్మాణం విషయంలో ప్రజలకు కూటమి ఇచ్చిన మాటను నిజం చేసేలా అనునిత్యం పనిచేస్తున్న పవన్ కల్యాణ్ గారు ఇలాంటి పుట్టిన రోజులు మరెన్నో జరుపుకునేలా ఆశీర్వదించాలని ఆ దేవదేవుడిని ప్రార్థిస్తున్నాను' అంటూ ట్వీట్ చేశారు.
'డిప్యూటీ సీఎం పవన్ కళ్యాణ్ గారికి పుట్టినరోజు శుభాకాంక్షలు. సినీ అభిమానులకు పవర్ స్టార్, జనసైనికులకు సేనాని, నాకు దేవుడిచ్చిన అన్నయ్య పవనన్న ఆయురారోగ్య ఆనందాలతో వందేళ్లు వర్థిల్లాలి. తెలుగు రాష్ట్రాల్లో పండగను తలపించేలా పవనన్న జన్మదిన వేడుకలు, సేవా కార్యక్రమాలు నిర్వహిస్తున్న అభిమానులకు అభినందనలు' అంటూ మంత్రి లోకేష్ ట్వీట్ చేశారు. 'ఆంధ్రప్రదేశ్ డిప్యూటీ సీఎం పవన్ కళ్యాణ్‌గారికి హృదయపూర్వక పుట్టినరోజు శుభాకాంక్షలు. శ్రీ వెంకటేశ్వర స్వామి మీకు మంచి ఆరోగ్యం, సంతోషం, బలం మరియు ప్రజా సేవకు అంకితమైన దీర్ఘాయువును ప్రసాదించాలి' అంటూ మాజీ ఎంపీ విజయసాయిరెడ్డి ట్వీట్ చేశారు.