ఆంధ్రప్రదేశ్‌లోని రాజ్యసభ స్థానాల ఎన్నికలకు నోటిఫికేషన్ విడుదలైంది. ఏపీ సహా పది రాష్ట్రాల్లోని రాజ్యసభ సీట్లకు ఎన్నికల సంఘం నోటిఫికేషన్ విడుదల చేసింది.
జూన్ 18న ఎన్నికలు నిర్వహించనున్నారు. జూన్ ఒకటో తేదీ నుంచి ఎనిమిదో తేదీ వరకూ నామినేషన్ల స్వీకరణ గడువు ఉంది జూన్ 9న నామినేషన్ల పరిశీలన జరుగుతుంది. జూన్ 11వ తేదీ వరకూ నామినేషన్ల ఉపసంహరణకు గడువు ఇచ్చారు. జూన్ 18న ఎన్నికల జరగనుండగా.. సాయంత్రం ఐదు గంటల నుంచి లెక్కింపు ఉంటుంది. జూన్ 20వ తేదీ నాటికి ఎన్నికల ప్రక్రియ పూర్తి చేయనున్నట్లు ఎన్నికల సంఘం వెల్లడించింది.
మరోవైపు ఏపీలోని నాలుగు రాజ్యసభ స్థానాలకు ఎన్నికలు జరగనున్నాయి. ఈ నేపథ్యంలో అధికార టీడీపీలో రాజ్యసభ సీటును ఆశిస్తున్న ఆశావహుల సంఖ్య పెరుగుతోంది. సీటు కోసం ఇప్పటికే పలువురు నేతలు లాబీయింగ్ మొదలుపెట్టారు. రాజ్యసభ సీటు కోసం పలువురు సీనియర్ నేతలు, సుదీర్ఘ కాలంగా పార్టీకి సేవలు అందించిన వారు పోటీ పడుతున్నారు. ఆంధ్రప్రదేశ్ అసెంబ్లీలో ఎన్డీఏ కూటమికి పూర్తి మెజారిటీ ఉన్న నేపథ్యంలో నాలుగు రాజ్యసభ స్థానాలు ఏకగ్రీవమయ్యే అవకాశాలు ఉన్నాయి. ఈ నేపథ్యంలో పెద్దల సభకు వెళ్లేందుకు పలువురు నేతలు ఇప్పటికే లాబీయింగ్ మొదలుపెట్టినట్లు తెలుస్తోంది.
ఆమెకు అవకాశం ఉంటుందా?
మరోవైపు నాలుగు రాజ్యసభ సీట్లలో ఈసారికి బీజేపీకి అవకాశం ఉండకపోవచ్చని వార్తలు వస్తున్నాయి. ఈసారికి రాజ్యసభ సీటు అడగవద్దని టీడీపీ అధినేత నారా చంద్రబాబు నాయుడు బీజేపీ అధిష్టానాన్ని కోరినట్లు పార్టీ వర్గాలు చెప్తు్న్నాయి. గతంలో రెండు రాజ్యసభ స్థానాలను బీజేపీకి ఇచ్చామని.. ప్రస్తుతం టీడీపీ నుంచి ఎక్కువ మంది ఆశిస్తున్న నేపథ్యంలో ఈసారికి సీటు అడగొద్దని కోరినట్లు తెలిసింది. అలాగే కూటమిలోని మరో భాగస్వామ్య పార్టీ జనసేనకు ఒక సీటు ఇవ్వాల్సిన సంగతిని వివరించినట్లు సమాచారం. దీనిపై బీజేపీ నుంచి ఎలాంటి అధికారిక ప్రకటన లేనప్పటికీ.. నాలుగు సీట్లలో మూడు టీడీపీ, ఒకటి జనసేన తీసుకునే అవకాశాలు ఉన్నాయని రాజకీయ విశ్లేషకులు విశ్లేషిస్తున్నారు.
రాజ్యసభ రేసులో పలువురు సీనియర్ నేతలు..
మొత్తంగా రాజ్యసభ స్థానం కోసం పలువురు సీనియర్లు, జూనియర్లు పోటీపడుతున్న తరుణంలో.. నారా లోకేష్ ఆశావహుల జాబితాను సిద్ధం చేస్తారని, వీటిలో నుంచి తగిన పేర్లను చంద్రబాబు ఎంపిక చేస్తారని టీడీపీ వర్గాలు చెప్తున్నాయి. ఈ నేపథ్యంలో ఎవరా నలుగురు అనేది ఇప్పుడు ఏపీ రాజకీయాల్లో ఆసక్తికరంగా మారింది.