టాలీవుడ్ ప్రముఖ నిర్మాత, నటుడు బండ్ల గణేష్ ఇంట్లో ప్రస్తుతం పెళ్లి సందడి నెలకొంది. ఆయన కుమార్తె జనని బండ్ల వివాహం పశ్చిమ గోదావరి జిల్లాకు చెందిన సూర్యతేజ చిలుకూరితో నిశ్చయమైంది.

ఈ క్రమంలో ఆదివారం ఉదయం(మే 3) వీరిద్దరి నిశ్చితార్థ వేడుక అత్యంత వైభవంగా నిర్వహించారు. ఈ నిశ్చితార్థ వేడుకకు సినీ, రాజకీయ రంగాల నుండి దిగ్గజాలు తరలివచ్చి నూతన వధూవరులను ఆశీర్వదించారు. మెగాస్టార్ చిరంజీవి తన సతీమణి సురేఖ, పెద్ద కుమార్తె సుస్మిత కొణిదెలతో కలిసి విచ్చేసి సందడి చేశారు. మాజీ ఉపరాష్ట్రపతి వెంకయ్యనాయుడు ఈ వేడుకకు హాజరై కాబోయే దంపతులను ఆశీర్వదించారు. దర్శకేంద్రుడు కె. రాఘవేంద్రరావు, హాస్య బ్రహ్మ బ్రహ్మానందం, ప్రముఖ రచయిత కోన వెంకట్, నటుడు శివాజీ, నిర్మాత సి. కల్యాణ్, దర్శకుడు శ్రీను వైట్ల తదితరులు పాల్గొని వేడుకలో ఆత్మీయతను నింపారు. ఈ వేడుకకు సంబంధించిన ఫోటోలు, వీడియోలు నెట్టింట వైరల్‌గా మారాయి.

* హాలీవుడ్ తెరపై 'అబూ'గా మెరవాల్సిన మెగాస్టార్ .. ఆ ప్రయోగం ఎందుకు ఆగిపోయింది?

అల్లుడి బ్యాగ్రౌండ్
బండ్ల గణేష్‌కి అల్లుడు కాబోతున్న సూర్యతేజ చిలుకూరి పశ్చిమ గోదావరి జిల్లాకు చెందినవారు. సూర్యతేజ కుటుంబానికి రియల్ ఎస్టేట్ రంగంతో పాటు పలు వ్యాపారాల్లో బలమైన నేపథ్యం ఉందని సమాచారం. వీరికి కోట్లాది రూపాయల ఆస్తులు ఉన్నట్లు ఫిలిం నగర్ వర్గాల్లో చర్చ జరుగుతోంది. అటు పౌల్ట్రీ వ్యాపారంలో సుస్థిర స్థానం ఉన్న బండ్ల గణేష్ కుటుంబానికి, ఇటు బలమైన వ్యాపార నేపథ్యం ఉన్న చిలుకూరి కుటుంబం తోడు కావడంతో ఈ వివాహం అందరి దృష్టిని ఆకర్షిస్తోంది.