ఈ ఘటనపై ఆర్మీ అధికారుల ఫిర్యాదు మేరకు బొల్లారం పోలీసులు కేసు నమోదు చేసి దర్యాప్తు చేపట్టారు. రక్షణ వ్యవహారాలకు సంబంధించిన సున్నితమైన అంశం కావడంతో పోలీసులు కేసుకు సంబంధించిన పూర్తి వివరాలను గోప్యంగా ఉంచుతున్నారు.

కంటోన్మెంట్‌ ప్రాంతంలో రక్షణ దళాలకు చెందిన పలు శిక్షణ సంస్థలు, రెజిమెంట్లు కొనసాగుతున్నాయి. వాటిలో మద్రాస్‌ రెజిమెంట్‌ కూడా ఒకటి. ఆర్మీ సిబ్బంది ఆయుధాలను భద్రపరిచే ప్రత్యేక విభాగం ఇక్కడ ఉంది. అనుమతి ఉన్న వ్యక్తులు మినహా ఇతరులకు ప్రవేశం ఉండని ఈ ప్రాంతంలో ఆదివారం రాత్రి చోరీ జరిగినట్లు అధికారులు గుర్తించారు. ఆయుధాలు భద్రపరిచే గది తాళం పగులగొట్టిన ఆనవాళ్లు కనిపించడంతో అధికారులు అప్రమత్తమయ్యారు. తనిఖీలు నిర్వహించగా నాలుగు ఏకే-47 రైఫిళ్లు, ఆరు పిస్టళ్లు, ఒక ఇన్‌సాస్‌ రైఫిల్‌తో పాటు మందుగుండు సామగ్రి కనిపించకపోవడం గుర్తించారు. దీంతో ఆర్మీ ఉన్నతాధికారులు వెంటనే పోలీసులకు సమాచారం అందించారు. ఘటనకు సంబంధించి సోమవారం ఉదయం బొల్లారం పోలీస్‌స్టేషన్‌లో ఫిర్యాదు చేయడంతో కేసు నమోదైంది.

చోరీ జరిగిన ప్రదేశాన్ని ఆర్మీ, పోలీసు అధికారులు పరిశీలించారు. అత్యంత భద్రత ఉండే ప్రాంతంలోకి బయట వ్యక్తులు ప్రవేశించే అవకాశం పరిమితంగా ఉండటంతో.. ఘటనలో లోపలి వ్యక్తుల ప్రమేయం ఉండొచ్చన్న కోణంలోనూ దర్యాప్తు సాగుతోంది. ఆయుధాల భద్రత, వాటి నిర్వహణకు సంబంధించిన సిబ్బంది వివరాలను అధికారులు పరిశీలిస్తున్నట్లు సమాచారం. ఘటనపై మల్కాజిగిరి పోలీస్‌ కమిషనరేట్‌ ఉన్నతాధికారులు ప్రత్యేక దృష్టి సారించారు. మద్రాస్‌ రెజిమెంట్‌ పరిసరాల్లోని సీసీ కెమెరాల ఫుటేజీలను పరిశీలిస్తూ అనుమానాస్పద కదలికలను గుర్తించే ప్రయత్నం చేస్తున్నారు. చోరీ జరిగిన సమయానికి అక్కడ విధుల్లో ఉన్న సిబ్బంది, అనుమతితో రాకపోకలు సాగించిన వ్యక్తుల వివరాలను కూడా పరిశీలిస్తున్నట్లు తెలుస్తోంది.

ఒక్క వ్యక్తి ఈ చోరీకి పాల్పడటం కష్టమై ఉండొచ్చని పోలీసులు ప్రాథమికంగా భావిస్తున్నారు. ఆయుధాల గది వరకు చేరుకోవడం, గుట్టు చప్పుడు కాకుండా తాళాన్ని ధ్వంసం చేయడం, ఆయుధాలను తీసుకెళ్లడం వంటి అంశాలను పరిగణనలోకి తీసుకుని ఒకరి కంటే ఎక్కువ మంది ప్రమేయం ఉన్న కోణంలోనూ దర్యాప్తు చేస్తున్నారు. ఇదే సమయంలో ఆర్మీ అధికారులు తమ పరిధిలో అంతర్గత విచారణ చేపట్టి సిబ్బందిని ప్రశ్నిస్తున్నట్లు సమాచారం.