తెలుగు నేలపై 'పవన్ కళ్యాణ్' అనేది కేవలం ఒక పేరు మాత్రమే కాదు.. అదొక బలమైన భావోద్వేగం, కోట్లాది మంది అభిమానుల గుండెచప్పుడు. వెండితెరపై ఆయన నడిచొస్తే థియేటర్లు దద్దరిల్లుతాయి..
ప్రజాక్షేత్రంలో ఆయన గొంతు విప్పితే లక్షలాది మందిలో పోరాట స్ఫూర్తి రగులుకుంటుంది. మెగాస్టార్ తమ్ముడిగా సినీ రంగ ప్రవేశం చేసి, తనదైన మేనరిజం, నటన, విలక్షణ వ్యక్తిత్వంతో మహాశక్తిగా ఎదిగారాయన. నటుడిగా శిఖరాగ్రాన ఉన్నప్పుడే ప్రజాసేవ కోసం అన్ని భోగాలను తృణప్రాయంగా వదులుకుని రాజకీయాల్లోకి అడుగుపెట్టారు. దశాబ్ద కాలం పాటు ఎదురైన అవమానాలు, ఓటములను గుండె ధైర్యంతో తట్టుకుని.. 2024లో ప్రభంజనం సృష్టించి ఆంధ్రప్రదేశ్ ఉప ముఖ్యమంత్రిగా పాలనా పగ్గాలు చేపట్టారు. నేడు (సెప్టెంబర్ 2) ఆయన పుట్టినరోజు సందర్భంగా 'సమయం' అందిస్తోన్న ప్రత్యేక కథనం ఇది.
కళ్యాణ్ కుమార్ నుంచి కళ్యాణ్ బాబుగా..
కొణిదెల వెంకట్రావు, అంజనా దేవి దంపతులకు 1971, సెప్టెంబర్ 2న బాపట్లలో మూడో కుమారుడిగా జన్మించారు. తల్లిదండ్రులు పెట్టిన అసలు పేరు కళ్యాణ్ కుమార్. ఇంట్లో అందరికంటే చిన్నవాడు కావడంతో కుటుంబ సభ్యులు ఆయనను ముద్దుగా 'కళ్యాణ్ బాబు' అని పిలిచేవారు. . తండ్రి ఉద్యోగ రీత్యా వివిధ ప్రాంతాలకు బదిలీ అవుతుండటంతో రాష్ట్రంలోని భిన్న ప్రాంతాల యాసలు, సంస్కృతులు, సామాన్య ప్రజల కష్టాలను ఆయన చిన్నతనం నుంచే దగ్గరిగా గమనించారు. చిన్ననాటి ఆర్థిక ఇబ్బందులు, పేదరికం ఆయన మనసును బలంగా ప్రభావితం చేశాయి.
ట్రెండ్‌ సెట్ చేసిన పవర్ స్టార్
1996లో 'అక్కడమ్మాయి ఇక్కడ అబ్బాయి' చిత్రంతో తెలుగు సినీ పరిశ్రమలోకి అడుగుపెట్టారు. మార్షల్ ఆర్ట్స్‌పై ఉన్న మక్కువతో కరాటేలో బ్లాక్ బెల్ట్ సాధించిన ఆయన తన నైపుణ్యంతో 'పవన్' అనే బిరుదును అందుకుని పవన్ కళ్యాణ్‌గా మారారు. అప్పటికే స్టార్ హీరోల హవా నడుస్తున్న సమయంలో తన విలక్షణమైన స్టైల్, యాటిట్యూడ్‌తో సరికొత్త ట్రెండ్‌ను సృష్టించారు. సుస్వాగతం, తొలిప్రేమ, తమ్ముడు, బద్రి, ఖుషీ చిత్రాలతో వరుస విజయాలు సాధించి యూత్ ఐకాన్‌గా ఎదిగారు. కేవలం నటనకే పరిమితం కాకుండా మార్షల్ ఆర్ట్స్ కొరియోగ్రాఫర్‌గా, స్క్రీన్ ప్లే రచయితగా, దర్శకుడిగా, గాయకుడిగా, నిర్మాతగా తన బహుముఖ ప్రజ్ఞను చాటుకున్నారు. గబ్బర్ సింగ్, అత్తారింటికి దారేది వంటి బ్లాక్‌బస్టర్లతో బాక్సాఫీస్ రికార్డులను తిరగరాసి ఇండస్ట్రీలో తిరుగులేని 'పవర్ స్టార్'గా నిలిచారు. గతేడాది 'ఓజీ'తో రూ.300 కోట్ల క్లబ్‌లోకి ఎంటరై తన కెరీర్లోనే బిగ్గెస్ట్ బ్లాక్‌బస్టర్ అందుకున్నారు.
రాజకీయాల్లోకి ఎంట్రీ
2008లో అన్నయ్య చిరంజీవి స్థాపించిన 'ప్రజారాజ్యం'లో యువరాజ్యం(యువజన విభాగం) అధ్యక్షుడిగా తన రాజకీయ ప్రయాణాన్ని ప్రారంభించారు. ఆ పార్టీ కాంగ్రెస్‌లో విలీనం కావడం ఆయనను తీవ్రంగా కలచివేసింది. దీంతో స్వచ్ఛమైన రాజకీయాలు, ప్రశ్నించే తత్వమే ధ్యేయంగా 2014 మార్చిలో 'జనసేన పార్టీ'ని స్థాపించారు. 2014 ఎన్నికల్లో ప్రజల క్షేమం కోసం పోటీ చేయకుండా టీడీపీ-బీజేపీ కూటమికి మద్దతు పలికి ప్రభుత్వ ఏర్పాటులో కీలక పాత్ర పోషించారు.
ఓటముల నుంచి ఉద్భవించిన విజేత
2019 సార్వత్రిక ఎన్నికల్లో జనసేన ఒంటరిగా బరిలోకి దిగింది. భీమవరం, గాజువాక రెండు స్థానాల్లో పోటీ చేసిన పవన్ కళ్యాణ్ ఓటమి పాలయ్యారు. పవన్ కళ్యాణ్ జన్మలో శాసనసభ గేటు కూడా తాకలేరంటూ ప్రత్యర్థులు చేసిన వ్యక్తిగత దూషణలు, విమర్శలకు ఆయన ఎక్కడా కుంగిపోలేదు. 2019-2024 మధ్య కాలంలో ప్రజా సమస్యలపై రాజీలేని పోరాటం చేస్తూ పార్టీ శ్రేణుల్లో ఆత్మవిశ్వాసం నింపారు. ప్రభుత్వ వ్యతిరేక ఓటు చీలకూడదన్న ఏకైక లక్ష్యంతో టీడీపీ, బీజేపీలను ఒకే వేదికపైకి తెచ్చి కూటమిని నిర్మించారు. 2024 ఎన్నికల్లో పిఠాపురం నియోజకవర్గం నుంచి భారీ మెజార్టీతో ఘనవిజయం సాధించడమే కాకుండా, పోటీ చేసిన 21 అసెంబ్లీ, 2 ఎంపీ స్థానాల్లో జనసేన అభ్యర్థులను గెలిపించి 100 శాతం స్ట్రైక్ రేట్‌తో దేశ ఎన్నికల చరిత్రలోనే సరికొత్త రికార్డు సృష్టించారు.
ఉప ముఖ్యమంత్రిగా సమర్థవంతమైన పాలన
ఆంధ్రప్రదేశ్ ఉప ముఖ్యమంత్రిగా బాధ్యతలు స్వీకరించిన పవన్ కళ్యాణ్.. పంచాయతీరాజ్, గ్రామీణాభివృద్ధి, అటవీ, పర్యావరణ, సైన్స్ అండ్ టెక్నాలజీ శాఖల మంత్రిగా పాలనలో తనదైన ముద్ర వేస్తున్నారు. ఒకే రోజులో రాష్ట్రవ్యాప్తంగా ఉన్న 13,326 గ్రామ పంచాయతీల్లో గ్రామసభలు నిర్వహించి రికార్డు సృష్టించారు. పల్లెల అభివృద్ధి, గిరిజన ప్రాంతాలకు రహదారి, విద్యుత్ సౌకర్యాల కల్పన, స్వచ్ఛభారత్ అమలు, అటవీ సంపద పరిరక్షణలో ఆయన తీసుకుంటున్న నిర్ణయాలు జాతీయ స్థాయిలో ప్రశంసలు అందుకుంటున్నాయి.
అనారోగ్యాన్ని లెక్కచేయని ధీరుడు
ప్రజాసేవలో నిరంతరం శ్రమిస్తున్న పవన్ కళ్యాణ్ తీవ్రమైన భుజం నొప్పితో (రోటేటర్ కఫ్ గాయం) బాధపడుతూ కొద్దిరోజుల క్రితం ముంబైలోని కోకిలాబెన్ అంబానీ ఆసుపత్రిలో కుడి భుజానికి శస్త్రచికిత్స చేయించుకున్నారు. వైద్యులు కనీసం రెండు నెలల పాటు పూర్తి విశ్రాంతి అవసరమని సూచించినప్పటికీ, డిప్యూటీ సీఎంగా తన పాలనా బాధ్యతలను నిర్వర్తించేందుకు వారం రోజుల్లోనే విధుల్లో చేరారు. వరద ప్రభావిత ప్రాంతాల పర్యటనలు, వరుస సమీక్షా సమావేశాలతో విశ్రాంతి లేకపోవడంతో ఆపరేషన్ జరిగిన భాగంలో వాపు పెరిగి, తీవ్ర జ్వరం బారిన పడ్డారు. దీంతో వైద్యుల సూచన మేరకు పూర్తిస్థాయి ఉపశమనం కోసం కేరళలోని త్రిస్సూర్ సమీపంలోని ప్రముఖ ఆయుర్వేద, ప్రకృతి చికిత్స కేంద్రానికి చేరుకున్నారు. అక్కడ సుమారు 20 రోజుల పాటు ప్రత్యేక థెరపీలు తీసుకుని, సంపూర్ణ ఆరోగ్యంతో తిరిగి ప్రజా సేవలోకి అడుగుపెట్టేందుకు సిద్ధమవుతున్నారు. నేడు పవన్ కళ్యాణ్ పుట్టినరోజు సందర్బంగా ఆయన అభిమానులు, ఫాలోవర్లు సోషల్‌మీడియాలో వేదికగా ఆయనకు శుభాకాంక్షలు తెలియజేస్తున్నారు.