Flight Offers: భారత దిగ్గజ విమానయాన సంస్థ ఇండిగో (ఇంటర్‌గ్లోబ్ ఏవియేషన్) తన 20వ వార్షికోత్సవం సందర్భంగా ప్రయాణికుల కోసం అదిరిపోయే ఆఫర్ ప్రకటించింది.
హ్యాపీ ఇండిగో డే ఆఫర్ పేరిట ప్రత్యేక ప్రమోషనల్ క్యాంపెయిన్ లాంఛ్ చేసింది. ఇందులో భాగంగా మొత్తంగా 3 రోజుల వ్యవధిలో 20 వేల ఉచిత టికెట్లను అందించనుంది. అంటే ఇక్కడ ఒక్కో పీఎన్‌ఆర్‌పై గరిష్ఠంగా రూ. 10 వేల వరకు టికెట్ అమౌంట్ మొత్తాన్ని రీఫండ్ చేస్తుంది. ఇది అందరికీ లభించే ఆఫర్ కాదు. నిర్దిష్ట నిబంధనల ప్రకారం ఎంపిక చేసిన వారికే వర్తిస్తుంది. ఆగస్ట్ 4 నుంచి 6 వరకు చేసిన బుకింగ్‌లకు మాత్రమే ఈ ఆఫర్ అందుబాటులో ఉంటుంది. పూర్తి వివరాలు, నియమ నిబంధనల గురించి చూద్దాం.
ఇండిగో అధికారిక వెబ్‌సైట్ లేదా మొబైల్ యాప్ లేదా Skai ప్లాట్‌ఫామ్ ద్వారా దేశీయ విమాన టికెట్లు బుక్ చేసిన ప్రయాణికులు ఈ క్యాంపెయిన్‌కు అర్హులు. ఎకానమీ, స్ట్రెచ్ క్లాసుల్లో వన్‌వే, రౌండ్ ట్రిప్, కనెక్టింగ్, మల్టీసిటీ బుకింగ్‌లకు ఈ అవకాశం ఉంటుంది. అయితే అంతర్జాతీయ బుకింగ్స్, కోడ్‌షేర్ విమానాలు, ట్రావెల్ ఏజెంట్లు లేదా ఇతర థర్డ్ పార్టీ ప్లాట్‌ఫామ్స్ ద్వారా చేసే బుకింగ్స్ ఈ ఆఫర్ కింద వర్తించవు. అలాగే ఒక మొబైల్ నంబర్ నుంచి లేదా ఇ- మెయిల్ ఐడీపై ఒకసారి మాత్రమే అవకాశం ఉంటుంది.
ఎలా ఎంపిక చేస్తారు?
ఈ స్పెషల్ క్యాంపెయిన్‌లో పాల్గొన్న వారిలో ర్యాండమ్ కంప్యూటర్ డ్రా ద్వారా విజేతల్ని ఎంపిక చేస్తారు. ఎంపికైన వారికి వారి రిజిస్టర్డ్ ఇమెయిల్, వాట్సాప్‌కు ఇండిగోకు సంబంధించిన ఒక ప్రశ్న పంపిస్తారు. దానికి 48 గంటల్లోగా సరైన సమాధానం పంపాల్సి ఉంటుంది. మొత్తం 3 అవకాశాలు ఉంటాయి. సరైన సమాధానం చెప్పిన వారికే ఉచిత టికెట్ ప్రయోజనం ఉంటుంది.తొలి రోజు 10 వేల మంది, తర్వాత 5 వేల చొప్పున ఫ్రీ టికెట్లు
విజేతలకు వారు బుక్ చేసిన టికెట్లకు సంబంధించిన ఎయిర్‌ఫేర్‌తో పాటు పన్నులు కలిపి గరిష్ఠంగా రూ. 10 వేల వరకు రీఫండ్ ఇస్తారు. ఈ మొత్తం ఒరిజినల్ పేమెంట్ మోడ్ ద్వారా 3 నుంచి 5 రోజుల్లో తిరిగి జమవుతుంది. 3 రోజుల ఆఫర్ పీరియడ్‌లో మొత్తంగా 20 వేల మందిని ఎంపిక చేస్తారు. దీంట్లో తొలిరోజు అంటే ఆగస్ట్ 4న 10 వేల మంది, రెండు, మూడో రోజుల్లో 5 వేల మంది చొప్పున ఎంపిక చేయనున్నారు. ఇక్కడ ఇండిగో 20 వేల ఫ్రీ టికెట్స్ అని చెప్పినప్పటికీ అదృష్టం ఉండాలి. ముందుగా ర్యాండమ్ డ్రాలో ఎంపిక కావాలి. తర్వాత ఇండిగో ప్రశ్నకు సమాధానం ఇవ్వాలి. దీన్ని లక్కీ డ్రా ఆధారిత ప్రమోషనల్ క్యాంపెయిన్ అని చెప్పొచ్చు. పూర్తి వివరాల కోసం ఈ లింక్‌పై క్లిక్ చేయండి.