Intinti Ramayanam May 30th Episode: పల్లవిని అవని కొట్టడం అనేది ఈ సీరియల్‌లో చాలా రొటీన్.. వారానికి రెండు మూడుసార్లైనా పల్లవిని నాలుగు పీకడం..

ఐదారు వార్నింగ్‌లు ఇవ్వడం చాలా కామన్. అయితే నేటి (మే 30) ఎపిసోడ్‌లో అవని ముందే మీనాక్షిని కొట్టింది పల్లవి.

ఇక అవని.. గరిటె పట్టుకుని వంట చేస్తుంటే.. అక్షయ్ వచ్చి ఆగలేకపోతున్నాను అని అంటాడు అక్షయ్. ఛీ ఛీ.. అవేం మాటలు అని సిగ్గుపడిపోతుంది అవని. నేను అన్నది దాని గురించి కాదు కానీ.. రాజేశ్వరి, శ్రియ, భరత్ వీళ్లందర్నీ ఎలా తీసుకొచ్చావ్? ఏం చేశావ్ అని అడుగుతాడు. ఏదొకటి చేశానులే కానీ.. అవన్నీ ఇప్పుడెందుకు.. నాకంత టైమ్ లేదు అని అక్కడ నుంచి మెల్లగా జారుకుంటుంది అవని. అసలు అవని ఏం చేసి ఉంటుంది అంటూ ఆలోచనలో పడతాడు అక్షయ్. అటు చక్రధర్.. 'ఇదే మంచి సమయం అవనీ.. అందరికీ నిజం చెప్పేయ్ అని అంటాడు. ఇప్పుడు చెప్తే ఆరాధ్య ఫంక్షన్ డిస్ట్రబ్ అవుతుంది.. ఫంక్షన్ కాగానే చెప్తాను అని అంటుంది అవని.

ఇక అక్షయ్.. అవని వెంటపడి.. వీళ్లందర్నీ ఎలా తీసుకుని వచ్చావో చెప్పు అని అడుగుతాడు. 'ఏం లేదండీ.. శ్రియకి ఫోన్ చేస్తే రానన్నది. దాంతో.. మామయ్య త్వరలోనే కోమాలో నుంచి బయటకు వస్తున్నారు.. ఆయన రాగానే ఎవరి ఆస్తి వాళ్లకి ఇస్తారు అని ఆశ కల్పించాను. ఆయన సృహలోకి వచ్చాక మీరు ఇక్కడ లేరంటే మామయ్య ఆలోచన మారిపోతుందని చెప్పాను. ఆ మాట చెప్పగానే పరుగెత్తుకుని వచ్చేసింది. అలాగే రాజేశ్వరి పిన్నికి.. భరత్‌ని తీసుకుని రాకపోతే.. పల్లవి మీకు పుట్టలేదనే నిజం అందరికీ చెప్పేస్తా అని అన్నారు.. దెబ్బకి భయంతో వచ్చేసింది.. శ్రియకి ఆశ కల్పించాను.. రాజేశ్వరి పిన్నికి భయం కల్పించాను. నేనేం చేసినా లోక కళ్యాణం, మన ఇల్లు బావుండాలనేనండీ' అని అంటుంది అవని.

ఇక పల్లవి.. ఆరాధ్య కొత్త డ్రెస్‌ని ముక్కలుగా కత్తిరించేస్తుంది. అయితే కేక్ కటింగ్ టైమ్‌కి ఆ డ్రెస్‌తోనే ఆరాధ్య రావడం చూసి షాక్ అవుతుంది పల్లవి. డ్రెస్ అద్దిరిపోయిందని అందరూ అంటుంటే.. పల్లవి మాత్రం దిక్కులు చూస్తుంటుంది. ఇంతలో అవని వచ్చి.. 'ఆ డ్రెస్‌ని ముక్కలు చేసింది నువ్వేనని నాకు తెలుసు అని చెవిలో ఊదుతుంది. అయితే ఆ ముక్కలు చేసిన డ్రెస్‌ని మీనాక్షి సరి చేస్తుంది. ఆ డ్రెస్‌ని నేనే ముక్కలు చేశాననడానికి సాక్ష్యం ఏంటి అని అడుగుతుంది పల్లవి. 'చెప్తే కమల్ నిన్ను తిరిమితరిమి కొడతాడు.. నీ కారణంగా నా కూతురి ఫంక్షన్ డిస్ట్రబ్ కావడం ఇష్టం లేదు కాబట్టి సైలెంట్‌గా ఉన్నాను.. ఫంక్షన్ అయిపోనియ్ అప్పుడు చెప్తా నీ సంగతి' అని అంటుంది అవని.

నా సంగతి నువ్వు చెప్పడం కాదు.. నీ సంగతే నేను తేల్చుతా.. ఈ ఫంక్షన్‌లో నువ్వూ మీ అమ్మా అందరి ముందు తలదించుకునేట్టు చేస్తా.. అని అనుకుంటుంది పల్లవి. ఇక ఆరాధ్య కేక్ కట్ చేయడంతో అందరూ కలిసి కేక్ తినిపిస్తారు. ఇంతలో మన ఫిటింగ్ మాస్టర్ అవని.. 'నాన్నా రండీ అని చక్రధర్‌ని పిలుస్తుంది. అయితే మనోడికి ఇద్దరు పెళ్లాలు కాబట్టి.. ఏ పెళ్లంతో వెళ్తాడా అని అంతా చూస్తుంటారు. దాంతో చక్రధర్.. రా మీనాక్షీ అని ప్రేమగా పిలుస్తాడు. ఆ పిలుపుతో రాజేశ్వరి రగిలిపోతుంటుంది. పల్లవి కూడా పగతో ఉడికిపోతుంది.