ఆయన ప్రాతినిధ్యం వహిస్తున్న పిఠాపురంలో జనసేన యువజన విభాగాన్ని ప్రారంభించారు. జనసేన పార్టీ పీఏసీ ఛైర్మన్‌, రాష్ట్ర పౌర సరఫరాల శాఖ మంత్రి నాదెండ్ల మనోహర్‌ జై కొట్టు లోగో ఆవిష్కరించారు. యువజన విభాగం కోసం 'జై కొట్టు' పేరుతో ప్రత్యేకంగా పాటను కూడా విడుదల చేశారు.. ఈ పాటకు థమన్ మ్యూజిక్ అందించారు. జనసేన పార్టీ అధినేత పవన్ కళ్యాణ్ ప్రస్తుతం కేరళలో ఉండటంతో ⁠యువజన విభాగం ప్రారంభ కార్యక్రమానికి హాజరు కాలేకపోయారు.. అందుకే ఆయన ఆడియో మెసేజ్ పంపించారు.

జనసేన అధినేత, డిప్యూటీ సీఎం పవన్ కళ్యాణ్ గత రెండు మూడు నెలలుగా ఆరోగ్య సమస్యలతో ఇబ్బందిపడుతున్నారన్నారు మంత్రి నాదెండ్ల మనోహర్. ఈ కారణంగా ప్రజలకు, పార్టీకి పూర్తిస్థాయిలో సమయం కేటాయించలేకపోతున్నారని.. ఆయన ఎక్కడ ఉన్నా ప్రజల గురించి ఆలోచిస్తూ ఉంటారన్నారు.. గత ఎన్నికల సమయంలో జనసేన పార్టీ కీలకంగా వ్యవహరించి.. జగన్‌ను ఎదుర్కొని కూటమి విజయంలో ముఖ్యమైన పాత్రను పొషించిందన్నారు. స్థానిక సంస్థల ఎన్నికల్లో కూడా జనసైనికులు కష్టపడి పనిచేసి అభ్యర్థుల్ని గెలిపించలని పిలుపునిచ్చారు. జనసేన పార్టీకి జనసైనికులే బలమని.. ఎన్ని కష్టాలొచ్చినా సరే వాటిని తట్టుకుని ధైర్యంగా నిలబడ్డారన్నారు. యువత కూడా రాజకీయాల్లోకి రావాలన్నారు.

చెయ్యొత్తి 'జై కొట్టు' నినాదం అందర్ని ఎంతో కదిలిస్తుందన్నారు మనోహర్. ఆ స్ఫూర్తిని ప్రతి ఒక్కరికి అందించాలనే జనసేన పార్టీ అధినేత పవన్‌ కళ్యాణ్ ఈ లోగోను తీసుకొచ్చారన్నారు. జై కొట్టు నినాదంతో యువత ముందుకెళ్లాల్సిన బాధ్యత ఉందన్నారు. రాజకీయాల్లో యువతకు ప్రత్యేక స్థానం కల్పించాలనే ఈ విభాగాన్ని ఏర్పాటు చేశారని.. అరుపులు, కేకలు కాదు, క్రమశిక్షణ ఎంతో ముఖ్యమన్నారు. అధినేత పవన్ కళ్యాణ్ ఆదేశాలను జనసైనికులు క్రమశిక్షణతో పాటించాలన్నారు. జనసేన పార్టీ కార్యక్రమాల్లో యువతను మరింతగా భాగస్వామ్యం చేయడం కోసం పార్టీ యువజన విభాగాన్ని ప్రారంభించారు.