అల్లవరం మండలంలోని ఓడలరేవులో ఈ ఘటన చోటుచేసుకుంది. బెండమూర్లంకకు చెందిన ప్రేమ్‌ కుమార్‌ అనే 23 ఏళ్ల యువకుడు ఓడలరేవులోని ఓ ఇంజనీరింగ్ కాలేజీలో ఫైనల్ ఇయర్ చదువుతున్నారు. అనంతపురంలోని పెనుగొండలో ఉన్న కియా కంపెనీలో ఇంటర్న్‌షిప్ చేస్తున్నాడు. అయితే తన అభిమాన హీరో పవన్ కళ్యాణ్ పుట్టినరోజు వేడుకల్లో పాల్గొనేందుకు స్వగ్రామం వచ్చిన ప్రేమ్ కుమార్.. మంగళవారం రాత్రి వేళ ఫ్లెక్స్ ఏర్పాటు చేస్తుండగా విద్యుత్ షాక్‌కు గురయ్యారు. చుట్టుపక్కల వారు వెంటనే అతణ్ని ఆస్పత్రికి తరలించగా.. ప్రేమ్ కుమార్ అప్పటికే చనిపోయినట్లు వైద్యులు నిర్ధారించారు. అనంతరం ప్రేమ్ కుమార్ మృతదేహాన్ని అమలాపురం ఆస్పత్రికి తరలించారు. ఈ ఘటన పవన్ కళ్యాణ్ అభిమానుల్లో తీవ్ర విషాదాన్ని నింపింది.

అమలాపురం ఘటన.. కలిచివేసిందన్న పవన్ కళ్యాణ్..