తన ప్రసంగానికి రైతుల నుంచి విశేష స్పందన రావడంతో.. తమిళనాడు అసెంబ్లీలో ఈ అంశంపై చర్చ జరగకుండా విజయ్ప్రభుత్వం కుట్ర పన్నిందని ఉదయనిధి స్టాలిన్ ఆరోపించారు. తన అసలు ప్రసంగాన్ని కట్ చేసి.. ఎడిట్ చేసిన వీడియోను ప్రచారం చేస్తూ తాను మాట్లాడని మాటలను తనకు ఆపాదించారని మండిపడ్డారు. అదే ఎడిట్ చేసిన వీడియోను నేషనల్ మీడియాకు కూడా పంపించారని ఆరోపించారు.

తప్పుడు ఆరోపణల ఆధారంగా పోలీసులు తనను అరెస్ట్ చేసేందుకు వచ్చినప్పటికీ.. తాను పూర్తిగా సహకరించానని ఉదయనిధి స్టాలిన్ తెలిపారు. అరెస్ట్ సమయంలోనే ఈ వ్యవహారం పూర్తిగా అసత్యమని మీడియాకు చెప్పానని.. తాను ఎప్పుడూ మాట్లాడని వ్యాఖ్యలపై కేసులు పెట్టి భయపెట్టే ప్రయత్నం చేస్తున్నారని అన్నారు. ఇక తాను కలైంజర్ కరుణానిధి మనవడిని అని.. ఎంకే స్టాలిన్ కొడుకుని అని.. ద్రావిడ మున్నేట్ర కళగం కార్యకర్తను అని.. ఇలాంటి చర్యలకు తాము భయపడేది లేదని తేల్చి చెప్పారు. ప్రజల సమస్యల కోసం తమ పోరాటం కొనసాగుతుందని ఈ సందర్భంగా ఉదయనిధి స్టాలిన్ స్పష్టం చేశారు.

ఉదయనిధి స్టాలిన్ విడుదల విషయం తెలిసిన వెంటనే డీఎంకే నాయకులు, కార్యకర్తలు, అభిమానులు భారీ ఎత్తున సెంగిపట్టి పోలీస్‌స్టేషన్‌ వద్దకు చేరుకున్నారు. పోలీస్‌స్టేషన్ నుంచి బయటకు వచ్చిన ఉదయనిధి స్టాలిన్‌కు భారీ పూలమాలలతో ఘన స్వాగతం పలికారు. అనంతరం కార్యకర్తలతో కలిసి భారీ ర్యాలీగా అక్కడి నుంచి ఆయన బయలుదేరారు.