ప్రెగ్నెన్సీ సమయంలో అధిక రక్తపోటు ఒక ముఖ్యమైన ప్రమాదంగా పరిగణించబడుతుంది. ఎందుకంటే ఇది తల్లిపై మాత్రమే కాకుండా బిడ్డపై కూడా ప్రభావం చూపుతుంది.

దీనిని ముందుగానే గుర్తించకపోతే.. అది మాయకు రక్త ప్రసరణను తగ్గించి బిడ్డకు తగినంత ఆక్సిజన్, అవసరమైన పోషకాలు అందకుండా చేస్తుంది. ఇది తక్కువ బరువుతో బిడ్డ పుట్టడం, నెలలు నిండక ముందే ప్రసవం కావడం, మూర్ఛలు, ఇతర తీవ్రమైన సమస్యలకు దారితీయొచ్చు.

గర్భధారణ సమయంలో తల్లి, పుట్టబోయే బిడ్డ ఇద్దరి ఆరోగ్యం, భద్రతను కాపాడటంలో ముందస్తు జాగ్రత్తలు (Prenatal Care) చాలా కీలకం. అందులోనూ రక్తపోటును (BP) నిరంతరం పర్యవేక్షించడం అత్యంత ముఖ్యమైన ప్రక్రియ. బీపీని నిర్లక్ష్యం చేస్తే ప్రీ - ఎక్లాంప్సియా వచ్చే ప్రమాదం పెరుగుతుంది. గర్భం దాల్చినప్పుడు మహిళల శరీరంలో అనేక శారీరక మార్పులు జరుగుతాయి. అటువంటి సమయంలో రక్తపోటు పెరగడం అనేది ఒక తీవ్రమైన హెచ్చరిక కావచ్చు.

గర్భధారణ సమయంలో రక్తపోటు పెరగడం వల్ల 'జెస్టేషనల్ హైపర్‌టెన్షన్' (Gestational Hypertension), 'ప్రీ-ఎక్లాంప్సియా' (Preeclampsia) వంటి సమస్యలు వచ్చే అవకాశం ఉంది. ప్రీ - ఎక్లాంప్సియా అనేది ప్రాణాలకే ప్రమాదం కలిగించే వైద్య పరిస్థితి.

ఇందులో బీపీ విపరీతంగా పెరడమే కాకుండా శరీరంలోని ఇతర అవయవాలు ( ముఖ్యంగా కిడ్నీలు, లివర్ వంటివి) సరిగ్గా పనిచేయవు. ఇటువంటి పరిస్థితుల వల్ల నెలలు నిండకుండానే కాన్పు అవ్వడం (Preterm labor), శిశువు ఎదుగుదల లోపించడం, మాయ (Placenta) విడిపోవడం, కొన్ని తీవ్రమైన సందర్భాల్లో ప్రాణాంతక ఆరోగ్య సమస్యలు తలెత్తవచ్చు.

• ​రెగ్యులర్ బీపీ పరీక్షల ద్వారా వైద్యులు ఎటువంటి లక్షణాలు కనిపించక ముందే ప్రమాద సంకేతాల్ని గుర్తించగలరు.
  
• సాధారణంగా కొందరిలో తీవ్రమైన తలనొప్పి, ముఖం, చేతులు వాపు రావడం, కంటిచూపు మసకబారడం, శ్వాస తీసుకోవడంలో ఇబ్బంది వంటి లక్షణాలు కనిపిస్తాయి.
  
• అయితే, చాలా మంది గర్భిణీల్లో ఎటువంటి లక్షణాలు బయటపడవు.అందుకే బీపీ పరీక్షలు తప్పనిసరి.
  
• ఈ పరీక్షల ద్వారా గర్భిణీ స్త్రీ శరీరం గర్భధారణ మార్పుల్ని ఎలా తట్టుకోగలుగుతుందో వైద్యులు అర్థం చేసుకుంటారు. దాన్ని బట్టి తదుపరి పరీక్షలు, మందులు, అదనపు పర్యవేక్షణ లేదా ఇతర చికిత్సా విధానాల్ని నిర్ణయిస్తారు.