LPG Cylinder Price Hike Sunday: నిత్యావసరాల ధరల పెరుగుదలతో ఇప్పటికే సతమతమవుతున్న సామాన్య వినియోగదారుడికి అంతర్జాతీయ చమురు మార్కెట్ తీవ్ర షాక్ ఇచ్చింది.
గృహ వినియోగ ఎల్పీజీ సిలిండర్ ధరను మరోమారు పెంచుతూ చమురు మార్కెటింగ్ కంపెనీలు నిర్ణయం తీసుకున్నాయి. ఆదివారం నుంచి అమల్లోకి వచ్చేలా ప్రతి సిలిండర్‌పై రూ. 29 పెంచుతున్నట్లు ప్రకటించాయి. గడిచిన మూడు నెలల కాలంలో గ్యాస్ ధరలు పెరగడం ఇది రెండోసారి కావడం గమనార్హం. ప్రస్తుతం పశ్చిమాసియా ప్రాంతంలో కొనసాగుతున్న యుద్ధ వాతావరణం, ఉద్రిక్తతల కారణంగా అంతర్జాతీయంగా ఇంధన వ్యయం భారీగా పెరగడమే ఈ తాజా ధరల పెంపునకు ప్రధాన కారణమని నిపుణులు విశ్లేషిస్తున్నారు. దీనికి ముందు గడిచిన మార్చి 7వ తేదీన కూడా చమురు కంపెనీల నష్టాల భారాన్ని తగ్గించుకోవడానికి సిలిండర్‌పై ఏకంగా రూ. 60 పెంచిన సంగతి తెలిసిందే.
ప్రధాన నగరాల్లో సవరించిన గ్యాస్ ధరలు ఇలా..
పెట్రోలియం మంత్రిత్వ శాఖ విడుదల చేసిన ప్రకటన ప్రకారం.. ప్రస్తుతం అంతర్జాతీయ మార్కెట్ పరిస్థితుల దృష్ట్యా భారత్‌లో ఒక సిలిండర్ సరఫరా చేయడానికి ప్రభుత్వానికి రూ. 1,600 నుంచి రూ. 1,700 వరకు ఖర్చు అవుతోంది. అయితే 'ప్రధాన మంత్రి ఉజ్వల యోజన' (పీఎమ్‌యూవై) పథకం ద్వారా మనదేశంలో పొరుగు దేశాలకంటే.. ముఖ్యంగా అమెరికా, కెనడా, ఆస్ట్రేలియా వంటి అభివృద్ధి చెందిన దేశాలకంటే చాలా తక్కువ ధరకే వంటగ్యాస్ అందుతోంది. గ్లోబల్ మార్కెట్‌లో నెలకొన్న అస్థిరత వల్ల వచ్చే పూర్తి భారాన్ని వినియోగదారులపై వేయకుండా ప్రభుత్వం నియంత్రిస్తోంది.
ఇందులో భాగంగానే ప్రభుత్వ రంగ చమురు విక్రయ సంస్థలు గడచిన ఆర్థిక సంవత్సరంలో గృహ వినియోగ ఎల్పీజీపై దాదాపు రూ. 60,000 కోట్ల నష్టాన్ని భరించాయి. అంతకుముందు ఏడాది ఈ నష్టం రూ. 41,338 కోట్లుగా ఉండేది. ఈ నష్టాల భారాన్ని తగ్గించేందుకు కేంద్ర క్యాబినెట్ రూ. 30,000 కోట్ల పరిహారాన్ని ఆమోదించింది. ప్రస్తుతం దేశవ్యాప్తంగా 10.35 కోట్లకు పైగా ఉన్న ఉజ్వల కనెక్షన్ల లబ్ధిదారులకు సబ్సిడీ నేరుగా అందుతోంది. కేవలం వంటగ్యాస్ మాత్రమే కాకుండా దేశంలో ఇతర ఇంధన ధరలు కూడా సామాన్యుడి జేబుకు చిల్లు పెడుతున్నాయి. మే నెల మధ్యకాలం నుంచి ఇప్పటి వరకు పెట్రోల్, డీజిల్ ధరలు లీటరుకు మొత్తంగా రూ. 7.50 మేర పెరిగాయి. అదేవిధంగా సీఎన్‌జీ ధరలు కూడా కిలోగ్రాముకు రూ. 6 వరకు పెరిగాయి.