వైవిధ్యమైన సినిమాలతో తెలుగు ప్రేక్షకులను అలరిస్తున్న నటుడు నారా రోహిత్ త్వరలో తండ్రి కాబోతున్నారు. ఆయన భార్య శిరీష ప్రస్తుతం గర్భంతో ఉన్నారు.

ఈ జంటకు సంబంధించిన ప్రత్యేక బేబీ బంప్ ఫోటో షూట్ వీడియో సోషల్ మీడియాలో ప్రత్యక్షమైంది. ఈ వీడియో కాస్తా క్షణాల్లో వైరల్‌గా మారడంతో, నారా వారి ఇంటికి కొత్త అతిథి రాబోతున్నారనే వార్త సినీ, రాజకీయ వర్గాల్లో హాట్ టాపిక్ అయ్యింది. ప్రస్తుతం సోషల్ మీడియా వేదికగా రోహిత్ అభిమానులతో పాటు సినీ సెలబ్రిటీలు ఈ దంపతులకు పెద్ద ఎత్తున శుభాకాంక్షలు తెలుపుతున్నారు. ఆ వీడియోలో ఈ జంట ఎంతో సంతోషంగా కనిపిస్తుండటం అభిమానులను ఆకట్టుకుంటోంది.

* ఆ స్టార్ హీరోకి భార్య ఉన్నా గర్ల్‌ఫ్రెండ్‌తోనే ఉంటాడు.. ఫుల్లుగా తాగేసి సెట్స్‌కి టైమ్‌కి రాడు - జేడీ

నారా రోహిత్, శిరీషల పరిచయం వెండితెరపైనే మొదలైంది. రోహిత్ నటించిన రాజకీయ నేపథ్య చిత్రం 'ప్రతినిధి 2' షూటింగ్ సమయంలో వీరిద్దరి మధ్య స్నేహం ఏర్పడింది. ఈ చిత్రంలో శిరీష హీరోయిన్‌గా నటించారు. ఆ పరిచయం కాస్తా ప్రేమగా మారి, చివరకు పెళ్లి పీటల వరకు వెళ్ళింది. ముఖ్యంగా నారా రోహిత్ పిన్ని నారా భువనేశ్వరి గారు స్వయంగా ఈ సంబంధం గురించి పెద్దలతో మాట్లాడి సంబంధాన్ని ఖరారు చేయడం విశేషం. అక్టోబర్ 30, 2025న హైదరాబాద్‌లో అత్యంత వైభవంగా వీరి వివాహం జరిగింది. ఏపీ ముఖ్యమంత్రి చంద్రబాబు నాయుడు, నందమూరి బాలకృష్ణ వంటి ప్రముఖులు హాజరై ఈ జంటను ఆశీర్వదించారు.