మెరుపు వరదలతో సంభవించిన నేపాల్లో సహాయక బృందాలు బురదతో నిండిన లోయలు, నదీతీరాలు, జలవిద్యుత్ సొరంగాల వద్ద గాలింపు చర్యలు కొనసాగిస్తున్నాయి. ఆదివారం ఉదయానికి ఈ విపత్తులో మరణించిన వారి సంఖ్య 675కి చేరింది.
మరో 2,426 మంది ఇంకా గల్లంతైనట్లు అధికారులు తెలిపారు. జాతీయ విపత్తు ప్రమాద తగ్గింపు నిర్వహణ సంస్థ (NDRRMA) తెలిపిన వివరాల ప్రకారం.. ఇప్పటివరకు 2,498 మందిని రక్షించగా, 219 మంది గాయపడ్డారు. రెస్క్యూ, సహాయక చర్యల కోసం 18,700 మందికి పైగా సిబ్బందిని రంగంలోకి దించారు.
మరోవైపు, సరిహద్దుకు అవతల ఉన్న టిబెట్లోని గైరోంగ్ పోర్ట్ వద్ద శనివారం ఉదయానికి ఏడుగురు మరణించగా, 554 మంది గల్లంతైనట్లు చైనా అధికారులు నివేదించారు. దీంతో ఇరువైపులా కలిపి మరణాల సంఖ్య కనీసం 682కి చేరింది. నేపాల్లో ఆచూకీ లభించని భారతీయుల సంఖ్య 287గా భారత అధికారులు ప్రకటించారు. అంతకుముందు రోజు ఇది 320గా ఉండేది. మరింత మంది ఆచూకీ లభించడంతో ఈ సంఖ్యను తగ్గించారు. మరో 128 మంది భారత సంతతి వ్యక్తులతో ఇంకా సంబంధాలు పునరుద్ధరణ కాలేదని విదేశాంగ శాఖ (MEA) తెలిపింది. అయితే, భారతీయుల మరణాలకు సంబంధించి ఎటువంటి అధికారిక సంఖ్యను MEA ఇంకా ధ్రువీకరించలేదు.
రసువాలోని ఒక జలవిద్యుత్ ప్రాజెక్టు సొరంగం నుంచి శనివారం బయటకు తీసిన నలుగురు కార్మికులు సహా మొత్తం 88 మంది భారతీయ పౌరులను రక్షించినట్లు మంత్రిత్వ శాఖ తెలిపింది. వీరు త్వరలోనే కాఠ్మాండుకు చేరుకుంటారని భావిస్తున్నారు. మూడు సైనిక రవాణా విమానాల్లో భారత్ పంపిన సాయంపై నేపాల్ ఆర్థిక మంత్రి స్వర్ణిమ్ వాగ్లే మాట్లాడుతూ.. ''నేపాల్కి అవసరమైన ఎలాంటి సహాయాన్నైనా అందించడానికి, మనోధైర్యాన్ని నింపడానికి ప్రధాని మోదీ, భారత విదేశాంగ శాఖ చాలా సానుకూలంగా స్పందించారు... చిక్కుకుపోయిన భారతీయ యాత్రికుల పట్ల కూడా వారు ఆందోళన వ్యక్తం చేశారు, వారి రక్షణ కూడా మాకు ప్రాధాన్యత అంశమే" అని పేర్కొన్నారు.
చైనాలో చిక్కుకున్న వారిని తీసుకొచ్చే ప్రయత్నాలు
పెద్ద ఎత్తున టన్నెల్-రెస్క్యూ బృందం, పరికరాలను పంపడానికి ముందు భారత ప్రత్యేక బృందం నేపాల్ సైన్యంతో కలిసి చిలీమే, లాంగ్టాంగ్లలో వరద ప్రభావిత టన్నెళ్లను సర్వే చేసింది. నేపాల్ పర్యాటక అధికారులు సైతం ముమ్మరంగా రెస్క్యూ డేటాబేస్ను నిర్వహిస్తున్నారు. శనివారం సాయంత్రం 6 గంటల నాటికి 167 మంది భారతీయులు, 40 మంది చైనీయులతో సహా 261 మంది విదేశీ పౌరులు, పర్యాటకులను రక్షించినట్లు నేపాల్ టూరిజం బోర్డు తెలిపింది. అయితే, 320 మంది విదేశీ పౌరుల ఆచూకీ ఇంకా దొరకలేదని పేర్కొంది. పర్యాటక, దౌత్య, రెస్క్యూ విభాగాలు వేర్వేరుగా జాబితాలను నిర్వహించడం, పేర్లు సరిపోల్చే ప్రక్రియ కొనసాగుతుండటంతో భారతీయ, నేపాల్ గణాంకాల మధ్య వ్యత్యాసం కనిపిస్తోంది.చైనా సరిహద్దు వైపు చిక్కుకున్న భారతీయ పౌరులను తీసుకొచ్చే ప్రయత్నాలు భారత్ వేగవంతం చేసింది. శనివారం టిబెట్ నుంచి 120 మంది భారతీయులు నేపాల్లోకి ప్రవేశించినట్లు MEA తెలిపింది. కైలాస మానససరోవర్ యాత్రికులతో సహా సుమారు 400 మంది భారతీయులు చైనా వైపు సురక్షితంగా ఉన్నారని భారత్ తెలిపింది.
నేపాల్లో గల్లంతైన వారిలో ఎక్కువ మంది జలవిద్యుత్ ప్రాజెక్టులు, వరద ప్రభావిత ప్రాంతాల్లో చిక్కుకున్నవారే ఉన్నారు. NDRRMA మిస్సింగ్ జాబితాలో జలవిద్యుత్ ప్రాజెక్టుల్లో 933 మంది కార్మికులతో పాటు విదేశీ పర్యాటకులు, భద్రతా సిబ్బంది, కస్టమ్స్, ఇమ్మిగ్రేషన్ కార్యాలయాల ఉద్యోగులు ఉన్నారు. కార్మికులు చిక్కుకున్నారని భావిస్తున్న పలు టన్నెళ్ల లోపల, చుట్టుపక్కల సెర్చ్ ఆపరేషన్లు కొనసాగుతున్నాయి.
హిమానీనదం (గ్లేసియర్) కూలిపోవడంతో ఏర్పడిన తాత్కాలిక సరస్సులతో పాటు ప్రతికూల వాతావరణం వల్ల సహాయక చర్యలకు పదేపదే విఘాతం కలుగుతోంది. అయితే, శిథిలాల వల్ల ఏర్పడిన ఒక పెద్ద సరస్సు శనివారం నాటికి సహజంగానే ఇంకిపోవడం ప్రారంభించిందని, దీనివల్ల గండి పడే ముప్పు తగ్గిందని చైనా హైడ్రోలాజికల్ బృందాలు తెలిపాయి. అయినప్పటికీ, కొత్తగా కొండచరియలు విరిగిపడటం లేదా బురద మైదానాలు ఏర్పడే అవకాశం ఉందనే ఆందోళనలు వ్యక్తమవుతున్నాయి.
గైరోంగ్ సరిహద్దు పోర్ట్ను ముంచెత్తిన గ్లేసియర్ బురద కారణంగా 554 మంది గల్లంతైనట్లు చైనా అధికారులు తెలిపారు. చైనా ఇప్పటికే 555 మంది పర్యాటకులను సురక్షిత ప్రాంతాలకు తరలించింది. అలాగే 499 మంది విలేజ్, కన్స్ట్రక్షన్ కార్మికులను సురక్షిత ప్రాంతాలకు పంపింది. కొన్ని చోట్ల బురద 1.5 మీటర్ల కంటే ఎక్కువ లోతు ఉండటంతో నిపుణులతో కూడిన రెస్క్యూ బృందాలు గాలింపు కొనసాగిస్తున్నాయి.