ఈ విపత్తులో ఇప్పటి వరకు కనీసం 98 మంది ప్రాణాలు కోల్పోగా.. వందల మంది గల్లంతయ్యారు. వీరిలో 133 మంది భారతీయులు ఉన్నారు. అయితే, ఆస్తి, ప్రాణనష్టం భారీగానే ఉంటుందని, మృతుల సంఖ్య మరింత పెరిగే అవకాశం ఉందని అంచనా వేస్తున్నారు. టిబెట్ సరిహద్దు ప్రాంతంలో బుధవారం సంభవించిన ఆకస్మిక వరదలకు పలు గ్రామాలు, ప్రాజెక్టులు కొట్టుకుపోయాయి. రసువాగధి బోర్డర్‌కు ఈశాన్యంగా 20 కిలోమీటర్ల దూరంలో ఉన్న నేపాల్-చైనా సరిహద్దు గ్లేసియర్ ప్రాంతంలో భారీ మంచు, కొండచరియలు విరిగిపడినట్టు నేపాల్ విపత్తు నిర్వహణ సంస్థ వెల్లడించింది.

ఆ మంచు చరియలు ఒక గ్లేసియల్ సరస్సులో పడటం లేదా నదీ ప్రవాహాన్ని అడ్డుకోవడంతో హిమనాదీ మంచు, కరిగిన నీరు, బురద వ్యర్థాలతో కూడిన వరద తీవ్ర ఉద్ధృతితో లేండే ఖోలా గుండా భోటే కోషి నదిలోకి ప్రవహించింది. ఆగస్టు 25, 26 తేదీలకు సంబంధించిన శాటిలైట్ ఫోటోలను పక్కపక్కనే ఉంచి, వరదలకు ముందు, తర్వాత అక్కడి పరిస్థితులను పోల్చి చూపుతున్న వీడియో ఒకటి బయటకు వచ్చింది.