బుధవారం (ఏప్రిల్ 8) బన్నీ పుట్టినరోజును పురస్కరించుకుని ఈ సినిమా టైటిల్ 'రాకా' (Raaka) అని ప్రకటిస్తూ మేకర్స్ ఫస్ట్ లుక్ పోస్టర్‌ను విడుదల చేశారు. అయితే, ఈ లుక్ ఇప్పుడు నెట్టింట పెద్ద చర్చకు దారితీసింది. ఫస్ట్ లుక్ పోస్టర్‌లో అల్లు అర్జున్ మునుపెన్నడూ చూడని విభిన్నమైన, భయంకరమైన అవతార్‌లో కనిపిస్తున్నారు. బన్నీ గుండుతో కళ్లకు దట్టమైన కాటుకతో, ఇంటెన్సివ్ లుక్‌తో గూస్‌బంప్స్ తెప్పిస్తున్నారు. చేతులు తోడేలు కాళ్లలా ఉండి, పెద్ద గోర్లు కలిగి ఉండటం సినిమాలోని ఫాంటసీ లేదా సైన్స్ ఫిక్షన్ ఎలిమెంట్స్‌ను సూచిస్తోంది. ఆయన నుదుటిపై ఉన్న వికింగ్ తరహా టాటూలు, ముఖంపై రగ్గడ్ స్కిన్ టెక్స్చర్ చూస్తుంటే, అట్లీ ఈ సినిమా కోసం ఏదో అద్భుతమైన ప్రపంచాన్ని సృష్టిస్తున్నారని అర్థమవుతోంది.

* వైల్డ్ లుక్‌లో భయపెడుతోన్న బన్నీ.. అట్లీ- అల్లు అర్జున్ మూవీ టైటిల్ ఇదే

'రాకా' పోస్టర్ వచ్చిన కొద్దిసేపటికే సోషల్ మీడియాలో ట్రోలింగ్ మొదలైంది. ఈ లుక్ 2016లో విడుదలైన కార్తీ 'కాష్మోరా' చిత్రంలోని రాజ్‌నాయక్ పాత్రను తలపిస్తోందని నెటిజన్లు కామెంట్స్ చేస్తున్నారు. రాజ్‌నాయక్ పాత్రలో కార్తీ కూడా గుండుతో, గుబురు గడ్డంతో, నెగటివ్ షేడ్స్ ఉన్న క్రూరమైన యోధుడిగా కనిపిస్తారు. దీంతో అట్లీ మళ్ళీ తన పాత అలవాటు (కాపీ) కొనసాగిస్తున్నారా? అని కొందరు ప్రశ్నిస్తుంటే, "కార్తీ లుక్ ఒరిజినల్ అయితే, బన్నీది డూప్లికేట్ లా ఉంది" అని మరికొందరు విమర్శిస్తున్నారు. అయితే, బన్నీ అభిమానులు మాత్రం ఇది కేవలం పోస్టర్ మాత్రమేనని, సినిమాలో ఆయన విశ్వరూపం మరో రేంజ్‌లో ఉంటుందని కౌంటర్ ఇస్తున్నారు.