ఢిల్లీతో పాటు పలు ప్రాంతాల్లో స్వైన్ ఫ్లూ అలజడి ఉంది. స్వైన్ ఫ్లూ కేసులు బాగా పెరుగుతున్నాయి. అయితే, వర్షాకాలంలో జలుబు, దగ్గు వంటి సమస్యలు కూడా వస్తుంటాయి.
దీంతో, చాలా మంది తమకు వచ్చింది సాధారణ జలుబా లేదంటే స్వైన్ ఫ్లూ అని అనుమానపడుతుంటారు. వీరి సందేహలపై డాక్టర్ దిలీప్ గుడే క్లారిటీ ఇచ్చారు.
ప్రస్తుత వర్షాకాలంలో దేశ రాజధాని ఢిల్లీతో పాటు పలు ప్రాంతాల్లో స్వైన్ ఫ్లూ (H1N1) కేసులు పెరుగుతున్నాయి. ముఖ్యంగా ఢిల్లీలో కేసులు ఎక్కువగా నమోదవుతున్నాయి. ఇప్పటికే దాదాపు 1350కిపైగా కేసులు నమోదయ్యాయి. సాధారణ వైరల్ జలుబు, H1N1 ఫ్లూ రెండూ ముక్కు, గొంతు, శ్వాసనాళాలపైనే ప్రభావం చూపుతాయి కాబట్టి వీటి మధ్య తేడాను గుర్తించడం కాస్త గందరగోళంగా అనిపించవచ్చు. అయితే, లక్షణాల తీవ్రత, అవి మొదలయ్యే విధానంలో స్పష్టమైన తేడాలు ఉంటాయి. సాధారణ జలుబు ఎలా ఉంటుంది, H1N1 ఫ్లూ (Swine Flu) ఎలా ఉంటుంది? అన్న దాని గురించి పూర్తి వివరాల్ని డాక్టర్ దిలీప్ గుడే (సీనియర్ కన్సల్టెంట్ ఫిజీషియన్, యశోద హాస్పిటల్స్, హైదరాబాద్) అందించారు. ఆ పూర్తి వివరాలపై ఓ లుక్కేద్దాం.సాధారణ జలుబు ఎలా ఉంటుంది?
- నెమ్మదిగా మొదలవుతుంది: జలుబు సాధారణంగా ఒక్కసారిగా కాకుండా నెమ్మదిగా ప్రారంభమవుతుంది.
- లక్షణాలు: తుమ్ములు, ముక్కు కారడం లేదా ముక్కు దిబ్బడ, గొంతులో స్వల్ప గరగర/మంట, స్వల్ప అలసట ఉంటాయి.
- జ్వరం: సాధారణంగా జ్వరం ఉండదు; ఒకవేళ వచ్చినా చాలా తక్కువ స్థాయిలోనే ఉంటుంది.
H1N1 ఫ్లూ (Swine Flu) ఎలా ఉంటుంది?
- అకస్మాత్తుగా దాడి చేస్తుంది: అప్పటివరకు బాగానే ఉన్న వ్యక్తికి ఒక్కసారిగా తీవ్రమైన జ్వరం, వణుకు, పొడి దగ్గు మొదలవుతాయి.
- తీవ్రమైన లక్షణాలు: విపరీతమైన ఒళ్లు నొప్పులు, తీవ్రమైన తలనొప్పి, కనీసం లేచి నిలబడలేనంత నీరసం/అలసట ఉంటాయి.
- జ్వరం తీరు: H1N1లో అధిక జ్వరం రావడం సర్వసాధారణం. అయితే, కొందరిలో ప్రారంభంలో తక్కువ జ్వరం, గొంతు నొప్పి లేదా తేలికపాటి దగ్గు మాత్రమే ఉండొచ్చు. కాబట్టి ప్రారంభంలో లక్షణాలు స్వల్పంగా ఉన్నంత మాత్రాన అది H1N1 కాదని కొట్టిపారేయలేము.
ప్రమాదకర సంకేతాలు
జలుబు లేదా ఫ్లూ తీవ్రమవుతోందని చెప్పడానికి ఇవి ముందస్తు హెచ్చరికలు:
- జ్వరం తీవ్రం కావడం లేదా చాలా రోజుల పాటు తగ్గకపోవడం.
- దగ్గు అంతకంతకూ పెరగడం.
- శ్వాస తీసుకోవడంలో ఇబ్బంది లేదా ఆయాసం రావడం.
- ఛాతీలో నొప్పి లేదా అసౌకర్యం.
- తీవ్రమైన బలహీనత లేదా నిస్సత్తువ.
- ఆరోగ్యం కాస్త కుదుటపడినట్టే అనిపించి, మళ్లీ ఒక్కసారిగా తీవ్రం కావడం.
ఎవరికి ముప్పు ఎక్కువ?
ఈ కింది వర్గాల వారికి H1N1 సోకితే ముప్పు ఎక్కువ.
- గర్భిణీ స్త్రీలు
- వృద్ధులు
- డయాబెటిస్ (మధుమేహం), గుండె జబ్బులు, ఊపిరితిత్తుల సమస్యలు (ఆస్తమా వంటివి), కిడ్నీ వ్యాధులు ఉన్నవారు
- అధిక బరువు (ఊబకాయం) ఉన్నవారు
- రోగనిరోధక శక్తి తక్కువగా ఉన్నవారు
ఇంటి చిట్కాలు, అత్యవసర వైద్యం ఎప్పుడు అవసరం?
తేలికపాటి లక్షణాలకు: తగినంత విశ్రాంతి తీసుకోవడం, గోరువెచ్చని నీళ్లు లేదా సూప్‌లు తాగడం, ఆవిరి పట్టడం, వైద్యుల సలహాతో పారాసిటమాల్ వంటి మందులు వేసుకోవడం ద్వారా ఉపశమనం పొందవచ్చు.
వెంటనే డాక్టర్‌ను ఎప్పుడు సంప్రదించాలి?
- శ్వాస ఆడకపోవడం
- ఛాతీ నొప్పి
- నిరంతర తీవ్రమైన జ్వరం
- స్పృహ తప్పడం లేదా గందరగోళానికి గురికావడం
- పెదవులు నీలంగా మారడం (ఆక్సిజన్ తగ్గినప్పుడు)
- తీవ్రమైన వాంతులు లేదా డీహైడ్రేషన్ (ఒంట్లో నీటిశాతం తగ్గడం)
ఫ్లూ వ్యాక్సిన్ రక్షణ, పాటించాల్సిన జాగ్రత్తలు
- ప్రస్తుతం అందుబాటులో ఉన్న సీజనల్ ఫ్లూ వ్యాక్సిన్ H1N1 వైరస్ నుంచి కూడా రక్షణ కల్పిస్తుంది. ప్రతి సంవత్సరం ఫ్లూ షాట్ (Flu Vaccine) తీసుకోవడం ద్వారా వ్యాధి తీవ్రతను, ఆసుపత్రి పాలయ్యే ముప్పును సమర్థవంతంగా తగ్గించుకోవచ్చు.
- ముఖ్యంగా: తుమ్మినప్పుడు, దగ్గినప్పుడు నోటికి, ముక్కుకు రుమాలు లేదా టిష్యూ పేపర్‌ను అడ్డు పెట్టుకోవాలి. చేతుల్ని సబ్బు, నీటితో తరచూ కడుక్కోవాలి లేదా ఆల్కహాల్ ఆధారిత శానిటైజర్ వాడాలి. జ్వరం, జలుబు ఉన్న వ్యక్తులకు దూరంగా ఉండటం, రద్దీ ప్రదేశాలలో మాస్క్ ధరించడం మంచిది. చేతులతో కళ్లు, ముక్కు, నోటిని తరచూ తాకకూడదు.
ఆహారం, రికవరీ సలహాలు
- సులభంగా జీర్ణమయ్యే వేడి వేడి తాజా ఆహారం, కూరగాయల సూప్‌లు, గంజి, పండ్ల రసాలు తీసుకోవడం ద్వారా శరీరంలో నీటిశాతం తగ్గకుండా చూసుకోవచ్చు.
- యాంటీబయాటిక్స్ వైరల్ ఇన్‌ఫెక్షన్లపై పనిచేయవు. కాబట్టి వైద్యుని సంప్రదించకుండా మెడికల్ షాపుల్లో సొంతంగా యాంటీబయాటిక్స్ కొని వాడకూడదు. H1N1 నిర్ధారణ అయితే వైద్యులు నిర్దిష్టమైన యాంటీవైరల్ మందులు సూచిస్తారు.
సమయం తెలుగు సంప్రదించిన వైద్య నిపుణులు
డాక్టర్ దిలీప్ గుడే
సీనియర్ కన్సల్టెంట్ ఫిజీషియన్,
యశోద హాస్పిటల్స్, హైదరాబాద్