మార్కెట్‌లో సన్న బియ్యానికి డిమాండ్‌ ఉండటంతో పాటు స్టీమ్‌ బియ్యాన్ని కూడా చాలామంది కుటుంబాలు ఎంచుకుంటాయి. మరి మన రోజువారీ భోజనానికి సన్న బియ్యమా, స్టీమ్‌ బియ్యమా ఎంచుకోవాలి? ఈ రెండింటి మధ్య ఉన్న తేడాలను ఒక్కసారి చూద్దాం.

సన్న బియ్యం అనేది ప్రధానంగా గింజ ఆకారం, పరిమాణాన్ని సూచించే పేరు. సన్నగా, పొడవుగా ఉండే బియ్యం రకాలను సాధారణంగా సన్న బియ్యం అంటారు. అయితే ఇందులో పాలిషింగ్‌ స్థాయి, బియ్యం రకం ఆధారంగా పోషక విలువలు మారవచ్చు. ఎక్కువగా పాలిష్‌ చేసిన తెల్ల బియ్యంలో పై పొరలు తొలగిపోవడం వల్ల ఫైబర్‌, కొన్ని విటమిన్లు, మినరల్స్‌ తగ్గే అవకాశం ఉంటుంది. కాబట్టి కేవలం బియ్యం సన్నగా ఉందా లేదా అనే దానికంటే ఎంతగా పాలిష్‌ చేశారు, ఏ రకం బియ్యం అనేది కూడా చూడాలి.

స్టీమ్‌ బియ్యం లేదా పార్బాయిల్డ్‌ రైస్‌ తయారీలో వరి గింజలను మిల్లింగ్‌ చేయడానికి ముందు నీటిలో నానబెట్టి, వేడి లేదా ఆవిరితో శుద్ధి చేసి, ఆ తర్వాత ఎండబెట్టి మిల్లింగ్‌ చేస్తారు. ఈ ప్రక్రియలో ధాన్యపు పై పొరల్లో ఉండే కొన్ని పోషకాలు గింజలోపలికి చేరవచ్చు. అందువల్ల సాధారణంగా పాలిష్‌ చేసిన తెల్ల బియ్యంతో పోలిస్తే కొన్ని పోషకాలు ఎక్కువగా నిలిచే అవకాశం ఉంటుంది. స్టీమ్‌ బియ్యం అన్నం వండిన తర్వాత కూడా మెతుకులు విడివిడిగా ఉండటం దీని ప్రత్యేకత.

బియ్యం తినగానే రక్తంలో గ్లూకోజ్‌ పెరుగుదలపై ప్రభావం చూపుతుందిని Obesity Research & Clinical Practice అధ్యయనం పేర్కొంది. అయితే అది బియ్యం రకంతో పాటు పాలిషింగ్‌, వంట విధానం, తినే పరిమాణం, దానితో తీసుకునే కూరలు, పప్పు, ప్రోటీన్‌, ఫైబర్‌ వంటి వాటిపైనా ఆధారపడి ఉంటుంది. కొన్ని పార్బాయిల్డ్‌ రైస్‌ రకాలు సాధారణ తెల్ల బియ్యంతో పోలిస్తే తక్కువ గ్లైసెమిక్‌ ఇండెక్స్‌ ఉండవచ్చు.

అయినప్పటికీ డయాబెటిస్‌ ఉన్నవారు అన్నం తక్కువగా తీసుకోవడం, కూరగాయలు-పప్పులు వంటి వాటితో సమతుల భోజనం చేయడం ముఖ్యం. అలాగే బరువు తగ్గాలనుకునే వారికి స్టీమ్‌ బియ్యంలో రెసిస్టెంట్‌ స్టార్చ్‌ అధికంగా ఉంటుంది. ఇది ఎక్కువ సేపు కడుపు నిండిన ఫీలింగ్‌ కలిగిస్తుంది. దీనివల్ల ఎక్కువగా తినాలనే కోరిక తగ్గి బరువు అదుపులో ఉంటుంది.

సన్న బియ్యంలో ఫైబర్‌ ఎంత ఉంటుందనేది దాని రకం, పాలిషింగ్‌పై ఆధారపడి ఉంటుంది. ఎక్కువగా పాలిష్‌ చేసిన తెల్ల బియ్యంలో ఫైబర్‌ తక్కువగా ఉంటుంది. స్టీమ్‌ బియ్యంలో కూడా ఫైబర్‌ పరిమాణం బియ్యం రకం, మిల్లింగ్‌ స్థాయిని బట్టి మారుతుంది. మరింత ఫైబర్‌ కోసం బ్రౌన్‌ రైస్‌, తక్కువగా పాలిష్‌ చేసిన బియ్యం వంటివి ఎంచుకోండి. జీర్ణ సమస్యలు ఉన్నవారు తమకు సులభంగా జీర్ణమయ్యే రకాన్ని ఎంచుకోవడం మంచిది.

సన్న బియ్యం లేదా స్టీమ్‌ బియ్యంలో ఒక్కటే అందరికీ మంచిదని చెప్పలేం. సన్న బియ్యం రుచి, మెత్తదనం కారణంగా చాలామందికి ఇష్టం. స్టీమ్‌ బియ్యం మాత్రం తయారీ ప్రక్రియ కారణంగా కొన్ని పోషకాలను మెరుగ్గా నిలుపుకునే అవకాశం ఉంటుంది. ఎక్కువగా పాలిష్‌ చేసిన సన్న తెల్ల బియ్యంతో పోలిస్తే, తక్కువగా పాలిష్‌ చేసిన లేదా పార్బాయిల్డ్‌ స్టీమ్‌ బియ్యం కొన్ని పోషక ప్రయోజనాలను అందించవచ్చు. అయితే ఆరోగ్యకరమైన భోజనం అంటే బియ్యం రకాన్ని ఎంచుకోవడం మాత్రమే కాదు. అన్నంతో పాటు కూరగాయలు, పప్పులు, ఆకుకూరలు, పెరుగు వంటి వాటిని సరైన మోతాదులో తీసుకోవడం కూడా ముఖ్యమే.

ముఖ్య గమనిక: ఈ కథనంలోని సమాచారం కేవలం అవగాహన కోసం మాత్రమే. కొన్ని అధ్యయనాలు, కొందరు నిపుణులు పేర్కొన్న అంశాల ఆధారంగా తెలియజేశాము. వీటిని పాటించే ముందు నిపుణుల సలహా తీసుకోండి. అలాగే వీటిని పాటించడం, పాటించకపోవడం పూర్తిగా మీ వ్యక్తిగత విషయం. వీటిని ఎంత వరకు విశ్వసించాలనేది కూడా పూర్తిగా మీ వ్యక్తిగత విషయం. సమయం తెలుగు వీటిని ధృవీకరించడం లేదు.