ఎలిమినేటర్‌లో సన్‌రైజర్స్‌ను చిత్తు చేసిన రాజస్థాన్ రాయల్స్ ఈ మ్యాచ్‌లో తలపడనున్నాయి. వరుస విజయాలతో జోష్‌లో ఉన్న రాజస్థాన్‌పై గెలవడం ఇప్పుడు గుజరాత్‌కి కత్తి మీద సాములా మారింది.

గుజరాత్ టైటాన్స్‌కి వైభవ్ సూర్యవంశీ రూపంలో పెద్ద గండమే ఎదురవ్వనుంది. ఎలిమినేటర్ మ్యాచ్‌లో కేవలం 29 బంతుల్లోనే 97 పరుగులు చేసి ఐపీఎల్ ఫాస్టెస్ట్ సెంచరీ రికార్డును వైభవ్ సూర్యవంశీ మిస్ చేసుకున్నాడు. ఆ మ్యాచ్‌లో ప్యాట్ కమిన్స్ లాంటి అంతర్జాతీయ బౌలర్‌ను సైతం ఉతికారేసిన వైభవ్ కోసం ఇప్పుడు గుజరాత్ టైటాన్స్ పెద్ద ప్లానే వేసింది.

ఈ మ్యాచ్‌లో గుజరాత్ టైటాన్స్ విజయం సాధించాలంటే తమ ముందు ఉన్న అతిపెద్ద సవాల్ వైభవ్ సూర్యవంశీ వికెట్ తీసుకోడమే. దాంతో ఈ మ్యాచ్‌లో గుజరాత్ టైటాన్స్ బౌలర్లే కీలకంగా మారనున్నారు. ముఖ్యంగా పేస్ బౌలర్లు మొహమ్మద్ సిరాజ్, కగిసో రబడా పవర్ ప్లేలో వైభవ్‌ను అడ్డుకుంటే దాదాపు గుజరాత్ విజయం ఖరారయినట్టే. పవర్ ప్లేలో ఓపెనర్లను పెవిలియన్‌కు పంపిస్తే రాజస్థాన్ భారీ స్కోర్ చేసే అవకాశం లేదు. వైభవ్ సూర్యవంశీతో పాటు యశస్వి జైస్వాల్, ధృవ్ జురేల్, రియాన్ పరాగ్, దాసున్ శనక, డోనోవాన్ ఫెరీరా కూడా ఫామ్‌లో ఉన్నప్పటికీ.. పవర్ ప్లేలో ఎంత కట్టడి చేస్తే మ్యాచ్‌పై అంత పట్టు సాధించే అవకాశం ఉంది.

ఈ మ్యాచ్‌లో టాస్ గెలిస్తే గుజరాత్ టైటాన్స్ ముందుగా బ్యాటింగ్ చేసే అవకాశాలు ఎక్కువగా కనిపిస్తున్నాయి. క్వాలిఫయర్ 1లోనూ తొలుత బౌలింగ్ చేసి భారీగా పరుగులు సమర్పించుకుంది. దాంతో రాజస్థాన్ హిట్టింగ్ చూసిన తర్వాత టాస్ గెలిచి బ్యాటింగ్ ఎంచుకునే ఆలోచనలో గిల్ సేన ఉంది. తొలుత బ్యాటింగ్ చేసి 220కి పైగా స్కోర్ చేస్తే ప్రత్యర్థిపై ఒత్తిడి తీసుకురావొచ్చు. ఒకవేళ రాజస్థాన్ మళ్లీ మొదట బ్యాటింగ్ చేసి 240 - 250 చేస్తే గుజరాత్ విజయావకాశాలు అసాధ్యమే.

గుజరాత్ టైటాన్స్ బ్యాటింగ్ లైనప్ కూడా అంత గొప్పగా లేదు. సాయి సుదర్శన్, శుభ్‌మన్ గిల్, జోస్ బట్లర్, వాషింగ్టన్ సుందర్ వికెట్లు కోల్పోతే చేతులెత్తేసినట్టే. దాంతో గుజరాత్ తమ బౌలర్లయిన కగిసో రబడా, మొహమ్మద్ సిరాజ్, రషీద్ ఖాన్, జేసన్ హోల్డర్‌పైనే ఎక్కువ ఆశలు పెట్టుకుంది. మరి ఈ మ్యాచ్‌లో గుజరాత్ వైభవ్ గండాన్ని దాటి ఫైనల్‌కు చేరుకుంటుందో లేదో చూడాలి.